Read anuak Luup Dïpööy 10 Bible Online

Luup Dïpööy 10 - anuak bible

Luup Dïpööy 10

¹Kaawat man wø thøø lwaŋŋi yi maaw mo ŋwäänynye met ni wø tïïcge maaw bäre ni ŋwääö no okwäk, gïn mo thiinh thuwø mo tïïc ni wïc kär caarø, leec wïc ki wödö raanynye raanynyø bäre.

²Dhaanhø mo wïïe leer, wø bwøth cwïnye baŋ tïïe moa beyø, ni ö dhaanhø mo wïïe bäŋ acaara ni bwødhi ya cwïnye baŋ tïïe moa reyø.

³Dhaanhø mo wïïe bäŋ acaara, këël kany wø cäädhe waŋjöö, ki man näk mo wïïe ba leer put jiyi bëët ka ŋec ni wïïe bäŋ acaara møn.

⁴Ni näk mo kwäärö wëër ki ïïni, cwïnyï kär ränynyö ni daagï riï kar tïïc mana no ocïbö jïrï, kiper cïp cwïny piny gïï mo thööth mo reyø mo doo tïïö wëëge kääŋö.

⁵Aani da gïï mo reyø mo yaa joodø tier cäŋ piny kany, ni beege jap wø reyø ni wø tïïc kwääri.

⁶Jiy mo wïthge bäŋ acaara ge di cuumö kwör mo døøŋŋø; ni ö jiyi moa no okwär ni cïp geni kwör mo otaaø.

⁷Aani laaŋe ajooda ni ge cäädhi ka bäät okwëëc lääy, ni ö kwääri ni jooda ge ni ge cäädhi ka piny ki tietge kaamar laaŋe.

⁸Ŋato koony buur, løny ki man tïme ni pätha eni yie, ni ö ŋato toor kiir nee døny yi gø, ni tïme ni bee eni noo dwøŋ thwölli.

⁹Ŋat wø tøk kïte, eni wø jïtö ki gïn mo leth ki køørge, ni ö ŋat wø kääö ki jenni ni jït dëëre ki gïï mo leth ki køørge.

¹⁰Ni näk mo ley pööl ni dhee kär paa, tïmö ni manynya teek mo dwøŋ man ŋudö ki gø. 'Ba leec wïc pere leth ki man wëëk tïïc thur kare.

¹¹Ni näk mo thwöl laara käyö ni yie poot kär tïïö ni met,[1] tïmö ni bäŋ gïn mo duue jï ŋata døøc yi gø mo met.

¹²Luup mo wø ö wøk ki dhi dhaanhø mo wïïe leer beege luup mo beyø, 'ba luup mo wø cur leep dhaanhø mo wïïe bäŋ acaara käla ränynyö bääte.

¹³Eni, tägö mar luup moe bëët, bee luup mo bäŋ tietge, ni ö aŋuun luup moe ni putge tïmö ni beeye rääö ki bøøl.

¹⁴'Ba eni na wïïe bäŋ acaara enø, cäänö mare poot kaadhe kaadhø jaak. Bäŋ dhaanhø mo ŋäc gïno tägi yi nyïm, ni bäŋ dhaanhø mo løny jïre ki man cään gø ki gïno tägi køør thøø mar gø.

¹⁵Tïïc mar ŋat mo wïïe bäŋ acaara kännö ki öölö bääte, këël mano tïme ni ba løny jïre ki man ŋäc jöö man ci dï pääny.

¹⁶Otïmö ni leth jïrï, ï na paana näk nyeya marï bëëdö ka acaac lal, ni wø bwöthe moï møøl ri cam ka amöölla.

¹⁷'Ba ï na paana näk nyeya marï käla ri tuuŋ nyec, gwïëth en jïrï, ni bee ï ni wø bwöthe moï cämö ka yi caa ma kare, kiper nee jïtge ki teek dëël ni patha man bëënge meerø.

¹⁸Ni näk mo dhaanhø jääk ki man tïïc wï øde, wï øde pätha piny; ni ö bëët jäk mare ni wëëk øtø cwïër.

¹⁹Jiy cam mar ajwöma wø jiiŋge jiiŋŋø kiper met ec, ni ö køøŋe ni tïïc yi dhaanhø ni met. 'Ba gwel beeye wø tïïc teeŋ japøgø bëët.

²⁰'Ba ïïni, kär nyeya cienï, këël ki yïth acaare moï; ni ba cienï ŋat mo okwär kanyo enï kar niine marï; kiper wec maal luup moï juthge judhö ni aacge ki gø, ni ö geni na näk ocwääö ni da bwöm ni waacge luubö marï.