Read anuak Pwöc Leec Wïc 2 Bible Online

Pwöc Leec Wïc 2 - anuak bible

Pwöc Leec Wïc 2

¹Nyie wääda, ni näk mo luupa wïnynyï wïnynyö, ni kanï ciik 'moa cwïnyï,

²ni luuï ïthï baŋ pwöc leec wïc, ni cïbï cwïnyï køør ŋäc tiet luup,

³ni jwöŋï kiper nee tiet luup jootï, ni dwørï iï tïŋ maal kiper ŋäc tiet luup,

⁴ni manynyï gø kaawat man wø many gwel-bïrö, ni cayï gø kaawat man wø cac jammi mo perge leth mo okanø,

⁵ïïni, tier lwär ki Wuuö Jwøk otïmö ni ŋäyï, ni jootï leec wï Jwøk.

⁶Kiper Wuuö Jwøk beeye ni wø cïp leec wïc, ni luup kwänynyö ki ŋäc tiet luup wø ö wøk ka dhee.

⁷Eni pwöc leec wïc wø meede meedø jï jøøa marge thiiŋ, ni bëëde na kwöt leny jï jøøa marge tiir.

⁸Eni jöör jø wø many adïëri wø di koorø, ni gwøk jöör jiye moa cwïnyge en køøre.

⁹Ïïni, tïïc gïn mo beer, ka adïëri, ki bäŋ ajeeny, ki many uutjïëthe moa beyø otïmö ni ŋäyï.

¹⁰Kiper leec wïc oci cwïnyï, ni tïm yiï ni met ki kwänynyö.

¹¹Ŋäc gïn mo beer ki gïn mo raac ïïno koore, ni ö ŋäc tiet luupi ni gwøkge ïïni,

¹²ni käl ïïni wøk ki yïth uutjïëth jøøa reyø, ki ceŋ jø wø wel luup,

¹³jø wø wec jööra thïïŋ nee cääthge jöör muudhö,

¹⁴jø wø yïthge mïnni ki tïïc gïï wø reyø, ni wø yïthge met ki jøøa reyø ni wø wel luup,

¹⁵jøøa näk uutjïëth tïïe moge oköömmö, ni wø caath jöör luup cwøk.

¹⁶Leec wïc ïïno wëëk bødhø cer dhaagø ma kääbi, mo leebe pøøth,

¹⁷dhaaŋ wø kwier omëëc thïnhö mare, ni wø taak luumma tuude nyïm Wuuö Jwøk.

¹⁸Kiper eni ki paare bäre løøya baŋ thøø, ni uutjïëth tïïe moe cäätha baŋ thøø.

¹⁹Jiy mo ci baŋ dhaaŋŋøgø ba døø karge këët, ni bäŋgø mo pïï jöör kwøw.

²⁰'Ba ïïni, ï doo cäädhö ki jöör jøøa beyø, ni këëllï wïïï jöör jøøa näk marge adïëri.

²¹Kiper jøøa marge thïïŋ obëëdö wïth ŋøøm, ni ö geni na bëëtö marge tiir ni dööŋge yie.

²²'Ba jøøa reyø wïthge odïdi wïth ŋøøm, ni ö dïcuunne ni cöödi wøk yïth ŋøøm.