Read anuak Pwöc Leec Wïc 15 Bible Online

Pwöc Leec Wïc 15 - anuak bible

Pwöc Leec Wïc 15

¹Løk luubö mëëth ni beer wëër wø di paanyø, 'ba luup mo leth wø dhäya wëër.

²Lëëpi mo jøøa wïthge leer, beeny kwänynyö wø di ŋääö ki køørge, 'ba dhøk jøøa wïthge känni wø gwäära luup bøøl wøk.

³Waŋ Wuuö Jwøk ena bäät piny bäre, ni eni neeta moa reyø ki moa beyø bëët.

⁴Leep mo duua køny beeye jaath kwøw, 'ba leep mo wella luup, cwïny dhaanhø wø wëëge pädhö.

⁵Ŋat mo wïïe känni, pwöc wänni wø di kwierø, 'ba ŋat wø wïny juuk waŋe riek.

⁶Jap kwärö mo thööth wø joota yi øt ŋata mare beer, 'ba jammi mo wø joot ŋata raaci duua bëëtö mo leth dëëre.

⁷Lëëpi mo jøøa wïthge leer wø nyaaya kwänynyö, 'ba jøøa näk wïthge känni, manøgø ba tïïcge.

⁸Wuuö Jwøk yie raac ko olämme mo jøøa reyø, 'ba yie wø mïnni ka lam mar jøøa marge thïïŋ.

⁹Wuuö Jwøk yie raac ki jöör bëëtö mar jøøa reyø, 'ba eni wø mëër ka ŋat wø løp køør bëënynyö.

¹⁰Pwöc mo leth oen bäät ŋat wø kwier jöör adïëri, ni ŋat wø män ki juuk, thøw.

¹¹?Ni näk mo kar ränynyö, kar bëët jwïëc jøøa no othøw, nëënö jï Wuuö Jwøk, a cwïny jiy, a ba dee nëënö jïre nidïï?

¹²Ŋat abuua ba many man jooi, ni eni bäŋ wø ci baŋ ŋata wïïe leer.

¹³Cwïny mo leer täärnyïm dhaanhø wø døøye mo waany, 'ba cwïny mo kïmmö wø duua pänh cwïny.

¹⁴Ŋat mo wïïe da acaara wø manynya kwänynyö, ba jøøa näk wïthge känni, jap bøølø ege tïïö na cam marge.

¹⁵Cääŋŋe bëët wø bëëdö ni reyø jï ŋata no ocaarø, 'ba cwïny mo leer caala man wø bëëde ni piny da ajwöma cooth.

¹⁶Bëët dhaanhø mo jape nøk mo lwäära Wuuö Jwøk beerra eni ni kaala bëët ŋat mo jap kwärö moe thööth mo duunnö ki kier wïc.

¹⁷Beerra eni ki man cam kat omarø kany mo yie da mëër, ni kaala kany mo camma rïŋö yie mo olør, mo yie da mäne.

¹⁸Ŋat wëëye, pïëm wø di tääö, 'ba ŋat mo ba laar wëër wø mäna pïëm.

¹⁹Jöör ŋat leth dëël caala jöö mo orïëp koodhi, 'ba jöör jøøa marge thïïŋ dwøŋ jaak.

²⁰Nyilaal mo wïïe leer duua met ec jï wänni, 'ba dhaanhø mo wïïe känni, menni wø di taaø.

²¹Bëët bøølø beeye gïr met ec jï ŋat mo ba cädö, 'ba ŋat mo wïïe da acaara wø cäädhi ka jöö mana thïïŋ.

²²Ni näk bäŋ jiy mo cïpi ka acaare, gïï wø caar dhaanhe ba thur karge, 'ba ni näk jø wø cïpi ka acaare thööth, gïïögø thura karge.

²³Løk pïëc ma kare yi dhaanhø wø døøye mo met, ni caan luubö kanya näk ma kare, a teeŋ beer mo nyïëdi!

²⁴Jöör ŋat mo wïïe leer wø cäätha maal baŋ kwøw, ni mäna eni ki man ci kar bëët jwïëc jøøa no othøw.

²⁵Wuuö Jwøk øt ŋat atöör wø nyaae piny, 'ba keew mar pwöth cï thøø wø wëëge bëëtö kare.

²⁶Acaare mo reyø, Wuuö Jwøk yie raac ki ge, 'ba luup mo tøŋ, ec met ki ge.

²⁷Ŋat mo cwïnye päl ni wø joot jammi ki jöö mo paa adïëri wø kïtha paare yi ränynyö, 'ba ŋat wø män ki jammi mo wø cïp ki piny, eni bëëdö ni kwøw.

²⁸Ŋat mo mare beer wø kwøŋa cädö bäät luubö man wø løøe, 'ba dhi ŋata raac wø gwäära gïï mo reyø wøk.

²⁹Wuuö Jwøk kare bäär ki jø raay, 'ba eni lam mar jøøa marge beer wø di wïnynyö.

³⁰Räŋŋö ki waŋ mo beer, cwïny wø døøye mo met, ni ö luubö mo nyään mo met ni cïpe ki jööt dëël.

³¹Ŋat wø wïny juuk man wø duunni ki kwøw wø bëëdö dï jøøa wïthge leer.

³²Ŋat wø taak pwöc raanynya dëëre keere, 'ba ŋat wø wïny juuk wø jïtö ka acaara.

³³Ki man lwäär Wuuö Jwøk duunnö ki pwöc leec wïc, ni dhaanhø mo mwöl jïtö ki wödö.