Read anuak Dut Pwøc 74 Bible Online

Dut Pwøc 74 - anuak bible

Dut Pwøc 74

¹Manøgø beeye duut mar Acaap. ?Wui Jwøk, aperŋø ni putï wa kwier na bäre bäre en? ?Aperŋø ni gootï ki waani na dïëgï en?

²Par wïïï ki jiyï moa piemï cøøn, jøøa wïïlï wøk nee tïmge na jiyï. Par wïïï ki Kïn Dhayan[5] kanya bëëdï yie.

³Ööï ni cäädhï niï raŋŋa øtø marï na näk oränynyö na bäre; nyïïmän gïïa en øtø marï na en kur keere araanyge bëët.

⁴Nyïïmännï akwöŋŋö ki met ec kar ødï kanya wara røømmï yie ki jiyï, ni cwöthge bëëre moge piny na nyuuthe.

⁵Ni tïmge kaamar jiy mo ŋøda jen piny yi lul,

⁶ni ö jenni moa näk otieŋø yi øtø marï ni kaaŋge ge ki lïge ki guduume.

⁷Øtø marï na en kur keere awaaŋge na bäre, ni tïïcge kar bëëtö marï na ŋäc nyeŋŋï yie ni ba waany.

⁸Gena cäänö ki cwïnyge ni köge, ni «Dïïmø geni na bäre bäre.» Ni öge ni waaŋge uut acook Jwøk bëët moa en dï paac bäre.

⁹Nyuuthe moa cïp Jwøki jïwa ba jootwa nidïï, ni tïme ni bäŋ nyikuŋ Jwøk dïwa këët, ni bäŋ dhaanhø dïwa mo ŋäc ruuö mar gïïa leth na tägö.

¹⁰?Wui Wuuö Jwøk, a këël kany mo nyïëdi nø noo bëët nyïïmänni ni buuö? ?Aŋø, ge puta bëëtö ni ge jøøŋŋa ïïni na bäre bäre?

¹¹?Aperŋø ni bëëdï ni cerï na teek iï kut köörï jaak en? Beerra man kerï riï ni raanynyï geni.

¹²'Ba ï na Jwøk, ï bëëdö ni ïïna nyeya mara cøøn, niï wø bëëdö ni marï køny bäät piny bäre.

¹³Ïïni, pï naama dwøŋ apääŋŋï ki teek marï, ni nyathï wïth lääc naama dwøŋ tiet pïï.

¹⁴Ïïni, Lëëwatan, lääna wïthe thööth, anyathï, ni wëëgï gø lääc paap nee camge.

¹⁵Ïïni, jøør ki näm awëëgï kwödö, ni taalï näpa wara bëëdö ni kwödö cooth.

¹⁶Ïïni, waŋcäŋ beeye marï, ni wäär poot na marï thuwø, ni beeye ïïni na cïp cäŋ ki dwääy kwörge.

¹⁷Nyeŋ kee mo bäät piny bëët tïïya ïïni, ni öörö ki cwiir tïïya ïïni thuwø.

¹⁸Wui Wuuö Jwøk, par wïïï ka abuua mar nyïïmän, ka ajøøŋ mar bøøre ni wø taak ïïni.

¹⁹Kär jwïëc jiyï na jägö kaamar akuyi wëëk nyïïmän moge, ni ba bëëdï ki kany mo bäär ni wïïï owïl ki jwïëc jiyï na no ocaarø.

²⁰Cäŋ wïïï caarrø kiper luubö mana tuutï ki waani, kiper kwöra näk muudhö dï paac päŋ ki jiy mo tïïö ki gïï mo reyø.

²¹Kär jøøa näk odïïmö duuö ni wïthge olääö, 'ba beerra man ö jøøa no ocaarø ki moa näk oööl ni pwøcge nyeŋŋï.

²²Wui Jwøk, ö maal ni caanï luummï, ni parï wïïï ki gïn ö bøøre ni bëëtge ni ge jøøŋŋa ïïni cooth en.

²³Kär luup nyïïmännï taagï, kiper dïŋaŋ mar jø wø ö maal bäätï wïnyö cooth.