Read anuak Dut Pwøc 92 Bible Online

Dut Pwøc 92 - anuak bible

Dut Pwøc 92

¹Wui Wuuö Jwøk, beeye gïn mo beer ki man pwøc ïïni, ni beeye gïn mo beer thuwø ki man pwøc nyeŋŋï ki dudi, ï na Jwøa Dwøŋ ni en Maal,

²ni caan gïr mëër marï ni wø ba jøøl ka amöölla cooth, ni køp gïr adïëri marï ki wäär,

³ni wär na duut mo pwöt ka thøp-othïënhö, ki thøme moa näk thøøthge opaarri na näk döötge met.

⁴Kiper ï na Wuuö Jwøk, yia adøøyï mo met ki køør tïïe moï, ni wära ki dudi ni yia met kiper tïïe moa tïïyï ki cerï.

⁵Wui Wuuö Jwøk, tïïe moï døøŋŋø, na acaare moï døøŋŋø døc!

⁶'Ba gïn mo tiere ba kwany ŋat mo bäŋ wïc, mo tiere ba joot bøølli, beeye en:

⁷Jøøa reyø, këël ge doo løth kaamar luum ni kwärge, ge poot ränynyö na bäre bäre;

⁸'ba ï na Wuuö Jwøk, ï puta bëëtö ni karï dwøŋ na bäre bäre.

⁹Ka adïëri møn, ï na Wuuö Jwøk, nyïïmännï ränynyö; nyïïmännï ränynyö na bäre bäre, ni ö jø wø tïïö ki raay bëët ni keethge.

¹⁰'Ba aani, aana mooyï ki teek mo caala teek jööbi; aana wïïrï ki maaw mo nyään.

¹¹Räny nyïïmänna ajooda ki waŋa, ni wïnynya gïr pädhö mar jøøa reyø na ö maal bääta.

¹²Jøøa beyø løth kaamar twöö, ni tïmge ni døøŋŋø kaamar jaath mana dwøŋ na en yi lur Libaanø.

¹³Ge wø piith yi kar Wuuö Jwøk, ni løthge dï kal mare, eni na Jwøk marø.

¹⁴Jøøgø, këël cwiiri moge doo tïmö ni thööth, ge poot bëëdö ni ge kännö ki nyïëdi, ni bëëtge ni ge løth cooth ni ge ba tal;

¹⁵gïïögø nyootha gø ni Wuuö Jwøk mare thïïŋ. Bee eni na teek mara, ni bäŋ gïn lääŋ ri bëëtö mare na bäre bäre.