Read anuak Pwöc Leec Wïc 28 Bible Online

Pwöc Leec Wïc 28 - anuak bible

Pwöc Leec Wïc 28

¹Ŋat raay wø böö jaak ni bäŋ ŋat mo oŋwiec køøre, 'ba ŋata mare beer cwïnye da cer ni caala ŋuu.

²Kany wø bëët paaci ki bëëtö mo raac, kwääri mo tïïö ka ageeme wø tïmö ni thööth, 'ba paac mo käära ŋat mo cädö ni wïïe leer ruu ki kany mo bäär.

³Dhaanhø mo can man wø caar ŋata can, caala køth man wø raany caammi.

⁴Jø wø wec ciik Jwøk wø bëëdö ni pwøya jøøa reyø, 'ba jø wø gwøk ciik wø pïëmö ki jøøa reyø.

⁵Jøøa reyø tier ŋøl ma adïëri bäŋ wø ci cwïnyge, 'ba jø wø many Wuuö Jwøk tier gø wø cøøa cwïnyge bäre.

⁶Beerra eni ki man bëët dhaanhe ni can mo caatha jöö mo thïïŋ, ni kaala ŋat mo okwär mo caatha jöö mo oköömmö.

⁷Nyilaal man wø gwøk ciik Jwøk, gïna beer ki gïna raac ŋääe, 'ba nyilaal man wø cäädhi ki jø wärö wø duua lään wïc jï wänni.

⁸Ŋat wø wëëk jape mac nee cool ni da wïthge wø cooŋa geni nee dööŋge jï ŋat wø nyooth mëër jï jøøa can.

⁹Ŋat wø løø ïthe wøk ki man ba wïny ciik Jwøk, këël lam mare kiree tïmö na gïn mo yi Jwøk raac ki gø.

¹⁰Ŋat wø bwøth jøøa marge thïïŋ nee gaage wøk jöör raay, pätha yi buur mare keere; 'ba jø wø bëëtö marge thïïŋ, gïn mo beer odööŋ jïge.

¹¹Ŋat mo okwär wø cädö ni wïïe leer ki jïre, 'ba ŋat mo can mo wïïe da acaara, gïïa en cwïny ŋatøgø di joodø.

¹²Kany wø tïm paaci ni ena ceŋ jøøa beyø, wø da ajiem mo päl, 'ba kany wø ö jøøa reyø maal, jiy rege wø kaange kaannø.

¹³Ŋat wø kaan bääyö mare ba bëënynyi, 'ba ŋat wø køp raay moe ni wec geni, mëëy Jwøk di joodø.

¹⁴Gwïëth en bäät ŋat wø bëëdö ni lwäära Wuuö Jwøk cooth, 'ba ŋat wø døøc cwïnye mo teek pätha yïth gïï mo leth.

¹⁵Ŋat mo raac mo bëëdö na kwäärö bäät jøøa can caala ŋuu man wø ŋäri, ni caal odïëk mo owär.

¹⁶Kwäärö man wø caar jiy, wïïe bäŋ acaara, 'ba ŋat wø kwier jammi mo joot ki jöö mo patha adïëri wø døøya nïr kwøw moe mo thööth.

¹⁷Ŋat mo dëëre da kwör dhaanhø mo rem gø ee køny piny bëëdö ni bëënna böö këël aŋuun thøø mare; eni, kär dee ŋat køny gø.

¹⁸Ŋat wø bëëdö ni caatha jöö mo thïïŋ di piemø, 'ba ŋat wø bëëdö ni caatha jöö mo oköömmö laara päth yi ränynyö.

¹⁹Ŋat wø puur ŋöömö mare jïtö ki cam mo päl, 'ba ŋat wø løp køør gïï mo oballe jaak wø joota bëët can mo dwøŋ døc.

²⁰Ŋat mo oŋäädhö okwär ki gwïëth, 'ba ŋat wø jalli døc nee laar kwärö ba kääŋi ka ajäla.

²¹Ki man nyooth bëët ajeeny paa gïn mo beer, 'ba dhaanhø wø poot jëënyö kiper nyi thääŋ møø mana cïp jïre.

²²Ŋat mo cere teek wø jalli døc nee laar kwärö, 'ba bëët can mano ö bääte kuue.

²³Ŋat wø jook dhaanhø jïtö ki pwøc yi nyïme ni kaala ŋat wø tøøt luup ki dhee.

²⁴Ŋat wø kwal jap wänni ki menni, ni kööe, ni «Man patha bääyö,» ena wat ŋat wø räänyö.

²⁵Ŋat mo cwïnye päl, pïëm wø di tääö, 'ba ŋat wø bëëdö ni ŋäätha Wuuö Jwøk, bëëtö mare bëënynyö.

²⁶Ŋat wø bëëdö ni ŋäätha acaara mare keere, ena bøøl, 'ba ŋat wø cäädhi ki køør leec wïc di piemø.

²⁷Ŋat wø cïpi jï jøøa can ba cänni, 'ba ŋat wø mec waŋe jïtö ka acëënne mo thööth.

²⁸Kany wø ö jøøa reyø maal, jiy rege wø kaange kaannø, 'ba kany wø ränyge, jøøa marge beer tïmö ni thööth.