Read anuak Dut Pwøc 80 Bible Online

Dut Pwøc 80 - anuak bible

Dut Pwøc 80

¹Manøgø beeye duut mar Acaap. Wui Jwøk, cek ïthï, ï na dïkwääy mar jø Icriel, ï ni wø bwøth jiyï ma nyïïkwaac Jocep kaamar pïïth dïëk. Rienyï ni nyoothï riï, ïïni ni wø nyooth ajiem nyec marï ki yïthakic nyïïatwiet maal moa cwøl ni kirubëlli.

²Nyooth teek marï jï jiyï ma tuuŋ Ipariem ki tuuŋ Benjamen ki tuuŋ Maneeca, ni ööï ni piemï waani bëët!

³Wui Jwøk, dwøk bëëtö marwa kare, ni wëëgï tac täärnyïmï rieny bäätwa, nee wa jïtwa ki køny.

⁴Wui Wuuö Jwøk, ï na wïth jammi bëët, ?a këël kany mo nyïëdi noo bëëdï ni ïïno gootø, ni lam marwa, wa na jiyï, ba wïnynyï?

⁵Waana tïïyï nee wa jwöŋwa, ni tïm pï nyeŋwa na cam jïwa, ni maathï waani ki pï nyeŋ mo thööth døc.

⁶Waana tïïyï na gïn läär wïth juurre moa en deŋwa, ni ö nyïïmänni mowa ni ŋïërge bäätwa.

⁷Wui Jwøk, ï na wïth jammi bëët, dwøk bëëtö marwa kare, ni wëëgï tac täärnyïmï rieny bäätwa, nee wa jïtwa ki køny.

⁸Omøk[8] apudhï wøk ki yi Ijep, ni tøøï gø yi ŋöömma riemï wïth juurre wøk yie.

⁹Kare apuurï ni jiiŋŋï gø, ni ö lweete ni këët piny døc ni mac piny bäre.

¹⁰Mïëya en bäät kïte atïmö ni ena tier tïpö mare; këël jenni moa døøŋŋø aume.

¹¹Bääte alaak këël mana pïïe bäät naama dwøŋ, jï løø kur pänh-cäŋ, ni ö bääte møga ni pïïcge bäät Naam Upareeti, jï løø kur tuul-cäŋ.

¹²?A ennø, aperŋø nø na nyaaï kal mare piny, ni tïme ni jø wø cur kaace bëët pøna nyïïe en?

¹³Këël kule bëëdö ni raanynya gø, ni bëët lääc paapi ni cama gø.

¹⁴Wui Jwøk, ï na wïth jammi bëët, wa kwaya ïïni, cäŋ täärnyïmï luu baŋwa; räŋŋï ki maal ni raŋï piny, ni neenï jï omøk man,

¹⁵ni beeye omøk mana piithï ki teek badï, na caal wäädï na jierï na marï.

¹⁶Ena waaŋ nyïïmänni ki maac ni ŋøtge gø piny. 'Ba ennø, raany geni ki køør wëër marï.

¹⁷'Ba beerra man bëët cerï bäät jiyï na jierï, na mooyï ki teek niï tïnyge.

¹⁸Køøre nø, wa ba døø ŋäthwa këët. Beerra man cäŋ wa mooyø ki kwøw, nee nyeŋŋï cøørwa.

¹⁹Wui Wuuö Jwøk, ï na wïth jammi bëët, dwøk bëëtö marwa kare, ni wëëgï tac täärnyïmï rieny bäätwa, nee wa jïtwa ki køny.