Read anuak Pwöc Leec Wïc 8 Bible Online

Pwöc Leec Wïc 8 - anuak bible

Pwöc Leec Wïc 8

¹?Aŋø, leec wïc käru wïnynyö ni cwödö? ?Na acaara thuwø, dwøre ee tïŋ maal?

²Eni cwödö ni ena bäät thuur thääŋ jöö, ni eni cuŋŋa yïth agääk jïëthe;

³eni cwödö buut dhøgi mo kiir mar pääny, kwör wø døny jiyi yi kiir ki yïthge, ni kööe,

⁴ni «Wui jiy, a cøøra uuni, ni dwøra yaa luu baŋu.

⁵U na acaara maru thiinh, kwänynyu ki riek waŋ; ni u na wïthu känni, kwänynyu ki leec wïc.

⁶Wïnynyu mara, kiper a cara gïï mo perge leth, ni gïï wø cur leeba beege gïïa näk karge.

⁷Kiper leeba wø cara gïï ma adïëri, ni dhaa män ki gïï mo reyø.

⁸Luup mo wø cur dhaa bëët beege moa beyø, ni bäŋ adøønne ki cwøk rege.

⁹Ge tiir bëët jï jø wø cädö, ni ge thïïŋ jï jø wø joot kwänynyö.

¹⁰Jierru pwöc 'moa ni kaala gwel-bïrö, ni jierru kwänynyö ni kaala warkey mana tøŋ.

¹¹Kiper leec wïc beer ni kaala tii mo perge leth, ni jammi bëët mo wø en cwïnynyi køørge ba pääri ki gø.

¹²Aani na leec wïc, a wø bëëdö na aciel ka riek waŋ, ni ö kwänynyö ki ŋäc gïn mo beer ki gïn mo raac ni bëëtge na 'moa.

¹³Ki man lwäär Wuuö Jwøk beeye ki man mänö ki raay. Aani na leec wïc, a män ki koorø ka atöör, ki bëët jöör raay ki wel luup.

¹⁴Pwöc moa beyø ki leec wïc mana näk kare beege 'moa, ni ŋäc tiet luup ki teek ena baŋa.

¹⁵Nyeye mïëri wø käärge ka køøra, ni ö kwääri ni kälge ciik wøk moa näk adïëri.

¹⁶Dïbwöthe ki jøøa kwörge døøŋŋø, piny wø käärge ka køøra, këël jiy bëët mo wø ŋøl luup na adïëri.

¹⁷A mëër ki jø wø mëër ki aani, ni jø wø many aani ki cwïnyge bäre a wø jootge joodø.

¹⁸Bëët jap kwärö ki wödö ena baŋa, ni ö bëët kwärö manøgø ki bëënynyö ni bëëtge na bäre bäre.

¹⁹Nyïëdi mo wø duu pwöci 'moa beyø ni kaala warkey mana tøŋ, ni gïn wø cïba kaala gwel-bïrö mana tøŋ.

²⁰Aani na leec wïc, a wø cäädha øtjöör bëënynyö, naa ena dï jöör adïëri,

²¹naa cïpö ko olaawi jï jø wø mëër ki aani, ni pääŋa uut kän moge.

²²«Ki mana täge wïlöölö, aani na leec wïc, a bëëdö na mar Wuuö Jwøk, kanya poode dïkwøŋ ni jammi bëët poot käre cwääö.

²³Aani, aana cuume cøøn dïkwøŋ, kanya poode wïlöölö ni piny poot kär cwääö.

²⁴Ni käl a nyïm kanya poode ni poot bäŋ näpa døøŋŋø, kanya poode ni bäŋ jøør mo kwödö ki pïï.

²⁵Kanya poode ni kïte poot kär cwääö, ki kanya poot thuuri, aana käl nyïm;

²⁶ni beeye kanya poode ni piny ki pwöle poot käre cwääö, ki ŋøøm moa en bäät piny.

²⁷Kanya ö eni na cwääc maal, a nutö, këël ki kanya kiiw nyeŋ kee mo näpa døøŋŋø.

²⁸Kanya ö eni na cïp pøøl maal, ki kanya pääŋ näpa døøŋŋø ki pïï,

²⁹ki kanya ö eni na gëëŋ näpa døøŋŋø, nee ciik moe ba kaal pïïyi, ki kanya täk tier piny ki cwääc,

³⁰kar kaace a nut buute, ni aana kwääc tïïc; ni yie wø døøya mo met cooth ki yïth nïne bëët, naa bëëdö naa kanynyø nyïme cooth,

³¹ni yia met ki piny mare bäre, naa kanynyø kiper jiy bëët.

³²«'Ba ennø, obwöre, wïnynyu mara; gwïëth en jï jø wø gwøk uutjïëth tïïe 'moa.

³³Wïnynyu pwöc ni lëëny wïthu; kär nou taaga gø.

³⁴Gwïëth en jï ŋat wø cek ïthe ki mara, ni wø raŋ dhi kal mara ki yïth nïne bëët, ni wø kurö dhi øtø mara.

³⁵Kiper ŋato joot aani, kwøw joode joodø, ni jïte ki met ec baŋ Wuuö Jwøk.

³⁶'Ba ŋato ba joot aani raanynya dëëre keere, ni jø wø män ki aani bëët, mëër ka thøø.»