Read anuak Dut Pwøc 9 Bible Online

Dut Pwøc 9 - anuak bible

Dut Pwøc 9

¹Manøgø beeye duut Deebit. Wui Wuuö Jwøk, ï pwøa pwøø ki cwïnya bäre, ni caana tïïe moï bëët ni wø rëëm ec.

²Aani yia tïmö ni met døc ni kanynya ki køørï; a wär ki duut naa pwøya ïïni, ï na dwøŋ ni en maal.

³Kany wø nyoothï riï, nyïïmänna wø døøa køørge, ni cwanyge tietge ni thøwge.

⁴Kiper luubö mara na näk adïëri aŋølï na kare, ni ïïno pï bäät wälu niï ŋøla ŋøl ma adïëri.

⁵Wïth juurre ni wø wøør juu møøk ajoogï, ni dïïrï wïthge, ge na jø raay, ni putï nyeŋge rwäänyö na bäre bäre.

⁶Wïth nyïïmän adïïrï na bäre bäre møn, ni nyaaï päänye moge piny, ni put wïci wïlö ki geni na bäre bäre.

⁷'Ba Wuuö Jwøk puta bëëtö bäät wälu na bäre bäre, ni tier wälu mare ee këël piny ni teek kiper ŋøl luup.

⁸Eni luup jø bäät piny di ŋølø na adïëri, ni ŋøl luup jiy ki jöö mo thïïŋ.

⁹Wuuö Jwøk beeye wø cuŋ jøøa no ocaannø dëëre, ni bëëde na kar gwøk røk jïge kany wø näk ri gïï mo leth.

¹⁰Jø wø ŋäc ïïni, ï ŋääthge ŋäädhö; wui Wuuö Jwøk, jø wø many ïïni ba weyï.

¹¹'Ba u na jiy, wärru duut pwøc jï Wuuö Jwøk ni wø bëëdö Dhayan. Beerra man ö gïïa tïïe ni køpu ge jï wïth juurre.

¹²Kiper eni ni wø cool kwör remø cädö kiper jøøa no ocaannø, ni wïïe ba wïl ko oduuru marge.

¹³Wui Wuuö Jwøk, køny aani; raŋ gïïa leth ni wø jwøra ceŋ nyïïmänna, ni kälï aani wøk cer thøø,

¹⁴nee gïï wø pwøc ï ki ge bëët caana jï jø Dhayan, naa bëëda ni yia met ki køør pïëm marï.

¹⁵Wïth juurre apäth yi buura koonyge keerge, ni ö tietge ni magi ya abïëba cekge.

¹⁶Wuuö Jwøk nyeŋŋe ee tïïö nee wïnye ki køør ŋøl mare. 'Ba ŋat raay dëëre ee twöö keere ki gïïa tïïe ki cere.

¹⁷Jø raay, jwïëcge cøøa kar bëët jwïëc jøøa no othøw, këël wïth juurre bëët mo wø bëëdö ni wïthge owïl ki Jwøk.

¹⁸'Ba Jwøk wïïe ba wïl ki ŋat mo can, ni ŋäädhe mar jøøa no ocaannø ba ränynyi na bäre bäre.

¹⁹Wui Wuuö Jwøk, ö maal, kär dhaanhø jïtö ki teek bäätï. Beerra man bëët luum wïth juurre ni ŋøla nyïmï.

²⁰Wui Wuuö Jwøk, døøc wïth juurre mo lwäär, nee ŋäcge ni gena jiy jaak.