Read anuak Dut Pwøc 65 Bible Online

Dut Pwøc 65 - anuak bible

Dut Pwøc 65

¹Manøgø beeye duut Deebit. Wui Jwøk, jiy wø bëëdö ni ge pwøya ïïni Dhayan,[4] ni ö gïïa kööŋge ki ge ni cïpge ge jïrï.

²Ïïni ni wø wïny lam, dhaanhø bäre ööa baŋï.

³Raay atïmö ni manynya man böötge waani, 'ba ïïni gïïa bacwa awëënnï.

⁴Gwïëth en jï ŋat wø jierï ni wø kälï buutï kiper nee bëëde kar bëëtö marï. Wa puta jäŋö ki japa beyø na en yi ødï, ni beeye kar bëëtö marï na en kur keere.

⁵Wui Jwøk, ï na dïkunyi marwa, lam marwa wø løgï løø jïwa ki køør adïëri marï, ki køør tïïe moï ni wø rëëm ec. Beeye ïïni ni wø ŋääth jø bäät pinyi bëët, këël moa en kwör mo bäyö løø näpa døøŋŋø løøga.

⁶Beeye ïïni na cwääc kïte ki teek marï, niï nyootha teek marï.

⁷Beeye ïïni ni wø jook lwör mar näpa døøŋŋø, ni wø jook athage moge, ni nigebäc; këël okiera mar jiy wø joogï jooø.

⁸Jiy mo wø bëëdö kwör mo bäyö, ge lwäyö ki nyuuthe moï moa näk rëëma ec. Jø wø bëëdö jï løø kur tuul-cäŋ ki jï løø kur pänh-cäŋ, geno tïïyï niï pwøcge ni döötge ena maal.

⁹Piny wø liimï liimø ni jääŋŋï køth, ni tïïyï ŋøøm ni beyø ni jammi ciek yie. Näm moï wø pääŋï pääŋö ki pïï; ni cïpï caammi jï jiy, moa näk iï nø jiiŋŋø kiperge.

¹⁰Kwöra näk opuurö wø jwøyï jwøø, ni päärï wïth ŋøøm ni röömi, ni døøŋï gø ki køth ni tïme ni jööm, ni gwïëthï gïï wø tuy yie.

¹¹Ki yi cwiir cooth ï wø cïpö ki caammi mo beyø mo wø ciek, ni ö orööge ni päŋge ki caammi ni tïmge ni ge øya piny jöö jaak.

¹²Pwöla otuy ki luum mo pulli, ni tïm thuuri ni mïërö ni ec met ki ge.

¹³Ni tïm pwöla ni päŋ ki dïëk, ni røm gøli bëët ki beel, ni ö jiyi ni kwöŋge ni ge wär ki dudi ni yïthge met.