Read anuak Dut Pwøc 81 Bible Online

Dut Pwøc 81 - anuak bible

Dut Pwøc 81

¹Manøgø beeye duut mar Acaap. Wärru ki dudi ki met ec jï Jwøk na näk teek marø, ni kwöŋŋu ni yïthu met jïre, eni na Jwø Jeekap.

²Jøllu duut døc, ni pwötu odööla ki thøp-othïënhö mo döötge met.

³Tuuŋ wär koothu kany wø päär dwääyi, ni koothu gø kanyo en dwääyi tar, dïcäŋ man wø wøørø na jwøk.

⁴Kiper man beeye ciik kiper jø Icriel, ni beeye mana ŋøl Jwø Jeekapi.

⁵Gïnögø atïïe na ciik kiper jø Icriel kanya tïïc gïn mo leth dëët jø Ijep. 'Ba aani, dwøl mo poot kuua cøøn awïnynya, mo köö,

⁶ni «Tëër akäla wøk bäätu, ni käla u wøk ki yi tïïc mo teek.

⁷Kanya enu yïth gïïa leth, uuna cwötö ni kønya uuni, ni løøa mara jïïu ki yi pöölö mo märö, ni päänynya uuni buut pï Meriba.

⁸«Wui, u na jiya, wïnynyu mara nou köömma. ?Wui, u na jø Icriel, luubö mara owïnynyu gø wäne nø?

⁹Kär dee jwøk mo path mo bëëdö yïthakiyu, ni bäŋe jwø jur mo wøørru.

¹⁰Beeye aani na Wuuö Jwøk na Jwøk maru na käl uuni wøk ki yi ŋööm Ijep. 'Ba ennø, ŋaammu dhøgu nou caama.

¹¹«'Ba jiya ma jø Icriel dwøra kärge wïnynyö; gena kweer ki luumma.

¹²Køøre gena wiia ki teek wïc marge, nee ge cääthge ki uutjïëthe moa manyge jaak.

¹³«Jiya ma jø Icriel, doo na ge wïnynya mara cøøn, ni dege køøra caadhø,

¹⁴nyïïmänge daa laara dïïm, ni daa jøøa thiel geni piny raanynyø.

¹⁵Ni ö jøøa män ki aani, a na Wuuö Jwøk, ni dege kööthge dwøk piny ki lwär nyïma, ni ö ajäla marge ni put bëëtö bäätge na bäre bäre.

¹⁶'Ba uuni, u na jiya, u daa caamø ki beel ma liil, ni wëëga uuni jäŋö ki maar kïc man wø käl yi kïdi.»