Read anuak Dut Pwøc 68 Bible Online

Dut Pwøc 68 - anuak bible

Dut Pwøc 68

¹Beerra man ö Jwøki maal, ni keeth nyïïmänne, ni ö jø wø män ki eni ni bwøkge nyïme.

²Wui Jwøk, keeth geni kaawat man wø ö jame wø keeth jïrö. Beerra man räny jøøa reyø nyïmï, kaawat man wø ö gage wø leenyi maaci.

³'Ba beerra man ö jøøa bëëtö marge beer ni mïn yïthge, ni kanyge nyïm Jwøk, ni bëëtge ni met ec marge okadhø.

⁴Wärru jï Jwøk, ni pwøyu nyeŋŋe ki dudi; wärru jïre ni döötu ena maal, eni ni wø cäädhi ki bäät pøøl, ni kanynyu nyïme, eni na Wuuö Jwøk.

⁵Jwøk ni wø bëëdö kar bëëtö mare na en kur keere bee eni na wää kïïe, ni bee eni ni wø gwøk määr thuunhnhi.

⁶Jwøk dhaanhø mo owii kur keere wø di mooø ki paac. Jø twöc wø käle wøk ni mooc geni ki bëëtö mo beer; 'ba jø ageem bëëdö yi ŋöömö mo raac.

⁷Wui Jwøk, Jwø Icriel, kanya bwödhï nyïm jiyï, niï cäädha dï paap, kanya pïïyï bäät Kïn Caynay, piny ajïtö ki dïjäŋ piny, ni ö køthi ni pädhe.

⁹Wui Jwøk, køth mo dwøŋ ajääŋŋï, ni dwøgï ŋøøpï na näk oränynyö karge,

¹⁰ni ö jiy moï ni jïtge ki kar bëëtö. Wui Jwøk, jøøa can amooyï ki køør beer marï.

¹¹Wuuö Jwøk mare acaane, ni put nyïïmänni bwøk; ni ö apoole mo thööth ni køpge dwørøgø ni met enøgø,

¹²ni köge, ni «Nyeye ki jø leny moge abwøk ni reŋge.» Ni ö määnni moa dööŋ paac ni pääŋge jammi moa twier.

¹³Këël na bëët määrögø ni ge bëëdö dhi lwaaga, gena tïmö ni ge mïërö ni ge caala akuuru mo bwöpe orïëbö ki gïn mo ŋwaŋŋi, mo okwöre moe orwødhø ki warkey.

¹⁴'Ba kanya ö Jwøa en teeki cere ni keeth nyeye kaace, bäät Kïn Jaalmön agääbö bäre ki jammi moa dööŋ piny.

¹⁵Kïdi mana teek beeye Kïn Baacan, kïnna näk wïthe thööth.

¹⁶?Aŋø, ï na kïnna wïthe thööth, aperŋø ni räŋï ka agääde en, niï raŋŋa kïnna jier Jwøki na kar bëëtö mare? Adïëri møn, Wuuö Jwøk ki dëëre bëëdö kaace na bäre bäre.

¹⁷Jïëth leny mo Jwøk mo wø tut okwëënyi thööth døc ni ba thum ki kwaan, ni Wuuö Jwøk ena dïge kaawat mana bëëde kar bëëtö mare na en kur keere bäät Kïn Caynay.

¹⁸Ï na Wuuö Jwøk, ïïna aa maal bäät Kïn Dhayan, ni jiy moa no omaaø ri leny pieyï pieyø, ni lwørï gïïa cïp jïrï yïthakic jiy, këël moa cïp jø ageemmi thuwø, ni putï bëëtö kaace.

¹⁹Pwøc en jï Wuuö Jwøk, eni ni wø käär øøni ki yïth nïne bëët, ni bee eni na pïëmi marø.

²⁰Jwøk marø beeye Jwøk mo kunyö, ni bee eni na Wuuö Jwøk ni wø wëëk dhaanhø bødhø cer thøø.

²¹'Ba Jwøk wï nyimän mare di gøø ni keethe, këël wï ŋat wø bëëdö ni nøøya raay moe.

²²Wuuö Jwøk aköö, ni «Ge duua duuö ki yi Baacan, ni duua geni ki yïth kudi mo naama dwøŋ,

²³kiper nee tietu lwøgu ki rem nyïïmän mou, ni ö guuwi mou thuwø ni jïtge ki remø mo gatge gadø.»

²⁴Wui Jwøk, thaabuur marï ajoot jiyi, ni beeye thaabuur marï, ï na Jwøk mara, ï na nyeya mara, ni jiy cøøa kar bëëtö marï na en kur keere.

²⁵Jø wø wär, bwödhö nyïm, ni ö jø wø pöödö ki thøme ni enge køørge, ni ö nyïïakugo pöödö ka anëët ni enge lakge.

²⁶Pwøyu Jwøk dï acooŋa mo dwøŋ; pwøyu eni na Wuuö Jwøk, uuni na nyïïkwaac jø Icriel.

²⁷Tuuŋ Benjamen na thiinh nutö kaace ni bwödhö eni; ni kwääri mo jø tuuŋ Juuda ki jiy moge, ki kwääri mo jø tuuŋ Dhebulan ki mo jø tuuŋ Naptali, ge nut kaace thuwø.

²⁸Wui Jwøk, jääŋ teek marï, ni nyoothï teek marï kaawat mana tïïyï kiperwa dïkwøŋ.

²⁹Nyeye oböönh baŋï ki jammi Øt Jwøk marï na dwøŋ na en Jerucalem.

³⁰Jook Ijep ni caal lääy mo bëëdö yïth oböödhi enø, ni joogï nyeye mo wïth juurre ki jiy moge ni wø caal rwädhe ki nyïïrøøe yøø, këël kanyo leeŋge dëëtge piny nyïmï ni cïpge gwet ajwäk; keeth wïth juurre mo wø yïthge met ki leny.

³¹Cuumme oööi ki Ijep, ni ö Ithiöpia ni laar cere thaaŋ baŋ Jwøk.

³²Uuni na mïëc bäät piny, wärru jï Jwøk; wärru ki dut pwøc jïre, eni na Wuuö Jwøk.

³³Wärru jïre, eni ni wø cäädhi ki maal, ni beeye maal na nut cøøn. Ennø, eni cäänö ni jïre da teek.

³⁴Jiemmu Jwøk kiper teek mare, eni na en ajiemmi mare bäät jø Icriel, na näk teek mare okëët maal.

³⁵Wui Jwøk, ï di lwäärö kar bëëtö marï na en kur keere; eni na Jwø Icriel ki dëëre, teek wø cïbe cïbö jï jiye. Pwøc en jï Jwøk.