Read anuak Dut Pwøc 59 Bible Online

Dut Pwøc 59 - anuak bible

Dut Pwøc 59

¹Manøgø beeye duut Deebit. Wui, ï na Jwøk mara, piem aani ceŋ nyïïmänna; gwøk aani ceŋ jø wø ö maal bääta.

²Piem aani ceŋ jø wø tïïö ki gïï mo reyø, ni gwøgï aani ceŋ jø wø many näk ki jiy.

³Wui Wuuö Jwøk, ka adïëri møn, jøøa bäätge teek, geno nø mør piny jööra; ni ge manynya man tïïge ki gïï mo leth dëëra, ni paa kiper ni da gïn mo yaa baaø wala raay mo yaa tïïö.

⁴Aani bäŋ gïn mo yaa baaø, 'ba ge wø laara reŋ kuna jiiŋge dëëtge kipera. Ï na Jwøk, ö maal ni raŋï gïna tägö dëëra, ni kønyï aani.

⁵Wui Wuuö Jwøk, Jwø Icriel, ï na wïth jammi bëët, päyï ni jäälï wïth juurre bëët; jø wø kaam gïï mo reyø kär wëënnï.

⁶Jøøgø, wø tïme na abøøya, ge wø duuö, ni ge ŋärö kaamar guu, ni wïrge dï pääny.

⁷Luup mo reyø wø dhääge wøk jaak, ni dhøkge beth kaamar opëëllö, kiper ge köö ki cwïnyge, na «?Aŋa ni wïny gø?»

⁸'Ba ïïni na Wuuö Jwøk, ï ŋeethø bäätge, ni taagï gïr wïth juurre bëët.

⁹Ï na teek mara, a bëëdö naa raŋŋa jïrï, kiper bee ïïni na kar gwøk røk jïra.

¹⁰Jwøk ni wø mëër mare ba jøøl obwödhö nyïma, ni tïïc aani nee nyïïmänna jooda ni geno böötö.

¹¹'Ba ï na Wuuö Jwøk, ni bee ï na kwöt leny marwa, kär ge 'nägï, kiper kanymør wïth jiya wïl; tïïc ge nee ge thääcge ki køør teek marï, ni dwøgï wïthge piny.

¹²Beerra man cegï ge ka atöör marge, ki raay mo dhøkge ki luup mo wø cur dhøkge, ki luup tööt mo wø carge, ka acïëni marge.

¹³Beerra man thöörï geni ki wëër, nee bäŋe gøøni mo dööŋ këët, kiper nee ŋäc bäät pinynyi bäre ni Jwøk beeye kwäärö bäät nyïïkwaac Jeekap.

¹⁴Jøøgø, wø tïme na abøøya, ge wø duuö, ni ge ŋärö kaamar guu, ni wïrge dï pääny.

¹⁵Ge wø wïïrö ni ge caya cam, ni ŋurge kany wø näk mo ge kär jäŋ.

¹⁶'Ba aani, aano wär ki duut kiper teek marï, ni yia met ka amöölla ni dwøra ena maal, naa wär kaper mëër marï ni wø ba jøøl, kiper ïïna bëëdö na kar gwøk røk jïra, na kar kan røk kany wø dee gïï mo leth dëëra.

¹⁷Wui ï na teek mara, a wär ki duut jïrï naa pwøya ïïni, kiper ï bëëdö na kar gwøk røk jïra, ï na Jwøk, ni wø nyooth mëër marï ni wø ba jøøl jïra.