Read anuak Dut Pwøc 71 Bible Online

Dut Pwøc 71 - anuak bible

Dut Pwøc 71

¹Manøgø beeye duut Deebit mana par wï Jwøk ki gø. Wui Wuuö Jwøk, a bëëdö ni raa yaa kan buutï; kär wïïa wëëk lääö na bäre bäre.

²Køny aani ki køør adïëri marï, ni piemï aani. Wïny dwøra ni piemï aani.

³Bëëdï ni ïïna kïn gwøk røk man wø reŋŋa bääte cooth; ni cïpï ki dwøl kiper naa køny, kiper ïïna teek mara, ni ïïna kar gwøk røk mara.

⁴Wui, ï na Jwøk mara, køny aani ceŋ jø raay, ceŋ jø wø tïïö ki gïï mo reyø ni wø bëëdö no ogäy.

⁵Wui Wuuö Jwøk, beeye ï ni wø ŋäädha, ni bee ï na ŋäädha ki mana täga thïnhö.

⁶Bee ï ni wø käär aani ki mana täge ki kanya nywøl aani, ni beeye ïïni na tïïc aani nee lwaarø ki aani. Aani, a bëëdö naa pwøya ïïni cooth.

⁷Aana tïmö ni aana nyuudhi jï jiy mo thööth, 'ba beeye ïïni ni teek ni wø gwøk aani.

⁸Ï pwøa pwøø ki cwïnya bäre, ni bëëda naa jiema ïïni ki yïth nïne bëët.

⁹A kär jarï këël ni bëëda ni aana jaal en, ni ba wiiï aani kur keera këël ni bëëda ni bäŋ teek dëëra en.

¹⁰Kiper nyïïmänna aløny ni ge cäänö kipera, ni ö jø wø many aani naa 'näkge ni tuutge dhøkge,

¹¹ni köge, «Kee ena nø wec Jwøki; reŋŋu køøre ni magu gø, kiper bäŋ ŋat mo piem eni këët.»

¹²Wui Jwøk, kär karï tïïyï ni bäär ki aani; wui, ï na Jwøk mara, laar rwänh kuna kønyï aani.

¹³Beerra man lää wïth nyïïmänna ni dïïr wïthge, ni ö jø wø many tïïö ki gïn mo leth dëëra ni jøøŋ geni ni räny nyeŋge.

¹⁴'Ba aani, a bëëdö naa raŋŋa jïrï cooth, ni ö pwøci man wø pwøa ïïni ki gø ni meet ree.

¹⁵Aani, a bëëdö naa cara gïr adïëri marï, naa cara gïr pïëm man wø piemï jiy ki gø ki yïth nïne bëët, këël na bëëtge ni thööth ni kaala moa ŋääa.

¹⁶Wui Wuuö Jwøk, a tägö ki man caana gïïa tïïyï ki køør teek marï, ni bëëda naa cara gïr adïëri marï keerï.

¹⁷Wui Jwøk, aana tägï ki pwönynyö naa poot thiinh, ni bëëda naa poot køpa gïïa tïïyï na näk rëëma ec këël dïcäŋi en.

¹⁸Wui Jwøk, kär a weyï, këël ni bëëde ni aana jaal ni wïïa da lwaar en, kiper nee gïr teek marï køba jï beenhnhø man ki moo ööi bëët.

¹⁹Wui Jwøk, adïëri marï dwøŋ døc no okëët maal, ïïni na tïïc gïïa døøŋŋø. ?Wui Jwøk, aŋa ni röömi ki ïïni?

²⁰Ïïni na tïïc aani nee gïï mo thööth mo leth pïïcge bääta, aano cäŋï mooyø ki kwøw, ni duuï aani wøk ki dhi bwörö.

²¹Wödö man wøør aani ki gø omeetï, ni cäŋï cwïnya cømmø.

²²'Ba aani, a pöödö ki thoom-othïënhö jïrï, ï na Jwøk mara, naa pwøya ïïni kiper adïëri marï, ni wära ki dut pwøc jïrï ki yi thoom-othïënhö, ï na en kur keere na Jwø Icriel.

²³Aano wär ni yia met ni dwøra ena maal, naa pwøya ïïni, naa wär ka cwïnya bäre kiper mana piemï aani.

²⁴Tïïe moï moa na adïëri ocaana ki yïth nïne bëët, kiper jøøa many gïn mo leth nee tïïcge dëëra wïthge alääö ni räny nyeŋge.