Read anuak Dut Pwøc 56 Bible Online

Dut Pwøc 56 - anuak bible

Dut Pwøc 56

¹Manøgø beeye duut Deebit. Wui Wuuö Jwøk, køny aani ki køør mëër marï, kiper da jiy mo caanna aani, naa ege öölö cooth ki leny.

²Nyïïmänna atïmö ni thööth, ni ge bëëdö ni ge caanna aani cooth, ni ge manynya leny ki aani ni ge töödö.

³'Ba kany wø lwäya, a wø bëëdö naa ŋäätha ïïni.

⁴Bee ï Jwøk ni wø luumme pwøa, ni bee ï Jwøk ni wø ŋäädha naa ba lwäyi. ?Aŋø, dhaanhø jaak, agïnaŋø noo tïïe dëëra?

⁵Cooth dhaa kat jiyi katø, ni gïï wø caarge bëët kipera beege gïï mo reyø.

⁶Dhøkge wø tuutge tuudö, ni lepge aani; køør tieta wø raŋge raŋŋø, ni ge koora aani naa 'näkge.

⁷Wui Wuuö Jwøk, jääl jøøgø ki køør gïna baacge, ni raanynyï geni ki wëër marï.

⁸Kwöra wïïra yïthge bëët ŋäyï; beerra man kanï pï nyeŋŋa yi wïlli marï, niï caara kïmmö mara. ?Aŋø, gïïa tägö dëëra bëët paa iï göörö yi wëëlö marï?

⁹'Ba dïcäŋ wø kwaa ïïni, nyïïmänna wø puta døø ŋäthge. Ŋääa møn ni ï na Jwøk, ï ena kura.

¹⁰Bee ï Jwøk ni wø luumme pwøa; bee ï Wuuö Jwøk ni wø luumme pwøa møn;

¹¹bee ï Jwøk ni wø ŋäädha naa ba lwäyi. ?Aŋø, dhaanhø jaak, agïnaŋø noo tïïe dëëra?

¹²Wui Wuuö Jwøk, gïïa kööŋa ki geni bëët na en bääta otïïa jïrï, ni cïpa jïrï ko olämme mo dwøk met ec.

¹³Kiper aana piemï cer thøø, ni cømï tieta naa ba pädha, naa cäädha nyïmï, ï na Wuuö Jwøk, yi tar mar kwøw.