Read anuak Dut Pwøc 7 Bible Online

Dut Pwøc 7 - anuak bible

Dut Pwøc 7

¹Manøgø beeye duut Deebit. Wui Wuuö Jwøk, ï na Jwøk mara, a bëëdö ni raa yaa kan buutï; gwøk aani ceŋ jø wø cwaat yia ni putï a køny,

²kiper naa ba tïïcge ki gïn mo leth kaawat man wø ö ŋuuwi wø cööt lääy ni di tutö, ni bäŋ ŋat køny läänögø.

³Wui Wuuö Jwøk, ï na Jwøa, ni näk mo da gïn mo raac mo yaa tïïö, ni da gïn mo obøth jïra,

⁴wala aano dwök baŋ nyawatwa ki gïn mo raac, wala a twiera nyïïmänna ki gïn mo bäŋ tiere,

⁵beerra man ö nyïïmänna ni riemge aani ni makge aani, ni gøøge aani piny ni 'näkge aani, ni putge ajiem mara raanynyø na bäre bäre.

⁶Wui Wuuö Jwøk, ö maal ni wëërï; jek riï kiper wëëc nyïïmänna; jek riï, ï na Jwøa, kiper bee ï ni wø ŋøl luup.

⁷Beerra man ö wïth juurre bëët ni cooŋge dëëtge kanya ciel nyïmï, ni bëëdï niï ŋøla luup moge ni ïïna kwäärö marge.

⁸Wuuö Jwøk luup jiy wø di ŋølø na kare. Wui Wuuö Jwøk, ŋøl luumma ki køør bëëtö mara na näk kare, ni ŋølï luumma ki køør bëëtö mara na beer.

⁹Ï na Jwøk mana näk adïëri ni wø raŋ acaac dhaanhø ki gïna en cwïnye, män gïïa reyø ni wø tïïc jø raayi, ni tïïyï jø wø bëëdö ni marge adïëri nee cuŋge ni teek.

¹⁰Jwøk bëëdö ni caala kwöt leny jïra, ni beeye wø piem jøøa näk cwïnyge thïïŋ.

¹¹Jwøk bee eni ni wø ŋøl luup na adïëri, ni bee eni ni wø wëër ki jø raay ki yïth nïne bëët.

¹²Ni näk mo dhaanhø cwïnye ba løøe, Jwøk opëëllö mare di paaø, ni jiiŋ atheerø mare ka atum mare.

¹³Jap wø nääe ki ge ee nø jiiŋŋø, ni dhøk athëëre moe ee tïïö ni wääŋö.

¹⁴Ka adïëri møn, ŋat raay acaare mo reyø piith yi cwïnye, ni duunge ki gïï mo reyø ki tööt.

¹⁵Eni kunyö ki buur mo bäär, ni cäŋ päth yi buura koonye keere.

¹⁶Raaye døøa wïïe keere, ni ö gïïa reyø na tïïe ni døøge wïïe.

¹⁷'Ba aani, Wuuö Jwøk pwøa pwøø ki køør adïëri mare, ni wära ki duut naa pwøya Wuuö Jwøk na dwøŋ ni en maal.