Read anuak Dut Pwøc 69 Bible Online

Dut Pwøc 69 - anuak bible

Dut Pwøc 69

¹Manøgø beeye duut Deebit. Wui Jwøk, køny aani, kiper a caala dhaanhø mo pïï onø këët cwaage.

²Aana niŋac yo odhöönh, ni bäŋ kany këëla tiera yie. Aana pïï dï naam kanya päŋ, ni ö naammi ni mwøny aani.

³A bëëdö ni aano ööl naa jwöŋö cooth, ni cwaaga orööy. Ni ö nyeŋŋa ni talge jöö naa raŋŋa jïrï, ï na Jwøk mara.

⁴Jiy mo män ki aani ki gïn mo bäŋ tiere jaak thööth døc, ni kwäänge kaala jïëc wïïa, ni jø wø many aani naa 'näkge jaak beege jiy mo teek; aana wëëkge cool jammi mo kära kwalø.

⁵Wui Jwøk, beeye ï ni ŋäc rääö mara, ni gïïa baya bëët paa okanø ki ïïni.

⁶Wui Wuuö Jwøk, ï na wïth jammi bëët, kär wïth jø wø raŋ jïrï lääi ki køøra; Wui Jwø Icriel, kär nyeŋ jøøa many ïïni ränynyö ki køøra.

⁷Aani, ajøøŋ mana jøøŋ a ki gø, ajïënya kiperï, ni tïm wïïa ni laay døc.

⁸Aana tïmö ni aana jur jï tuuŋwa, ni tïma naa path jï nyïïmera;

⁹kiper mana bëëda ni remø mara otwak kiper øtø marï, ni ö ajøøŋ mar jø wø jøøŋ ïïni ni pänh bääta.

¹⁰Kanya bëëda naa jwöŋö naa wödö ki cam, gïnögø atïmö na ajøøŋ dëëra.

¹¹Kanya røøa keeca dëëra naa abïï kiper pänh cwïny mara, aana tïmö na gïr abuua jïge.

¹²Jø wø pï piny bura wø cäänö ka nyeŋŋa, ni ö jø meerø ni jalge aani ki duut.

¹³'Ba aani, a wø lämö jïrï, ï na Wuuö Jwøk, kany wø näk ma kare ni wø manynyï. Wui Jwøk, wïny lam mara ki køør mëër marï na päl ni wø ba jøøl, ni kønyï aani ki køør adïëri marï.

¹⁴Käl aani wøk ki yo odhöönhi ni ena yie en, naa ba naŋac yie; køny aani ceŋ nyïïmänna, ni kälï aani wøk ki yi naama päŋ.

¹⁵Køny aani naa ba mwøny naammi, ni kønyï aani naa ba käl jwïëe, ni ba wëëgï dhi buur dïïr bääta.

¹⁶Wui Wuuö Jwøk, wïny lam mara ki køør mëër marï na beer ni wø ba jøøl, ni luuï nyïmï baŋa ki køør bäth ec marï na dwøŋ.

¹⁷Kär täärnyïmï kanï ki aani, a na laŋŋø marï, kiper a ena yïth gïï mo leth; beerra man laarï lam mara wïnynyö.

¹⁸Nyänh buuta ni wïïlï aani wøk, naa wïïlï wøk ka ceŋ nyïïmänna.

¹⁹Gïï wø jøøŋ aani ki ge bëët ŋäyï, këël lään wïc mara ki räny nyeŋ mara ŋäyï thuwø, ni nyïïmänna bëët nëënö jïrï.

²⁰Ajøøŋ cwïnya araanynye, ni tïma kaamar dhaanhø mo tuu; ni rääŋa ki dhaanhø mo cwïnye pädhi kipera, 'ba bäŋgø mo yaa joodø, ni rääŋa ki jiy mo cøma cwïnya, 'ba bäŋgø thuwø.

²¹Aana moocge ki gïn mo keec ni beeye cam jïra; Kanya ö riewi na 'näk aani, aana moocge ki køøŋ nyïïjenni mo wac nee maadha.

²²'Ba beerra man tïm cam marge na abïëp mo maga geni, ni tïm bëët-mëër marge ni caala akupa mo duua ränynyö bäätge.

²³Beerra man tïm nyeŋge no onijïïm ni bäŋ gïn nëëni jïge, ni tïm cuu pïth moge ni nhønhnhi na bäre bäre.

²⁴Kïth ajäla marï bäätge, ni ö wëërri marï na dwøŋ døc ni pïïe bäätge.

²⁵Beerra man tïm twïër marge ni ba beet, ni bäŋe dhaanhø mo bëëdö yïth oduŋkaare moge.

²⁶Kiper dhaanhnhï na näk iï pwödö acäŋge caannø, ni ö eni na dëëre mooyï ki gïn mo leth ni cäŋge dëër gø mooyø ki rääm.

²⁷Cäŋ bäät ajäla marge meetø ka ajäla mør; ge kär jïëyï ni marge beer.

²⁸Beerra man gööp nyeŋge wøk yi wëël kwøw; ni ö nyeŋge ni ba göörï kanya aciel ki jøøa beyø.

²⁹'Ba aani, aano caannø naa bëëdö naa rämö; wui Jwøk, beerra man kønyï aani ni gwøgï aani.

³⁰Nyeŋ Jwøk pwøa pwøø ki duut, ni tïŋa nyeŋŋe maal ki køør man wø dwøga met ec jïre.

³¹Ni beeye gïn wø tïïc yi Wuuö Jwøk ni met ni kaala dhieŋ man wø cïp no olämi, wala rwaath mo dwøŋ.

³²Kanyo jooti ya jøøa canni, yïthge omïnni; 'ba uuni ni wø cac Jwøk, beerra man jïtu ki cøm cwïny.

³³Kiper Wuuö Jwøk luum jøøa can di wïnynyö, ni luum jiye moa näk otwöö ba taae.

³⁴Beerra man ö maalli ki piny ni pwøcge eni, ki näpa døøŋŋø këël ki gïï wø bëëdö yïthge bëët.

³⁵Kiper Jwøk jø Dhayan di kønyø, ni cäŋ päänye mo Juuda tïïyö nee geer, ni ö jiyi ni bëëtge kaace ni bëët ŋøøpøgø na moge.

³⁶Ni dööŋ ŋøøpøgø jï nyïïkwaacge, ni ö geni ni wø mëër ki eni ni bëëtge yie.