Read anuak Pwöc Leec Wïc 13 Bible Online

Pwöc Leec Wïc 13 - anuak bible

Pwöc Leec Wïc 13

¹Nyilaal mo wïïe leer pwöc wänni wø di wïnynyö, 'ba ŋat abuua juuk bäŋ wø wïnynye.

²Dhaanhø wø jïtö ki bëëtö mo beer ki køør luupe ni wø cur dhee, 'ba jø cwøk wø manynya bëët okiera.

³Ŋat wø koor dhee gwøga jwïëy moe, 'ba ŋat wø ŋaam dhee ki gïï mo oballe jaak wø pätha yi ränynyö.

⁴Ŋat leth dëël gïï wø pare ni wø en cwïnye køørge ba joode, 'ba ŋat mo rweenhnhi ri tïïc bëëtö mare bëënynyö.

⁵Ŋata mare beer wø män ki tööt, 'ba ŋata raac wø tïïya jap lään wïc ki jap räny nyeŋ.

⁶Bëënynyö jöör bëëtö mar ŋata mare thïïŋ di koorø, 'ba bëët rääö wø duua ränynyö dëër ŋat raay.

⁷Dhaanhø mør ree wø di cøøgø ni eno kwär, 'ba bäŋ gïrpiny jïre; ni dhaanhø mør ree wø di cøøgø ni eni can, 'ba eno kwär.

⁸Ŋat mo okwär løny ki man cïp jape ni wïïla jwïëye wøk, 'ba ŋata can bäŋ ŋat mo mak gø ki teek.

⁹Jøøa marge beer bëëdö na tar mo kännö ki met ec, 'ba jøøa reyø tïmö ni caala lamba mo cäätha baŋ thøø.

¹⁰Bëët koorrø wø duua lenye keerge, 'ba leec wïc wø ena baŋ jø wø jïëc pwöc.

¹¹Jap kwärö mo laar ka joot wø laara ränynyö, 'ba ŋat wø joot jap kwärö ki køør tïïc mare, nyaay jïre.

¹²Gïn mo oŋäädhö ni ruue, duunnö ki pänh cwïny, 'ba gïn mo olääŋŋö mo othur kare tïmö na jaath kwøw.

¹³Ŋat wø taak pwöc, pïïn pwöc ena bääte, 'ba ŋat wø lwäär ki ciik di cunnö ki gïn mo beer.

¹⁴Pwöc mar ŋat mo wïïe leer beeye jøøro mar kwøw, ni dhaanhø wø paanyge paanyø ki dha abïëp thøø.

¹⁵Acaara mo beer duunnö ki pwøc, 'ba jöör bëëtö mar jø cwøk duua ränynyö.

¹⁶Ŋat mo waŋe riek wø tïïö ka køør kwänynyö, 'ba ŋat mo wïïe känni wø nyøtha bøøl mare.

¹⁷Ŋat mo raac, noo jääŋŋi, pätha yïth gïï mo reyø, 'ba ŋat mo oŋäädhö wø duua køny.

¹⁸Ŋat wø taak pwöc, bëët can ki lään wïc ööa bääte, 'ba ŋat wø jïëc juuk wø jïtö ki wödö.

¹⁹Gïn mo olääŋŋö mo othur kare wø duunnö ki met ec jï dhaanhø, 'ba jøøa wïthge känni yïthge wø raac ki wec gïïa reyø.

²⁰Ŋat wø cäädhi ki jøøa wïthge leer, wïïe tïmö ni leer, 'ba nyawat jøøa wïthge känni wø joota gïï mo reyø.

²¹Gïï mo reyø wø løpa køør jø raay, 'ba jøøa marge beer wø di cunnö ki gïï mo beyø.

²²Dhaanhø mo beer wø wëëö ki gïï wø dööŋ jï nyïïkwaaye, 'ba jammi mo jø raay wø dööŋ jï jøøa marge beer.

²³Dhaanhø mo can, këël pwöthe doo ciek ki cam mo päl, caammi moe wø poot di camø ki køør bäŋ ŋøl luup ma adïëri.

²⁴Ŋat mo weya acwäät ki wääde, män ki gø, 'ba ŋat wø mëër ki wääde wø pöö ni ba jøøm.

²⁵Ŋata mare beer caammi mo orømø wø dagø jïre, 'ba ŋata raac wø bëëdö no obup cooth.