Read anuak Dut Pwøc 58 Bible Online

Dut Pwøc 58 - anuak bible

Dut Pwøc 58

¹Manøgø beeye duut Deebit mana caae kanya reeŋe ni ŋwieya Cøøl, ni kan ree øt kïdi. ?Aŋø, uuni na kwääri, u ŋudö møn ki ŋøl mana näk adïëri? ?A luup jiy ŋøllu ŋølø na karge?

²Jïre bäär, kiper u caara gïï mo reyø ki yïth cwïnynyu, nou tïïö ki ceŋŋu ki gïï mo reyø bäät piny.

³Jøøa reyø, ki mana nywøl ge cøøn, ge bëëdö ni geno gaa wøk, ni ge cara tööt; geno bääyö cøøn ki mana öge wøk ki yïth mëëkge.

⁴Dhøkge reyø ni caala cïm mar thwöl, ni ge caala olwierø ni wø dhïŋ ïthe, ni tïïc dëëre na miiŋ,

⁵kiper nee dööt jø wø tuuk ki thwöre nee ba wïnynye, këël jøøgø nyeŋge doo reegø nidïï, döötge ba wïnyge.

⁶Wui Jwøk, tøc lak jøøa reyø. Wui Wuuö Jwøk, tëëŋ lwönni moge wøk, ge ni caal ŋuuwe yøø.

⁷Beerra man rwäänyge kaamar pïï mo oøøyø, ni tïm athëëre moge ni bäŋ tøøŋi wïthge kany wø thööthge.

⁸Beerra man tïmge kaamar nyilaal mo onimany ec, ni tïmge kaamar nyilaal mo obwön wøk, mo cäŋ käre joodø.

⁹Jwøk jøøgø pudhe wøk kaamar acïrra kany mo kärge dïëdö, ni raany geni ki køør wëër mare.

¹⁰Ŋata beer yie omïnni kanyo joot gø ni kwör di coolø, ni lwøk tiete ki rem jøøa reyø.

¹¹Køøre jiy oköö, ni «Ka adïëri møn, jøøa beyø da gïn mo beer mo jootge joodø møn; kare møn, Jwøk nutö ni ŋudö bäät piny.»