Read anuak Dut Pwøc 72 Bible Online

Dut Pwøc 72 - anuak bible

Dut Pwøc 72

¹Wui Jwøk, nyooth ŋøl marï na beer jï nyeya, ni nyoothï adïëri marï jïre, eni na o nyeya.

²Beerra man ö eni ni ŋøl luup jiyï na adïëri, ni ŋøl luup jiyï moa no ocaannø ki ŋøl mo beer.

³Beerra man jït jiyi ki bëët-mëër, ni ciek ŋøømmi, ni kwär jiyi, ni jït paaci ki bëëtö mo beer.

⁴Beerra man ö nyeya ni ŋun jøøa no ocaannø, ni piem obwöre mo jøøa can, ni raany ŋat wø many man thiel jiy piny.

⁵Beerra man ö jiyi ni lwäärge ïïni këël kanyo poot cäŋŋi ki dwääy ni nut bäät piny, këël mano këët røk beenhnhe bëët moo ööi.

⁶Beerra man tïm ööny nyeya ni caala ööny køth mo jwøya piny, ni tïïc luum ni pulli, ni caala køth mo dwøŋ mo jwøya piny bäre.

⁷Beerra man ö adïëri ni nyaae yïth nïro beede ni ena nyeya, ni ö bëët-mëër ni nyaae këël kanyo poot dwääyi ni nut bäät piny.

⁸Beerra man bëët pinynyi ni ena cere, ni täge ki jï løø kur tuul-cäŋ këël jï løø kur pänh-cäŋ, ni cäŋ tägö ki Naam Upareeti këël cuŋ piny.

⁹Beerra man ö jø wø bëëdö paap ni dwøkge kööthge piny nyïme, ni ö nyïïmänni moe ni këëlge cøŋge yi tør.

¹⁰Beerra man ö nyec Tarcëc ki nyec jø wø bëëdö bäät naama dwøŋ ni cïpge ka ajwäk jïre, ni ö nyec Cïïba ki nyec Ceba ni böönhge baŋe.

¹¹Beerra man ö nyeye bëët ni dwøkge kööthge piny nyïme, ni ö wïth juurre bëët ni tïnyge eni.

¹²Kiper eni ŋata can di piemø kany wø jwöŋe dëëre, këël ŋata no ocaannø ki ŋata näk bäŋ dïkunyi jïre.

¹³Ni cwïnye wø pädhö kiper ŋata jïre bäŋ teek ki ŋata can, ni kwøw geni.

¹⁴Eni jøøgø wø pieme piemø ceŋ jø wø thiel geni piny ki ceŋ jøøa no ogäy, ni bëëde ni per jwïëcge leth jïre.

¹⁵Beerra man bëëde ni eni kwøw cooth, ni ö warkeyi mar Cïïba ni mëëgi eni. Beerra man läm jiyi kipere cooth, ni bëëde ni ge gwïëtha eni ki yïth nïne bëët.

¹⁶Beerra man jït ŋøømmi ki bëëlö mo päl këël wïth kïte, ni ö wïth beelli ni bëëtge ni tuuŋ jame tuuŋŋö kaamar jer bäät Kïn Libaanø, ni nyaac jiyi yïth päänye bëët kaamar luum mo ena yi pwöla.

¹⁷Beerra man bëët nyeŋ nyeya ni ŋäc na bäre bäre, ni wïny nyeŋŋe dï jiy kanyo poode ni cäŋ poot nut ni rieny. Beerra man ö jiyi ni gwïëdhi ki køøre, ni ö wïth juurre bëët ni köge ni eno gwïëdhö.

¹⁸Pwøc en jï Wuuö Jwøk, Jwø Icriel; na näk bee eni keere ni wø tïïc gïï mo rëëma ec.

¹⁹Pwøc en jïre, ni put nyeŋŋe bëëdö no ojiemø na bäre bäre; ni ö ajiemmi mare ni pääŋ piny bäre. Kare møn, enøgønø.

²⁰Man beeye aŋuun dut lam mo Deebit o Jeci.