Read anuak Dut Pwøc 62 Bible Online

Dut Pwøc 62 - anuak bible

Dut Pwøc 62

¹Manøgø beeye duut Deebit. Aani, a bëëdö naa raŋŋa jï Jwøk keere naa lïŋö, kiper køny mara ööi ka baŋe.

²Bee eni keere na teek mara na dïkunyi mara, ni ena kar gwøk røk jïra, ni tïm cwïnya ni ba bööi këët døc.

³?Aŋø, u bëët, a këël kany mo nyïëdi nø noo bëëdu nou tuuŋŋa dhaanhø, ki man raanynyu gø, kaamar kiir mo dëëre ee nyaaŋø wala kal mo nhønhnhi?

⁴Man wø caarru keere beeye ki man gøøu dhaanhø piny kare na näk eno wøørø yie, ni yïthu wø met ka caan tööt, ni u wø gwëëdhö ka dhøgu, 'ba u cïënö ki cwïnynyu.

⁵Aani, a doo bëëdö naa raŋŋa jï Jwøk keere naa lïŋö, kiper a bëëdö naa ŋäätha eni.

⁶Bee eni keere na teek mara na dïkunyi mara, ni ena kar gwøk røk jïra, ni tïm cwïnya ni ba bööi këët.

⁷Køny mara ka ajiem mara jooda baŋ Jwøk, ni teek mara ki kar kan røk mara beeye Jwøk.

⁸Dïbwör bäre, bëëdu nou ŋäätha eni cooth, ni kälu gïïa en cwïnynyu wøk jïre; kiper Jwøk beeye kar kan røk marø.

⁹Jø bäät piny bëët caala jam dhøk jaak; këël jøøa kwörge døøŋŋø ki moa kwörge bäŋgø bëët, bäŋ karge. Ni näk mo ge kïtha bäät gïr røm, ge ba peek; këël mo rwöpa ge bëët cøøn, jööt marge kaala jööt mar jam dhøk.

¹⁰Kär jöör møt ŋääthu, ni ba ŋääthu jammi mo jootu ka køør kwal. Ni näk jap kwär otïmö ni thööth jïïu, kär cwïnynyu këëllu køørge.

¹¹Jwøk acäänö yie aciel, ni luup moa wïnynya beege luup ariiø mo perge leth, ni beege ni teek ena cer Jwøk,

¹²ni mëër man wø ba jøøl käla baŋe. Kiper ïïni na Wuuö Jwøk, ŋati man nø wø cunnï cunnö ki køør tïïe moe.