Read anuak Dut Pwøc 88 Bible Online

Dut Pwøc 88 - anuak bible

Dut Pwøc 88

¹Manøgø beeye duut mar wäät Köra. Wui Wuuö Jwøk, Jwø wø piem aani, a bëëdö naa jwöŋö dëërï ki dïcäŋ ki wäär.

²Beerra man wïnynyï lam mara, ni cegï ïthï ko oduuru mara,

³kiper gïïa leth na nø jwøra atïmö ni thööth, ni tïm kar jwïëya ni cään ki ciin kar bëët jwïëc jøøa no othøw.

⁴A caala dhaanhø mo okwaan dëët jøw mo okoony yi bwörö, ni tïma kaamar dhaanhø mo bäŋ teek jïre.

⁵Aana tïmö naa caala dhaanhø mo owii dï jøøa no othøw, ni tïma naa caala jøøa no onääö na no okoony yi bwörö, na näk ge ba lääŋŋï këët, jøøa näk ïïno pääö ki geni.

⁶A caala dhaanhø mo iï leeŋ yi buur mo bäär mo raac, kanya cøl tiet ŋøøm.

⁷Wëër marï atïmö ni dwøŋ bääta, ni ö athaŋ wëër marï ni muun aani.

⁸Jøøa näk waano ŋïyö ki geni karge atïïyï ni bäär ki aani, ni tïïyï aani na gïn mo yïthge raac ki gø. A caala dhaanhø mo otwöö, ni bäŋ gïn mo løny ki tïïc jïra.

⁹Aana cøør ki køør gïïa leth na pïï dëëra. Wui Wuuö Jwøk, a cøøra ïïni ki yïth nïne bëët, ni ceŋŋa yaa thaaŋø jïrï.

¹⁰?Aŋø, ï poot tïïö këët ki gïï mo rëëma ec jï jøøa no othøw? ?A jwïëc jøøgø ööa maal ni pwøcge ïïni?

¹¹?Aŋø, mëër marï ni wø ba jøøl gïre di caanø yi bwörö? ?A gïr adïëri marï, di købø kar ränynyö?

¹²?Aŋø, gïïa näk mo rëëma ec ni wø tïïyï di ŋääö yi muudhö? ?A beer marï di ŋääö kar wïl wïc?

¹³'Ba aani, a wø bëëdö naa jwöŋö dëërï kiper køny, ï na Wuuö Jwøk, ni lam mara wø pïï baŋï ka aruunnø cooth.

¹⁴?Wui Wuuö Jwøk, aperŋø na kwierï aani, ni kanï täärnyïmï ki aani en?

¹⁵Ki mana täga thïnhö, a bëëdö ni aano caannø ni kara cään ki thøø. Aana ööl døc ki køør gïïa leth na näk duua lwär na jwøra cerï, ni puta ränynyö ki køørge.

¹⁶Wëër marï aliel bääta kaamar maac, ni ö gïïa leth na näk duua lwär na kälï bääta ni raanyge aani.

¹⁷A ege ciel dïër cooth kaamar jwïïö, ni mwønyge aani na bäre bäre.

¹⁸Ŋat wø mëëra ki gø jaak ki ŋat ma nyawatwa karge atïïyï ni bäär ki aani, ni dööŋ muudhö keere ni beeye ŋata näk waano ŋïyö ki gø.