Read anuak Dut Pwøc 66 Bible Online

Dut Pwøc 66 - anuak bible

Dut Pwøc 66

¹Manøgø beeye duut Deebit. U ni en bäät piny bäre, pwøyu Jwøk ni döötu ena maal ni mïn yïthu.

²Wärru ki dudi nou jiema nyeŋŋe, ni cïpu pwøc jïre ni wøørru eni.

³Caannu jï Jwøk, ni «Tïïe moï rëëma yïth jiy. Ki køør teek marï na dwøŋ døc, nyïïmän moï dëëtge atïmö ni kwanynyi nyïmï.

⁴Jø bäät piny bëët ï wøørge wøørø, ni wärge ki dut pwøc jïrï, ni ge pwøya nyeŋŋï.»

⁵Ööu ni neennu gïïa tïïc Jwøki, ni beege tïïe mo rëëma ec moa tïïe dï jiy.

⁶Naama dwøŋ apääŋŋe ki dï gø, ni dööŋe no otal, ni put jiyi ŋut løøga ki piny jaak. Kiper manøgønø, beerra man mïn yïthø ki eni.

⁷Eni bëëdö na wïth jiy na bäre bäre ki køør teek mare, ni nyeŋŋe ena bäät wïth juurre; 'ba ennø, kär dee jø ageem mo tïŋa wïthge maal bääte.

⁸Dïbwör bäre, pwøyu Jwøk marø, nee pwøc man wø pwøyu eni ki gø wïnynyi.

⁹Bee eni ni wø gwøk øøni nøø bëëdö ni ø kwøw, ni bee eni ni wø ba wëëk tietø ceec.

¹⁰Wui Jwøk, waana päärï, kaawat man wø twøn gwel-bïrö kany wø leenyi, nee mana beer joot.

¹¹Waana kïthï kar twöc, ni kïthï bäätwa ki tëër mo peek.

¹²Jiy awëëgï wääth bäätwa, ni cørwa dï maac ni cääthwa yïth pïï; 'ba waana kälï wøk ni cïbï wa kar bëëtö mo beer.

¹³Aani, a ööa yi øtø marï naa käädö ko olämme mo wø waaŋ bäre, ni cïba gïïa kööŋa ki ge jïrï,

¹⁴ni beege moa näk yaa caanø ki dhaa kanya ena yïth gïï mo leth.

¹⁵Lääy moa no olør ocïba jïrï no olämme mo wø waaŋ bäre, mo noo waaŋi, jïrö puta nitul, ni beege nyöök rööm, ki rwädhe, ki nyöök atëëe.

¹⁶U wø lwäär Jwøk bëët, ööu, wïnynyu gïn, kiper nee gïna tïïc Jwøki jïra caana jïïu.

¹⁷Aana jwöŋö dëëre, ni pwøa eni ki dhaa.

¹⁸Doo na raay 'moa poot bëëdö ni yaa maa cwïnya, Wuuö Jwøk lam mara bäŋa dee wïnynyö;

¹⁹'ba ka adïëri møn, Jwøk kwac mara awïnynye, ni leŋ dwøra kanya läma.

²⁰Pwøc en jï Jwøk, eni na kär kwier man wïny lam mara, ni käre mëër mare ni wø ba jøøl paanyø bääta.