Read anuak Pwöc Leec Wïc 14 Bible Online

Pwöc Leec Wïc 14 - anuak bible

Pwöc Leec Wïc 14

¹Dhaagø mo wïïe leer paare wø këëlle piny, 'ba dhaagø mo wïïe känni paare wø di raanynyø ki cere.

²Ŋat wø cäädhi ki jöö mo thïïŋ lwäär ki Wuuö Jwøk, 'ba ŋat wø bëën cwøk, Wuuö Jwøk ee taaø.

³Dhi ŋat mo wïïe känni wø cara luup mo nyootha koorø, 'ba lëëpi mo jøøa wïthge leer wø gwøga geni.

⁴Kany mo bäŋ rwäth puur, yïth odïï bëëdö ni ŋaam, 'ba ki køør teek mar rwaath puur, cam mo päl di joodø.

⁵Ŋat wø lam luubö na adïëri bäŋ wø cäänö ki tööt, 'ba ŋat wø kat luup wø cara tööt.

⁶Ŋat abuua leec wïc wø di manynyø ni ba joode, 'ba joot kwänynyö jööt jï ŋat wø ŋäc tiet luup.

⁷Tïïc karï ni bäär ki ŋat mo wïïe känni, kiper ï ba jïti ki luup kwänynyö dhee.

⁸Leec wï ŋat mo waŋe riek wø nyootha jïëth tïïe moe jïre, 'ba bøølø mar jøøa wïthge känni cøøga geni.

⁹Jøøa wïthge känni raay ege tïïö na gïr kwääk jaak, 'ba yïthakic jøøa marge thïïŋ wø da met ec.

¹⁰Cwïny ŋati man nø wø ŋäya kïmmö mare keere, ni mïn ec mar dhaanhø ba joot dhaanhe mørri bäre.

¹¹Mïëc jøøa reyø ränynyö, 'ba mïëc jøøa marge thïïŋ løth.

¹²Da jöö mo wø nëënö ni mïërö jï dhaanhø, 'ba aŋuunne coonya baŋ thøø.

¹³Dhaanhø løny ki man bëëde ni ŋeethø jaak, 'ba cwïnye løny ki man bëëde no opädhö, ni ö aŋuun met eci mare ni näk kïmmö.

¹⁴Ŋat mo cwïnye odøø cään ojäŋ ki jap uutjïëth tïïe moe na reyø, ni ö ŋata beerri ni jääŋe ki jap tïïe moe na beyø.

¹⁵Ŋat ma acaara mare thiinh jammi bëët wø di jïëö, 'ba ŋat mo waŋe riek kany wø ci yie wø di caarø.

¹⁶Ŋat mo wïïe leer wø lwäär, ni ree wø di paanyø ki raay, 'ba ŋat mo wïïe känni wø laara päär bäät luubö ni wïïe ba caare.

¹⁷Ŋat mo laara wëër, jammi wø di tïïö ki bäŋ acaara, ni ŋat wø caar tïï gïï mo reyø, jiy män ki gø.

¹⁸Jøøa näk acaara marge thiinh wø joota bëët bøølø, 'ba jøøa nyeŋge reegø, kwänynyö bëëdö na aduda jïge.

¹⁹Jø raay cøŋge okëëlge piny nyïm jøøa beyø, ni ö jøøa reyø ni këëlge cøŋge piny dhøk käälle mo jøøa marge beer.

²⁰Dhaanhø mo can këël watge männö ki gø, 'ba dhaanhø mo okwär, jiy mo thööth wø mëër ki eni.

²¹Ŋat wø taak watge obääyö, 'ba gwïëth en jï ŋat wø nyooth mëër jï jøøa can.

²²?Aŋø, jø wø caar tïï gïï mo reyø, ge patha ogaa wøk? 'Ba jø wø caar tïï gïï mo beyø, mëër ka adïëri wø jootge joodø.

²³Ki ri tïï öölö bäre, da gïn mo di joodø ree, 'ba waac jaak wø bwødha jiy yi can.

²⁴Jap kwärö mo jøøa wïthge leer beeye aduda jïge, 'ba bëët bøølø mar jøøa wïthge känni beeye bøøl møn.

²⁵Ŋat wø lam luubö na adïëri, jwïëy wø di piemø, 'ba ŋat wø car tööt, mare cwøk.

²⁶Ŋat wø lwäär ki Wuuö Jwøk jïre da kare mo teek, no obwöre moe jïge da kar gwøk røk.

²⁷Ki man lwäär Wuuö Jwøk beeye jøøro mar kwøw, ni dhaanhø wø paanye paanyø ki dha abïëp thøø.

²⁸Ajiem nyeya beeye thööth jiy moe, 'ba ni näk bäŋ jiy beeye ränynyö mare.

²⁹Ŋat wø ba laar wëër, wïïe da acaara mo dwøŋ, 'ba ŋat wø laar wëër tïŋa bøøl mare maal.

³⁰Bëëtö ni cwïny beer jaak duunnö ki jööt dëël, 'ba keec cwïny, jööt dëël di raanynyø.

³¹Ŋat wø tïïc gïn mo raac dëër dhaanhø mo can, janynya Jwøk na cwääc ŋatøgø, 'ba ŋat wø nyooth mëër jï ŋata can wøøra Jwøk na cwääc ŋatøgø.

³²Ŋata raac wø ränynyö ki køør tïïe moe na reyø, 'ba ŋata mare beer kanyo thøøe, da kare mo di ŋäädhö mo cøøa yie.

³³Leec wïc wø bëëdö cwïny ŋat wø ŋäc tiet luup, 'ba kare kuc ki baŋ jøøa wïthge känni.

³⁴Bëët bëënynyö nyeŋ paac wø tïŋe maal, 'ba raay wø duua räny nyeŋ bäät paac.

³⁵Pwøc mar nyeya wø ena jï ŋat tïïc mo wïïe leer, 'ba wëër mare wø ena bäät ŋat wø tïïc gïï lään wïc.