Read anuak Dut Pwøc 77 Bible Online

Dut Pwøc 77 - anuak bible

Dut Pwøc 77

¹Manøgø beeye duut mar Acaap. A jwöŋö dëër Jwøk kiper køny, ni dwøra yaa tïŋ maal, ni wïny mara.

²Kany wø ena yïth gïï mo leth, a bëëdö naa kwaaya Wuuö Jwøk, ni ki wäär ceŋŋa thaaŋa baŋe naa ba jwöm; 'ba cwïnya adhäthö ki cøm.

³Wïïa apara ki Wuuö Jwøk, ni puta guyö; ni cäda, ni ö bääta ni pädhe.

⁴Nyeŋŋa amäne ki niine, ni ö cwïnya ni pädhe, ni tïm cäänö ni ba løny jïra.

⁵A cädö kiper nïne moa cääŋŋe, këël kiper cwiiri moa no opöödhö cøøn.

⁶Ki wäär bäre a bëëdö naa cädö, ni cäda ki yi cwïnya ni pëënynya dëëra keera;

⁷ni kööa, na «?Aŋø, Wuuö Jwøk ø kwiere kwierø na bäre bäre? ?Eni yie ba mïnni ki øøni këët?

⁸?Mëër mare ni wø ba jøøl rwäänyö na bäre bäre? ?A luumma kööŋe ki gø wiie wiiø na bäre bäre?

⁹?Wïïe wïl ki tïï met ec mare? ?A mëër mare awiile ki wëër?»

¹⁰Ni kööa, ni «Jwøa Dwøŋ ni en Maal teek mare akane ki aani, ni beeye ni bëëda naa kïmmö en.»

¹¹Wui Wuuö Jwøk, wïïa opara ki gïïa tïïyï; ka adïëri møn, wïïa opara ki gïïa näk rëëma ec na tïïyï cøøn.

¹²A cädö kiper gïïa tïïyï bëët, ni cäda kiper tïïe moï na døøŋŋø.

¹³Wui Jwøk, jöör bëëtö marï ena kur keere; ?a Jwøe mane ni dwøŋ ni caal ïïni na Jwøwa?

¹⁴Ïïna Jwø wø tïïö ki gïï mo rëëma ec, ni wø nyooth teek mare dï jiy.

¹⁵Jiyï awïïlï wøk ki teek badï, ni beege nyïïkwaac Jeekap ki nyïïkwaac Jocep.

¹⁶Wui Jwøk, ïïna joot pï naama dwøŋŋi; ïïna joot pï naama dwøŋŋi, ni tïmge ni dhulli ki lwär, ni tïm kudi moe ni wälli.

¹⁷Pøøl apädhö na køth mo dwøŋ, ni ö maalli ni märe, ni ö agaackøthi ni keethge kaamar athëëre.

¹⁸Dwør määc køth marï awïnyö ki ya atuunna, ni ö malø mare ni meeny bäät piny, ni tïm pinynyi ni kwanynyi ni jäŋŋi.

¹⁹Øtjöö marï cøra dï naama dwøŋ, niï cäädhi ka kwöra päŋ, ni kwör tietï ba joot.

²⁰Jiyï abwøthï kaamar pïïth dïëk, ni ge ena cer Modhe ka Aran.