Read anuak Pwöc Leec Wïc 3 Bible Online

Pwöc Leec Wïc 3 - anuak bible

Pwöc Leec Wïc 3

¹Nyie wääda, kär wïïï wïl ki pwöc 'moa, 'ba beerra man kïthï ciik 'moa cwïnyï;

²kiper nïr kwøw moï meetge meedø, ni cïpge jïrï ki bëët bëënynyö.

³Mëër man wø ba jøøl ka adïëri kär lwäänhnhï; twöö geni jedhï, ni göörï ge piny yi cwïnyï.

⁴Køøre ïïno jïti ki pwøc ki nyeŋ mo beer nyïm Jwøk ki nyïm jiy.

⁵Bëëdï niï ŋäätha Wuuö Jwøk ki cwïnyï bäre, ni ba bëëdï niï ŋäätha acaara marï keerï.

⁶Bëëdï niï ŋäya eni ki yïth uutjïëth tïïe moï bëët, køøre eni uutjïëth tïïe moï odøøc mo thïïŋ.

⁷Kär niï cädö ni leerra wïïï keerï ki jïrï; lwäär Wuuö Jwøk, ni luuï riï niï kwiera gïïa reyø.

⁸Bëëtö manøgø ïïno mooe ki jööt dëël, ni wëëk cuu moï tëënnö.

⁹Jiem Wuuö Jwøk ki jap kwärö moï, ki thwöth caammi moï bëët mo wø kwøŋ ciek;

¹⁰køøre odïï moï obëëdö ni päŋ ki caammi mo thööth ni bëët dääk nyööbö moï ni päŋ ki kwøk nyïïomøki.

¹¹Nyie wääda, kär pwöc Wuuö Jwøk taagï, ni ba gootï ki juuk mare,

¹²kiper Wuuö Jwøk wø jooga jø wø mëëre ki geni, kaawat man wø ö wuuö wø jook wääde man wø mëëre ki gø.

¹³Gwïëth en jï ŋat wø joot leec wïc, ŋat wø ŋäc tiet luup;

¹⁴kiper gïn wø duu leec wïci beerra eni ni kaala man wø duu gwet-bïrö, ni beerra eni ni kaala man wø duu warkeyi.

¹⁵Eni pere leth døc ni kaala tiik jëëthi, ni ba maar päärö ki jammi mo wø en cwïnyï køørge bëët.

¹⁶Ruut kwøw mo thööth wø joota baŋe, ni bëët kwärö ki wödö wø joota baŋe.

¹⁷Uutjïëthe moe beege ni wø cïpi ki met ec, ni uutjïëthe moe bëët beege ni wø duunni ki bëët bëënynyö.

¹⁸Ena jaath kwøw jï jø wø göök ree, ni jø wø mak gø di gwïëdhö.

¹⁹Wuuö Jwøk piny acwääe ki køør leec wïc, ni cïp maal kare ki køør acaara mare.

²⁰Ki køør leec wïc mare näm adøøc mo kwödö, ni ö pøølli ni pädhe na køth.

²¹Nyie wääda, leec wïc ki ŋäc gïn mo beer ki gïn mo raac kär lwäänhnhï, ni ba wëëgï ge rwäänyö waŋï.

²²Ge tïmö na jap kwøw jïrï, ni tïmge na jap mïërö jedhï.

²³Køøre ïïno cäädhi ni bäŋ gïn mo tägi dëërï, ni bäŋ gïï cwany tietï.

²⁴Ni kany wø nyaaŋï riï piny, ï ba lwäyï, ni kany wø butï, ï jïtö ki niine mo met.

²⁵Kär niï lwäyö ki gïï wø leth ni wø cwöp røk, ki ränynyö man wø ööi bäät jøøa reyø,

²⁶kiper Wuuö Jwøk obëëdö ni beeye tier ŋäädhe marï, ni koor tietï ki dha abïëp.

²⁷Kär gïn mo beer mänï ki jøøa no orømø ki man cïbi jïge, kany wø näk mo løny jïrï ki man tïïyï gø.

²⁸Ni näk gïnögø nut buutï, kär niï köö jï wadu, ni «Ciï, ïïno duui; ocïba jïrï diøø.»

²⁹Kärï cädö ki man tïïyï gïn mo leth dëër wadu, ŋat wø bëëdö buutï niï ee ŋäädhö.

³⁰Kärï pïëmö ki dhaanhø jaak kiper gïn mo bäŋ tiere, ni näk mo bäŋ gïn mo raac mo ee tïïö dëërï.

³¹Kär per bëët ŋat kwörri keeyï, ni bäŋe øtjööre mo jierï.

³²Kiper Wuuö Jwøk yie raac ki ŋat wø wel luup, 'ba jøøa marge thïïŋ beege ni wø ŋäädhe.

³³Acïëni mar Wuuö Jwøk ena bäät mïëc jøøa reyø, 'ba gwïëth mare ena bäät mïëc jøøa marge beer.

³⁴Eni, jø abuua, marge wø dwøge wïthge, 'ba mëër mare wø nyoodhe nyoodhø jï jøøa mwöl.

³⁵Jøøa wïthge leer wödö oci jïge, 'ba jøøa wïthge känni, geno bëëdö ki lään wïc.