Read anuak Pwöc Leec Wïc 1 Bible Online

Pwöc Leec Wïc 1 - anuak bible

Pwöc Leec Wïc 1

¹Moi beege pwöc leec wïc mo Cølöman o Deebit nyeny Icriel,

²na caan kiper man ŋäc leec wïc ki pwöc, ki man joot tiet luup.

³Na caan ki man joot pwöc bëëtö mo beer, ki man tïïc mana beer, ka adïëri, ki bäŋ ajeeny.

⁴Na caan ki man cïpge ki riek waŋ jï jøøa näk acaara marge thiinh, ki man cïpge ki kwänynyö jï wøpe, ni ŋäcge gïna beer ki gïna raac.

⁵Beerra man ö ŋata wïïe leerri ni cek ïthe ki geni, ni meet geni bäät mana kwanye, ni ö eni ni wø joot tiet luup ni kwänynye ki pwöc.

⁶Na caan ki man ŋäc pwöc leec wïc ki tiet leere, ki man ŋäc tiet luup jøøa wïthge leer ki luupge moa näk tietge okanø.

⁷Ki man lwäär Wuuö Jwøk beeye täk kwänynyö, 'ba jøøa wïthge känni, ge män ki leec wïc ki pwöc.

⁸Nyie wääda, wïny pwöc wäru, ni ba weyï pwöc meru;

⁹kiper ge tïmö ni caala adun ajiem mo ena wïïï, ni tïmge ni caala jap mïërö mo ena jedhï.

¹⁰Nyie wääda, ni näk mo jøøa reyø wïïï maaŋge maaŋŋø, kär näk miï jïëy ki marge.

¹¹Ni näk mo ge köö, ni «Waa cøø, nøø møørø piny øtjöö, nøø nääø ki jiy mo bäŋ gïn mo ege baaø,

¹²ni thöörø geni kaamar gïï mo oløønynyø ni nëënö, ni thumge bëët kaamar jiy mo oci kar bëët jwïëc jøøa no othøw, ni tïmge kaamar jiy mo oci yi bwörö;

¹³ø doo jïtö ki jammi mo thööth mo perge leth, ni pääŋø uudi 'moø ki jap twëër;

¹⁴ööï ni dwätï ki waani; otïmö ni da opïr aciel kiperø bëët;»

¹⁵nyie wääda, kär niï cäädhö ki jöör jøøgø; män tierï ki jöörge.

¹⁶Kiper tietge wø ŋwieya køør gïïa reyø, ni ge wø lääta baŋ køny rem jiy piny.

¹⁷Ki man cek abïëp ni nëënö jï weny, bäŋ gïn mo kønye.

¹⁸'Ba jøøgø, ge wø kønynya rem moge piny keerge, ni ge wø møør piny kaper jwïëy moge keerge.

¹⁹Man beeye gïno tägi dëët jø wø cwïnyge päl ni wø joot jammi ki jöö mo paa adïëri, ni teeŋ bëëtö manøgønø, jwïëc jøøgø käle kälö.

²⁰Leec wïc bëëdö ni cwödö øtjöö, ni dwøre ee tïŋ maal kwör acooŋe;

²¹ni eni wø cwödö yïth agääk jïëthe kwör dïlweel, ni caan mare dhøk kiir, ni kööe,

²²ni «?U na näk acaara maru thiinh, a këël kany mo nyïëdi nø noo bëëdu nou mëër ki bëët thïnh acaara? ?Naa këël kany mo nyïëdi nø noo bëët jø abuua ni yïthge met ka abuua, ni bëët jøøa wïthge känni ni ge kweeyø ki kwänynyö?

²³Doo na mo uuno jïëy ki juuk mara, ka adïëri møn, cwïnya daa käla wøk jïïu, ni daa acaare 'moa wëëk uuni.

²⁴'Ba kiper mana cøøra uuni ni kweeru, ni rwääa ceŋŋa baŋu, ni bäŋe ŋat mo oneen gø,

²⁵ni taagu pwöc 'moa bëët, ni käru juuk mara jïëö,

²⁶aani, a bëëdö naa ŋeethø kanyo enu yïth gïï mo leth, ni bëëda ni mara abuua kanyo pïïc gïï mo lethi bäätu,

²⁷ni beeye gïï mo leth mo raanynya uuni kaamar jwïïö, na gïï mo leth mo køøla uuni kaamar atuunna, na gïï mo duunnö ki rääm ki pänh cwïny dëëtu.

²⁸'Ba kar kaace jøøgø aano cøørge, 'ba bäŋ gïn mo løøa jïge, ni manyge aani døc, 'ba a ba jootge,

²⁹kiper mana bëëtge ni ge män ki kwänynyö, ni kärge jöö man lwäärge Wuuö Jwøk ki gø jierø.

³⁰Geni, pwöc mara kärge jïëö, ni kwierge juuk mara na bäre;

³¹kiper manøgø nø, gïïo duu uutjïëth tïïe moge obelge, ni jäŋge ki gïïo jootge ki køør riek waŋ marge.

³²Kiper jøøa näk acaara marge thiinh geno 'näk gaan wøki marge, ni ö jøøa wïthge känni ni nägi ya ataa marge.

³³'Ba ŋato wïny mara obëëdö no ogwøø, ni bëëde ni yie met ni ba lwäär ki gïï wø leth wø tägi.»