Read anuak Dut Pwøc 51 Bible Online

Dut Pwøc 51 - anuak bible

Dut Pwøc 51

¹Manøgø beeye duut mar Acaap. Wui Wuuö Jwøk, wëën aani ki køør mëër marï ni wø ba jøøl. Wec moa baaa ni raanynyï geni ki køør mëër marï na päl.

²Pïny gïna baaa wøk cwïnya, ni døøyï dëëra mo waany ki køør gïna baaa.

³Kiper gïïa baaa ŋääa, naa lääŋŋa bääyö mara cooth.

⁴Beeye ïïni keerï na bääya dëëre, ni tïïa gïna raac nyïmï, kiper manøgønø, luummï na caanï beeye adïëri, ni bäŋ ajäla bäätï ki køør luummï na ŋølï.

⁵Adïëri møn, aana ŋat bääö ki mana nywøl a cøøn, ni tägi ka kanya ŋiiny aani yi mera.

⁶Adïëri møn, ï mëër ki ŋat mo cwïnye thïïŋ; ni bee ï ni wø pwöny aani nee tiet luup cige cwïnya.

⁷Wec gïna baaa, naa tïma naa waany, ni pïnyï bääyö mara wøk yi cwïnya, nee dööŋe ni waany.

⁸Køny aani naa jïta ki met ec ki kanynyø, ni døøyï pänh cwïny mara met ec.

⁹Cïp cwïnyï piny ki gïïa baaa, ni raanynyï geni bëët.

¹⁰Wui Wuuö Jwøk, beerra man tïïyï cwïnya ni tøŋ, ni døøyï jwïëya mo nyään, nee cwïnya bëëde ni ena køørï cooth.

¹¹Kär a riem wøk buutï, ni ba lwørï jwïëyï na en kur keere bääta.

¹²Dwøk met ec mara kare, man wø ööi ki køør køny marï; ni døøyï wïïa mo jööt, naa tïma naa tïïya mana manynyï.

¹³Køøre aani, jø wø dhal ciigï pwönynya pwönynyö ki jöörï, ni ö jø wø bääö ni luuge rege baŋï.

¹⁴Wui Jwøk, ï na dïkunyi mara, wëën aani kiper ajäl rem dhaanhø mana kønynya piny; køøre aano wär ki duut ni yia met naa pwøya bëëtö marï na beer.

¹⁵Wui Wuuö Jwøk, beerra man japï dhaa, naa cääna naa pwøya ïïni.

¹⁶Wui Wuuö Jwøk, yiï ba mïnni ko olämi man wø waaŋ; doo na yiï met ko olämi, a doo cïpö.

¹⁷Kiper olämi man wø manynyï beeye cwïny mo opädhö. Wui Wuuö Jwøk, dhaanhø mo cwïnye pädhö kiper bääyö mare, ba taagï.

¹⁸Ki køør met ec marï, beerra man tïïï ki gïï mo beyø jï Dhayan, ni beeye Jerucalem, ni cäŋï kiir mare geerrø.

¹⁹Køøre nø, yiï otïmö ni met ko olämme moa näk karge, ni mïn yiï ko olämme mo wø waaŋ bäre; kar kaace nø, rwädhe otïmö ni di cïbö bäät gïn wø cïp olämme bääte marï.