Read anuak Pwöc Leec Wïc 11 Bible Online

Pwöc Leec Wïc 11 - anuak bible

Pwöc Leec Wïc 11

¹Wuuö Jwøk yie raac ki rumi mar møt, 'ba yie wø met ka rumi ma kare.

²Bëët atöör duua lään wïc, 'ba bëët mööl duua leec wïc.

³Bëëtö mo tiir mar jøøa marge thïïŋ beeye ni wø bwøth geni, 'ba jø cwøk wø raany cwøki marge raanynyø.

⁴Jap kwärö dhaanhø ba kønyge cäŋ ajäla, 'ba bëët bëënynyö dhaanhø wø käle wøk cer thøø.

⁵Bëët bëënynyö mar ŋata mare tiir, øtjööre wø døøye mo thïïŋ, 'ba ŋata raac wø pädhö ki køør rääö mare.

⁶Bëët bëënynyö mar jøøa marge thïïŋ beeye ni wø piem geni, 'ba jø cwøk wø pätha ya abïëp ki køør gïï wø en cwïnyge køørge.

⁷Ŋata raac kanyo thøøe, gïïa ŋäädhe puta ränynyö, ni ö gïïa lääŋŋe ni joode joodø ki køør teek mare ni ränyge.

⁸Ŋata mare beer wø käla wøk yïth gïïa leth, ni ö ŋata raaci ni läw yïth gïïögø.

⁹Ŋata raac watge wø di raanynyø ki gïn wø cur dhee, 'ba jøøa beyø wø di piemø ki køør kwänynyö marge.

¹⁰Kany wø bëët jøøa marge beer ni bëëtö marge cäädhö ni beer, jø pääny yïthge wø mïnnö, 'ba kany wø räny jøøa reyø, jiy wø kwöŋŋö ki met ec.

¹¹Pääny nyeŋŋe wø wïnyö ki køør man wø ö jøøa marge thïïŋ ni wø gwïëthge gø, 'ba ränynyö ki køør dhøk jøøa reyø.

¹²Ŋat wø jøøŋ watge beeye ŋat mo ba cädö, 'ba ŋat mo wïïe da acaara wø bëëdö ni lïŋö.

¹³Ŋat wø wïdi jaak ni waya nyeŋ, wø dhäänynya luup mo okanø, 'ba ŋat mo oŋäädhö, luup wø di kanø.

¹⁴Kany mo bäŋ pwöc yie mo beer, bëët jiy ränynyö, 'ba kany mo yie da jiy mo thööth mo pöö, jiy di piemø.

¹⁵Ŋat wø cïp ree yi waŋ luubö mar dhaanhø mør gïï mo leth ojwøre, 'ba ŋat wø ba cïp ree na dïgïti kar dhaanhø mør, bäŋ gïn mo pïï dëëre.

¹⁶Dhaagø mo pänhnha jiy wø jïtö ki wödö, 'ba jøøa wïnni wø joota jap kwärö keerge.

¹⁷Ŋat wø mëër ki jiy tïïya gïn mo beer kiper dëëre, 'ba ŋat kwöri raanynya dëëre keere.

¹⁸Ŋata raac jammi mo wø joode beeye jammi mo kiera wïïe, 'ba ŋat wø piith gïïa beyø wø joota gïna näk kare.

¹⁹Ŋat wø bëëdö ri bëënynyö mana näk adïëri, jïtö ki kwøw, 'ba ŋat wø caath køør raay wø käla thøø bääte keere.

²⁰Wuuö Jwøk yie raac ki jø wø bëën cwøk, 'ba yie wø mïnni ka jø wø caath jöör adïëri.

²¹Ka adïëri møn, ŋata raac bäŋ wø kääŋi ka ajäla, 'ba nyïïkwaac jøøa marge beer di piemø.

²²Dhaagø mo mïërö ni näk mo gïna beer ki gïna raac kuue, caala ogut warkey mo okïth um kul.

²³Gïn wø en cwïny jøøa beyø køøre wø thum na wøp, 'ba aŋuun ŋäädhe mar jøøa reyø beeye ajäla.

²⁴Da dhaanhø mo jape muue muuö jaak, 'ba wø poot jïtö ki mo thööth; ni da dhaanhø mo mäna gïna no orømø ki man cïp gø, 'ba wø poot cännö bääte.

²⁵Dhaanhø mo yie tar bëëtö mare bëënynyö, ni ŋat wø kunynyi di kønyø thuwø.

²⁶Ŋat wø män beel ni ba laar ŋeew, ocien jiyi, 'ba gwïëth oen bäät ŋat wø laar moe dwøk pwödhö.

²⁷Ŋat wø many bëënynyö ki cwïnye bäre, jïtö ki met ec baŋ jiy, 'ba ŋat wø many gïn mo raac, ränynyö pïï bääte.

²⁸Ŋat wø ŋääth jap kwärö moe, pätha yi ränynyö, 'ba ŋata mare beer bëëdö no oløth kaamar jaath.

²⁹Ŋat wø cwöth paare, beeye jamø keere noo dööŋ jïre, ni ö ŋata wïïe känni ni tïme ni bëënna ŋata wïïe leer.

³⁰Nyïëdi mo wø joot jøøa marge beer ki køør tïïe moge, beeye jaath kwøw, ni ŋat mo wïïe leer wø jïtö ki jiy mo thööth.

³¹?Ni näk mo ŋata mare beer di cunnö bäät piny kany, a ŋat raay ki ŋat wø tïïc gïï mo reyø okääŋge nidïï?