Read anuak Dut Pwøc 84 Bible Online

Dut Pwøc 84 - anuak bible

Dut Pwøc 84

¹Manøgø beeye duut mar Acaap. Wui Wuuö Jwøk, ï na wïth jammi bëët, yia met ki kar bëëtö marï!

²Cwïnya lääŋŋa gø døc ki man cøøa yi kal marï, naa kwöŋŋö ki met ec ki cwïnya bäre jïrï, ï na Jwøa kwøw.

³Wui Wuuö Jwøk, ï na wïth jammi bëët, këël adiit thuwø jïtö ki kany gëët yie, ni ö agweeci ni gëën ree ki øtø mo nyööt yi gø mo kare cään ki gïn wø cïp olämme bääte marï, ï na nyeya mara ni nägï Jwøk mara.

⁴Gwïëth en jï jø wø bëëdö ødï, ni ge bëëdö ni ge pwøya ïïni cooth.

⁵Gwïëth en jï jø wø joot teek marge baŋï, jø wø cwïnyge caar ciin bäät Kïn Dhayan.[10]

⁶Kany wø pööth jøøgø ki yie ya agäm Baka na näk otal, kaace wø puta jïtö ki pïï, ni ö køthi ni put kaace mooc ka aguule.

⁷Ni ö teek marge ni cääth nyïme, këël mano joot geni nyïm Jwøk bäät Kïn Dhayan.

⁸Wui Wuuö Jwøk, ï na wïth jammi bëët, wïny lam mara, ni cegï ïthï ki mara, ï na Jwø Jeekap.

⁹Wui Jwøk, neen jï ŋat wø caal kwöt leny marwa, ŋata näk iï jierø na tïïyï nee wïïe thïïmmi ki maaw.

¹⁰Beerra eni jïra ki man bëëda dï kal marï ki dïcäŋ aciel, ni kaala man bëëda kany mør ki nïne ma kuma. Ni theemma man cuŋŋa dhi kal marï, ki man bëëda yïth uudi mo jøøa reyø.

¹¹Wuuö Jwøk caala tac cäŋ, ni caala kwöt leny jï jiye. Wuuö Jwøk cïpö ki met ec ka ajiem; bäŋ gïn mo beer mo mäne ki jøøa marge thïïŋ.

¹²Wui Wuuö Jwøk, ï na wïth jammi bëët, gwïëth en jï ŋat wø bëëdö ni ŋäätha ïïni.