Read anuak Pwöc Leec Wïc 6 Bible Online

Pwöc Leec Wïc 6 - anuak bible

Pwöc Leec Wïc 6

¹Nyie wääda, ni näk mo riï iï cïbö yi waŋ luubö mar dhaanhø mør, ni cïpï riï na dïgïti kar ŋatøce, eni na path,

²ni näk ïïno päth yi luubö ki køør gïna käl dhiï, ni päthï ya abïëp ki køør luup dhiï,

³gïno tïïyï niï käla riï wøk beeye en, kiper mana näk mo ïïno nø päth cer dhaanhø mør: wärï laar cøø ni kwaayï ŋatøce, ni riï iï døøc mo mwöl.

⁴Män nyeŋŋï ki niine, ni ö nyeŋŋï ni ba nigemääw.

⁵Keet riï kaamar röönna mo oreeŋø cer ŋat dwaar, kaamar wenyø mo omäätö cer wää abïëpi.

⁶Wui ï na ŋat leth dëël, ci baŋ ŋiinynyø; ni raŋï jöör tïïc mare, ni lëëny wïïï.

⁷Eni wø bëëdö ni bäŋ kwäärö jïre, wala kwääc lwaak wala dïbwödhi,

⁸'ba eni cam mare wø jiiŋŋe jiiŋŋø ka arïïa, ni cooŋ cam mare piny kany wø tïme na kar kac.

⁹?Wui ï na ŋat leth dëël, a këël kany mo nyïëdi nø noo bëënnï niine? ?Ïïno ööï maal yïth niine wäne?

¹⁰Ï ni wø laar butö ki nyi kany mo thiinh, ni wø laarï närö ki nyi kany mo thiinh, ï ni wø laar thäänhö ki ceŋŋï nee riï jwömï ki nyi kany mo thiinh,

¹¹bëët can ööa bäätï kaamar kuu, ni pïïc ränynyö bäätï kaamar ŋat twëër.

¹²Dhaanhø mo wïïe raac ma ŋat okiera wø wïdö jaak, dhee ki tööt;

¹³eni wø niiŋŋa waŋe, ni mun dhaanhø ki tiere, ni nyuudhe ki lweete;

¹⁴eni wø cädö ki gïï mo reyø ni cwïnye da cwøk, ni ŋeela män cooth.

¹⁵Kiper manøgø nø, gïï mo leth opïï bääte ki kany mo thiinh, ni ö ränynyö ni cwöp dëëre, ni bäŋe gïn køny gø.

¹⁶Da gïï pinyi abïciel mo Wuuö Jwøk män ki ge, ni da bïrietge mo yie raac ki gø døc;

¹⁷beege nyeŋŋi mo raŋa jiy piny, ki leep ma twöt, ki ceŋ mo wø køny rem jøøa beyø piny,

¹⁸ki cwïny man wø cädö ki gïï mo reyø, ki tiel mo wø läät baŋ raay,

¹⁹ki ŋat wø kaat luubö ni wø car tööt, ki ŋat wø ŋeel män yïthakic nyïïmëëe.

²⁰Nyie wääda, gwøk ciik wäru, ni ba lwäänhnhï pwöc meru.

²¹Kan geni cwïnyï cooth, ni twöyï geni jedhï.

²²Kany wø cäädhï, ï bwøthge bwødhø; kany wø butï, ï koorge koorø, ni kany wø päyï, ï pwönyge pwönynyö.

²³Kiper ciik caala lamba, ni ö pwöci ni caal tar, ni ö juuki mo ree da pwöc ni caal jöör kwøw;

²⁴ni koorge ïïni cer dhaagø mo raac, ni beeye dhaagø ma kääbi mo luupe pøøth.

²⁵Kär cwïnyï lämmö ki wøp mare, ni ba tuut ïïni ki waŋe;

²⁶kiper dhaagø ma kääbi ï wëëge can, ni døøï ri cam mo thiinh, ni ö eni na ŋat lugi ni gaam wenynyï.

²⁷?Aŋø, løny jï dhaanhø ki man jøøp maac kööre, na abïïe moe ba waaŋ?

²⁸?A løny ki man cääth dhaanhe bäät cuk, ni tiete ba waaŋ?

²⁹'Ba dhaanhø mo døøa ri cï watge caala manøgø, ni ŋat wø gut teeŋ dhaaŋŋøgø bäŋ wø kääŋi ka ajäla.

³⁰Kuu kany wø kwäte kiper na näk mo obup, eni gïre wø taak jiyi taaø,

³¹'ba ni näk mo eno maaø, eni cudö ki kwöre abïriiø, këël doo naa thööra jap øde bëët.

³²'Ba ŋat wø käl lugi ba cädö, ni eni wø raanynya dëëre keere.

³³ŋwiili ki räny nyeŋ beege noo joode, na ajøøŋ mare ba aay bääte;

³⁴kiper keec cwïny beeye ni wø dhäy wëër mar cø dhaagø, ni ŋato ci baŋ cïïe ba wëënne kanyo cool kwöre.

³⁵Eni ba jïëy ki jap cuut, ni këël jammi doo meedø, cwïnye ba nijwöm.