Read anuak Dut Pwøc 90 Bible Online

Dut Pwøc 90 - anuak bible

Dut Pwøc 90

¹Manøgø beeye duut mar Ëtan nyï Edhera. Wui Wuuö Jwøk, ï bëëdö na kar bëëtö marwa cøøn ki yïth beenhnhe bëët.

²Kanya poode ni kïte poot kärï cwääö, ni piny thuwø ki gïïa en yie poot kärï tïïö, ï nut cøøn ni ïïna Jwøk, ni bëëdï ni ïïna Jwøk na bäre bäre.

³Jiy wø dwøgï yi ŋöömö, kany wø kööï, ni «Uuni na wäät jiy, døøu yi ŋöömö.»

⁴Kiper ki baŋï, cwiiri ma kuma laara pöödhö kaamar dïcäŋa wääre na pöödhö, ni caala yïth caae mo nøk mo wø koor dhaanhe ki wäär.

⁵Jiy wø laarï ka käl, ni thøwge, ni ge caala luum ni wø tuy ni ba ruu.

⁶Luum këël doo tuy ni ŋøøe ni mïërö, laara närö ni tale.

⁷Kiper waana thum ki thøø ki køør wëër marï, ni ö wëërri marï ni känne ki lwär mo päl bäätwa.

⁸Gïïa bacwa apeedhï nyïmï, ni ö moa tïïcwa ni kuc jiyi ni joodi ki yi tar marï.

⁹Kiper nïr kwøw mowa bëët pöödhö ni wëër marï poot ena bäätwa, ni laar cwiiri mowa thumö kaamar jamø man wø kuuth wøk ki dhøk.

¹⁰Kanymør cwiic kwøw mowa jïtö ki pïërabïriiø, 'ba ni näk dëël poot teek, kanymør pïï ri pïërabära, 'ba gïï wø joot dhaanhe ni wø tööde kiperge yïth cwiiyøgø yøø, duua öölö ki bëëtö mo leth jaak, kiper cwiiri mowa laara pöödhö, ni ö jwïëcwa ni rwäänyge.

¹¹?Aŋa ni ŋäc teek wëër marï, ni lwäär ïïni ka teeŋ mana di wëërri marï lwäärö?

¹²Pwöny waani nee nïr kwøw mowa kwaanwa, nee wa jïtwa ki leec wïc.

¹³?Wui Wuuö Jwøk, a këël kany mo nyïëdi nø noo bëëdï niï wëër ki waani? Dwøk cwïnyï piny ni päth cwïnyï ki gïrwa, wa na laaŋe moï.

¹⁴Kany wø päcwa ka amöölla, wëëk wa jäŋö ki mëër marï ni wø ba jøøl, kiper nee yïthwa mïnge ni kanywa ki yïth nïr kwøw moo beetwa bëët.

¹⁵Tïïc yïthwa ni met ki nïne mo thööth mo röömi ki nïne moa mooyï wa ki rääm yïthge, ni wëëgï yïthwa mïnnö ki cwiiri mo thööth mo röömi ki cwiiri moa jootwa gïïa leth yïthge.

¹⁶Beerra man nyoothï tïïe moï jïwa, wa na laaŋe moï, ni nyoothï ajiemï jï obwöre mowa.

¹⁷Wui Wuuö Jwøk, beerra man ö met iï ni bëëde bäätwa, ni wëëgï gïï wø tïïcwa ki ceŋwa thur karge jïwa. Adïëri møn, jap wø tïïcwa ki ceŋwa, tïïyï nee thurge karge.