Read anuak Dut Pwøc 89 Bible Online

Dut Pwøc 89 - anuak bible

Dut Pwøc 89

¹Manøgø beeye duut mar wäät Köra mana cak Ëmanni nyï Edhera. Wui Wuuö Jwøk, a bëëdö naa wär ki dudi na bäre bäre kiper mëër marï ni wø ba jøøl, ni caana gïr adïëri marï ki dhaa nee ŋäc beenhnhe bëët.

²Kiper ŋääa ni mëër marï ni wø ba jøøl bëëdö na bäre bäre, ni ö adïëri marï ni bëëde na bäre bäre kaamar maal.

³Wui Wuuö Jwøk, ïïna köö, ni «Aana tudö ki luubö ki ŋata näk yaa jierø, ni beeye dhaanhnha ma Deebit na kööŋa jïre.»

⁴Ni kööï jïre, ni «Tier nyec mar nyïïkwaayï këëlla piny na bäre bäre, ni bëët wälu marï ni nut këël yïth beenhnhe bëët.»

⁵Wui Wuuö Jwøk, ïïno pwøc maalli kiper gïïa näk rëëma ec na tïïyï, ni pwøc ïïni ki køør adïëri marï ya acooŋa mar nyïïatwiet maal.

⁶?Aŋa ni pääri ki Wuuö Jwøk maal, na aŋa ni teek ni röömi ki Wuuö Jwøk dï nyïïatwiet maal?

⁷Jwøk di lwäärö ya acooŋ nyïïatwiet maal; eni di lwäärö døc ni kaala geni, ge na en buute bëët.

⁸?Wui Wuuö Jwøk, ï na wïth jammi bëët, aŋa ni teek ni caal ïïni? Wui Wuuö Jwøk, ï bëëdö ni marï adïëri cooth.

⁹Teek athaŋ naama dwøŋ ena cerï, ni kany wø kwöt athaga mare, joogï jooø, ni cuŋŋe.

¹⁰Ïïni, Reeyap ni beeye Ijep araanynyï, ni raanynyï kaamar gïn mo di nääö, ni keethï nyïïmän moï ki teek badï.

¹¹Maal beeye marï, ni bëët pinynyi na marï thuwø; bäät piny bäre ki gïïa en yie bëët cwääya ïïni.

¹²Wï-piny ki tier-piny cwääya ïïni, ni ö Kïn Tabör ki Kïn Armön ni kwöŋge ki nyeŋŋï ni yïthge met.

¹³Badï bëëdö ni teek, ni teek badï dwøŋ døc.

¹⁴Bura marï cuŋŋa ri bëënynyö ki ŋøl ma kare, ni mëër man wø ba jøøl ka adïëri bwödhö nyïmï.

¹⁵Wui Wuuö Jwøk, gwïëth en jï jø wø ŋäc kwöŋŋö jïrï ki met ec, jø wø cäädhi ni tar marï ena bäätge!

¹⁶Ge bëëdö ni ge kanynyø cooth ki nyeŋŋï, ni tïm kwörge ni døøŋŋø ki køør beer marï.

¹⁷Kiper ajiem marge ki teek marge wø jootge baŋï, ni teek marge wø meeta ïïni ki køør met ec marï.

¹⁸Kiper nyeya marwa ni wø gwøk waani ena cerï, ï na Wuuö Jwøk, ï na Jwø Icriel na en kur keere.

¹⁹Ï na Wuuö Jwøk, dïcäŋ aciel ïïna cäänö ki yïth lääk jï nyïïkuk Jwøk moï moa näk cwïnyge ena køørï, ni kööï, ni «Ŋat leny mo teek mo yaa jierø dï jiy, akønya ni tïŋa gø maal;

²⁰ni beeye dhaanhnha ma Deebit na manynya na jooda, na tïïa nee wïïe thïïmmi ki maaw mara na en kur keere.

²¹Teek mara obëëdö bääte, ni tëënne ki køør teek bada.

²²Bäŋ nyimän mo cwöti ka ajwäk bääte, ni eni ba thiel jøøa reyø piny.

²³Jø wø män ki eni dïïma dïïmö nyïme, ni puta ge raanynyø.

²⁴Adïëri mara ki mëër mara ni wø ba jøøl oen bääte, ni jïte ki teek ki køør nyeŋŋa.

²⁵Teek nyec mare tägö ki bäät naama dwøŋ, ni këët bäät Naam Upareeti.

²⁶Aano cøøre ni kööe, ni ‹Ïïna wära, ni nägï Jwøk mara na teek ni wø piem aani.›

²⁷Eno tïïa na lwiidhø, ni tïme na nyeya mana dwøŋŋa eni bäät piny.

²⁸Mëër mara ni wø ba jøøl otïïa nee bëëde bääte na bäre bäre, ni ö luumma tuutwa ki gø ni bëëde ni ba cuŋ.

²⁹Tier nyec mar nyïïkwaaye këëlla piny na bäre, ni ö wälu mare ni bëëde na bäre bäre kaamar maal.

³⁰«Ni näk mo jøw käl dëëre pwöc 'moa wecge wiiø, ni ba cääthge køør luup ŋøl 'moa,

³¹ni bacge ciik 'moa, ni ba gwøkge luup moa cema geni ki ge,

³²aani, a ööa baŋge ka ajäla mo teek, ni jääla geni ki køør raay moa tïïcge, naa dwøga gïïa bacge wïthge.

³³'Ba mëër mara ni wø ba jøøl ba paanya bääte, ni ba wiia gïna kööŋa kipere.

³⁴A ba gaa wøk ki ri luumma tuuda, ni ba wiila luubö mo yaa nø caan.

³⁵Kiper aano nø kööŋ ri bëëtö mara na en kur keere, naa ba cäänö ki tööt jï Deebit.

³⁶Nyec mar nyïïkwaaye bëëdö na bäre bäre, ni ö wälu mare ni bëëde nyïma na bäre bäre kaamar cäŋ,

³⁷ni put bëëtö na bäre bäre kaamar dwääy na no oŋäädhö na nyuudhi maal.»

³⁸'Ba ï na Wuuö Jwøk, ŋata jierï na tïïyï nee wïïe thïïmmi ki maaw aleeŋï wøk ni kwierï gø, ni tïm wëërri marï ni dwøŋ bääte.

³⁹Luumma tuutï ki dhaanhnhï araanynyï, ni leeŋï aduda mare yi tør.

⁴⁰Kiir mare bäre anyaaï piny, ni raanynyï kwör gwøk røk moe moa teek.

⁴¹Ni ö jø wø pöödhi ki jöö bëët ni twierge jammi moe, ni tïm wïth juurre moa en deŋŋe ni buua eni.

⁴²Jø wø män ki eni awëëgï tëënnö, ni tïïyï nyïïmän moe bëët nee yïthge mïnge.

⁴³Dho opëëllö mare adøøyï mo pööl, ni kärï eni wëëk cuŋŋö ri leny.

⁴⁴Ajiem mare awëëgï ränynyö, ni leeŋï wälu mare yi tør.

⁴⁵Ena laarï wëëk jalø jaak, ni døøyï wïïe mo laay døc.

⁴⁶?Wui Wuuö Jwøk, a këël kany mo nyïëdi nø? ?Aŋø, ï bëëdö ni riï iï kanø na bäre bäre? ?A këël kany mo nyïëdi nø noo bëët wëërri marï ni liel kaamar maac?

⁴⁷Caar wïïï kiper nïr kwøw 'moa moo beeda. ?Aŋø, jiy cwääyï jaak kaper gïn mo bäŋ tiere?

⁴⁸?Aŋø, da ŋat mo bëëdö ni kwøw cooth ni thøø ba joode? ?A da ŋat mo løny jïre ki man käl dëëre wøk cer teek thøø?

⁴⁹?Wui Wuuö Jwøk, age mëër marï ni wø ba jøøl na nut cøøn, na kööŋï ki gø jï Deebit ki køør adïëri marï?

⁵⁰Wui Wuuö Jwøk, caar wïïï ka ajøøŋ mana pïï bääta, a na dhaanhnhï, ki jwør mana jwøra ajøøŋ bäre mar wïth juurre ki yi cwïnya,

⁵¹ni beeye ajøøŋ mana ö nyïïmänni moï na jööŋge ki gø, ni ge jøøŋŋa ŋata jierï na tïïyï nee wïïe thïïmmi ki maaw, ni eni jøøŋge kwör wø cäädhe yïthge bëët.

⁵²Pwøc en jï Wuuö Jwøk na bäre bäre. Kare møn, enøgønø.