Read anuak Dut Pwøc 83 Bible Online

Dut Pwøc 83 - anuak bible

Dut Pwøc 83

¹Manøgø beeye duut mar Acaap. Wui Jwøk, kärï lïŋö këët, ni ba bëëdï ni ïïno nidut; wui Jwøk, kärï bëëdö jaak!

²Kiper ennø, nyïïmännï atïïö ko okiera, ni tïŋge wïthge maal.

³Ki køør riek waŋ marge, ge cädö ki jöö man raanyge jiyï ki gø, ni tutge ki luup kiper jiyï moa näk iï gwøø.

⁴Ni köge, ni «Ööu nee poge raanynyø, nee bäŋe nyeŋ Icriel mo di cwølø këët.»

⁵Kiper dhøkge adwalge na aciel bëët, ni tutge ki luubö kiperï;

⁶ni jøøgø beege jø Ëdöm ki jø Icmiel, ki jø Möap ki jø Agri,

⁷ki jø Gëbal ki jø Amön ki jø Amalëk, ki jø Pilitin ki jø wø bëëdö Tayar;

⁸këël jø Aciria thuwø adwätö ki geni, ni tïmge na køny mo dwøŋ jï nyïïkwaac Løøt.[9]

⁹Ennø, tïïc teeŋ gïna tïïyï dëët jø Midien dëëtge, ni tïïyï gø kaawat mana tïïyï dëër Cicara ki Jabin bäät naam Kicön,

¹⁰jøøa raanynyi Endör, na tïmö kaamar wëëyö mo oker piny.

¹¹Tïïc kwääri moge ni caala Orëëp ki Dhëëp, ni tïïyï nyeye moge ni caala Jeeba ki Jalmuuna,

¹²jøøa köö, ni «Kälø ŋöömma näk mar Jwøk, nee tïme na marø.»

¹³Wui, ï na Jwøk mara, tïïc geni kaamar tør mo käära apwøyaweerø, ni tïïyï geni kaamar lethø mo kwør jame kwørø.

¹⁴Thöör geni kaawat man wø ö maaci wø thöör paap, kaawat man wø ö maaci wø waaŋ bäät kïte.

¹⁵Riem geni ka atuunna marï mano jääŋŋï bäätge, ni døøyï geni mo lwäär ki jamø marï na teek.

¹⁶Wui Wuuö Jwøk, lää wïthge, kiper niï cacge.

¹⁷Beerra man lää wïthge ni lwäcge na bäre bäre, ni dwøk wïthge piny ni ränyge.

¹⁸Beerra man ŋäcge gø ni beeye ï keerï, ï na Wuuö Jwøk, na näk Jwøa Dwøŋ ni en Maal bäät piny bäre.