Read anuak Luup Dïpööy 12 Bible Online

Luup Dïpööy 12 - anuak bible

Luup Dïpööy 12

¹Par wïïï ki eni na cwääc ïïni ki yïth nïr thïnhö moï, kanyo poode ni nïra reyø poodi, ni kar cwiiri poot kär cäännö kanyo kööï, ni «Aani yia ba met ki bëëtö man;»

²ni beeye kanyo poode ni cäŋ, ki tar, ki dwääy ki ceer poot kär tïïö ni cøl, ni pøøl maal poot käre cäŋ tïïyö ni cøl køør køth;

³ni beeye dïcäŋo ö jø wø koor uudi noo tïm dëëtge ni kwanynyi, ni jøøa teek cäädhi no ogääŋ, ni jø wø gudö bäät kïte, ge dööŋ ni ge ba tïïö kiper ge nøk, ni jøøo lwïthi ki dha awëërnyeŋ, piny nëëni no onijïïm ki jïge;

⁴ni beeye kanyo ö dhøk uudi moa näk oløø nyeŋ jïëthe noo bëëtge no ocïëgö, ni dööt baabuure mo wø gudö wïnyi ni ena piny, ni jiy laara pää kanyo jwöŋ wenynyi, ni dudi mo wø wär wïnya mëëth.

⁵Maya thuwø, jiy tïmö ni lwäär ki man ethge kwöra en maal, ni ge lwäär ki gïïo reyø noo tägi nyeŋ jïëthe; ni beeye kanyo tïm wïth jenni ni ŋøøk, na aditwie tuta dëëtge ki öölö, ni bäŋ gïr met ec mo many dhaanhe këët. Køøre nø, dhaanhø cøøa kar aŋuun bëëtö mare, ni ö jiyi moo kïmmi ni bëëtge ni ge wïïrö nyeŋ jïëthe jaak.

⁶Par wïïï ki eni na Jwøk kanyo poode ni tiimme mana no otïïö ki gwel-bïrö poot kär cööt, ni dak mana no otïïö ki warkey poot kär keethø; ni gïr twøm pïï man wø en deŋ aguula poot kär nidhey, ni gïn wø käl pïï wøk ki yi iith poot kär ränynyö.

⁷Køøre nø, tør døøa yïth ŋøøm na käl yi gø, ni ö jwïëyi ni døø baŋ Jwøk na cïp gø.

⁸Ni kö dïpööyi, ni «Bëëtö bäŋ tiere, bëëtö bäŋ tiere, ni jammi bëët bäŋ tietge!»

⁹Dïpööy kär ŋuudö ki man bëëde ni leerra wïïe keere, 'ba eni, jiy apwönynye thuwø ki luup leec wïc, ni cäde ni määnye ni jiiŋ pwöc leec wïc mo thööth.

¹⁰Dïpööy amäänyö ni jïte ki luup mo met, ni luup moa gööre beege luup mo tiir na adïëri møn.

¹¹Luup jøøa wïthge leer caala jaath man wø kwør lääc paac ki gø, ni kany wø cooŋ geni caala mucumääre mo ogurö ni teek. Ni luupögø cïpa dïkwääyi mana näk aciel ni beeye Jwøk.

¹²'Ba ï na wääda, beerra man gwøgï riï ki teeŋ luup møøk. Göör ki weeli mo thööth, aŋuunge bäŋgø, ni kwaan teeŋ weeli moøgø dëër dhaanhø di öölö.

¹³'Ba ennø, jammi bëët anø wïnyö, na aŋuun luubö beeye en. Lwäär Jwøk, ni gwøgï ciik moe, kiper manøgø beeye gïna doo tïïc jiyi bëët.

¹⁴Kiper Jwøk jammi bëët kïthe kar ŋøl mare, ni beege jammi bëët moa näk tietge okanø, nee raac wala beer.