Read anuak Dut Pwøc 91 Bible Online

Dut Pwøc 91 - anuak bible

Dut Pwøc 91

¹Manøgø beeye duut mana cak Modhe, dhaanh Jwøk, ni mare lam. Ŋat wø kan ree buut Jwøa Dwøŋ ni en Maal obëëdö tïm Wuuö Jwøk na en teeki jïre.

²A wø cäänö jï Wuuö Jwøk, ni kööa, ni «Bee ï ni wø kana raa buutï, ni bee ï na kar gwøk røk kipera, ni bee ï na Jwøa ni wø ŋäädha.»

³'Ba ï na dhaanh Jwøk, beeye Wuuö Jwøk ni wø käl ïïni wøk ki ya abïëp mo ocek ŋat mørri, ni køny ïïni yi teeŋ täw mo leth mo kännö ki thøø.

⁴Ïïno gwøe tiet bwöpe, ni tïmge na kar kan røk jïrï, ni ö adïëri mare ni tïme ni caala kwöt leny mo gëëŋa ïïni.

⁵Ïïno tïmö niï ba lwäär ki gïï mo di lwäärö ki ge ki wäär, këël tøŋ miï di thöörö ki gø ki dïcäŋ.

⁶Niï ba lwäär ki täw mo tägö dëët jiy ki wäär, këël täw mo leth mo nyaga paac bäre ki dïcäŋ, ï ba lwäyi ki gø.

⁷Këël jiy ma kuma doo thøw buutï, ni ö kume apaar ni thøøge bäät cwïïï, bäŋ gïn mo guta ïïni na bäre.

⁸Ïïno räŋö ki waŋï jaak, ni jootï gïno tïïc dëët jøøa reyø.

⁹'Ba Wuuö Jwøk, Jwøa Dwøŋ ni en Maal, na näk kar kan røk jïra, kiper mana bëëde ni iï nø tïïc na kar bëëtö jïrï,

¹⁰bäŋ gïn mo raac mo pïï bäätï, ni bäŋe gïn mo leth mo ö paarï.

¹¹Kiper nyïïatwiet maal moe oköömme kiperï, nee ï koorge ki uutjïëthe mo wø caathï bëët.

¹²Ïïno jølge maal ki ceŋge, kiper nee tierï ba cwaanyï ri kïdi.

¹³Ïïno cäädhi ni ethï bäät ŋuu ni nyøønï olwierø, këël ŋuu mo dwøŋ wala onyaaŋ onyørï ki tietï jaak.

¹⁴Wuuö Jwøk aköö, ni «Teeŋ ŋatøgø, kiper mana mëëre ki aani, eno käla wøk yi gïna raac, ni gwøa eni kiper mana ŋäc aani.

¹⁵Ni kany wø kwac aani, mare løøa løø jïre, ni bëëda ki eni kany wø näk da gïï mo leth. Eni kønya kønyø ni jiema gøøni.

¹⁶Eni wëëga bëëtö ki cwiiri mo thööth ni mïn yie, ni nyoodha køny mara jïre.»