Read anuak Luup Dïpööy 2 Bible Online

Luup Dïpööy 2 - anuak bible

Luup Dïpööy 2

¹Aana cädö ki cwïnya naa cäänna raa ni kööa, ni «Neenï, ennø ï päära päärö ki man jïtï ki met ec; beerra man mïn iï nø.» 'Ba ka adïëri møn, acäŋ tïmö na gïn mo bäŋ tiere.

²Ni kööa, ni «Ŋeethø beeye gïr bøølø jaak; ni met ec, ?agïnaŋø noo duue?»

³Aana määnyö døc ki ya acaara mara naa manynya man tïïa yia ni met ki køøŋø, ki man këëla wïïa thuwø ri bëët bäŋ acaara, na acaara mara poot bwøtha aani ki leec wïc, këël mano jooda gïn mo beer mo tïïc jiyi tïïö moi ni bëëdö tier maal piny kany en, ki yïth cwiiri moi ni nøk noo beetge ii.

⁴Aana tïïö ki tïïe mo thööth. Aana gëëdö ki uudi kiper dëëra, ni pïïdha ki jer omøki kiper dëëra;

⁵aana tïïö ka ajïniine ki kwör jwöm røk mo opïïthö ki jenni kiper dëëra, ni piidha teeŋ jenni bëët yïthge mo wø nyïïge cam;

⁶ni tïïa ka aguule mo pïï na mo jwøc pwöth jenni ki ge.

⁷Aana ŋëëö ki laaŋe ma cwøw ki mään, ni jïra da laaŋe møøk mo nywølla paara. Aani thuwø jïra da dïëk ki dhäk mo thööth døc, ni bäŋ dhaanhø mo da japøgø jïre mo kaala aani yi Jerucalem.

⁸Aani, dëëra amäänynya ki gwel-bïrö ki warkey mo päl, ki jap kwär mo nyeye ki mo mïëri. Aani, dëëra amäänynya ki jø wär dudi ma cwøw ki mään, ni käla mään mo thööth paara, ni beeye gïn wø wëëk yïth cwøw mïnnö.

⁹Køøre kara atïmö ni dwøŋ døc naa kaala cuumme bëët moa kwøŋ Jerucalem käärö naa poodi. Naa bëëdö ni leec wïc mara poot nut kare.

¹⁰Jammi bëët moa mïërö ki waŋa, bäŋgø mo yaa kwierø. Aani, bäŋ gïn mo cwïnya okweer ki gø røk jap met ec, kiper cwïnya bëëdö ni met kiper jammi bëët moa tïïa, ni manøgø beeye gïna duu tïïe moa tïïa bëët.

¹¹'Ba kanya neena jammi bëët moa tïïa ki cera, ki tïïc bäre mana ööla ki gø, ka adïëri møn, ajooda ni jammi bëët bäŋ tietge, ni caala man many jamø nee mak, ni bäŋ gïn mo duu jammi moi ni tier cäŋ piny kany en.

¹²Køøre aana tägö ki man cäda kiper leec wïc, ki bøøl, ki bäŋ acaara, ?kiper agïnaŋø noo tïïc ŋato läw kara, a na nyeya, ni näk mo paa gïïa näk onø tïïc dïkwøŋ?

¹³'Ba ajooda ni leec wïc beerra eni ki bäŋ acaara, kaawat man bëëde en ni tar beerra eni ki muudhö.

¹⁴Ŋat mo wïïe leer, jammi nëënö jïre na karge; 'ba ŋat mo wïïe bäŋ acaara, eni cäädha yi muudhö. 'Ba ajooda na aŋuun jøøgø bëët poot na aciel.

¹⁵Køøre aana cädö ki cwïnya ni kööa, ni «Gïn wø tägi dëër ŋat mo wïïe bäŋ acaara poot tägö dëëra thuwø. ?Aŋø, tiere aŋø ni tïm wïïa ni leer døc en?» Ni cääna ki cwïnya ni kööa, ni «Manøgø thuwø poot na gïn mo bäŋ tiere.»

¹⁶Kiper ŋat mo wïïe leer poot caala ŋat mo wïïe bäŋ acaara, ni wïc ba paayi ki geni ki kany mo bäär. Ki yïth nïne bëët moo ööi, wïc wïl ki geni bëët. Kaawat man bëëde en ni ŋat mo wïïe bäŋ acaara thøw, ŋat mo wïïe leer thuwø thøw.

¹⁷Kiper manøgø nø, aana tïmö naa män ki kwøw, kiper jammi bëët mo wø tïïc tier cäŋ piny kany en, duua rääm dëëra; kiper gïïögø bëët bäŋ tietge; caala man many jamø nee mak.

¹⁸Aani, aana männö ki gïïa duu gïïa tïïa bëët tier cäŋ piny kany en, kiper gïïögø dööŋ jï ŋato ööi køøra.

¹⁹'Ba ŋäyi ŋa, kanymør ŋatøgø beeye ŋat mo wïïe leer, wala ŋat mo wïïe bäŋ acaara. 'Ba eni jammi moa tïïa ki leec wïc na ööla kiperge tier cäŋ piny kany en, dööŋ jïre. Manøgø thuwø poot na gïn mo bäŋ tiere.

²⁰Kiper manøgø nø, ŋäädhe mara aŋøla bäät gïïa duu gïïa tïïa bëët tier cäŋ piny kany en.

²¹Kiper dhaanhø jammi tïïe tïïö ki leec wïc, ki kwänynyö, ki riek waŋ. 'Ba gïïögø bëët dööŋ jï ŋat mør mo gïïögø käre tïïö. Manøgø thuwø poot na gïn mo bäŋ tiere ni beeye gïn mo raac døc.

²²?Aŋø, agïnaŋø noo joot dhaanhe røk jammi moa tïïe bëët na ööle kiperge ni wïïe ee kierø tier cäŋ piny kany en?

²³Kiper ki yïth nïne mo dhaanhø bëët tïïc mare beeye rääm ki cooyø; këël ki wäär, ŋedhe bëëdö ni ba jwöm. Manøgø thuwø poot na gïn mo bäŋ tiere.

²⁴Bäŋ gïn mo beerra eni jï dhaanhø ni näk mo paa cam ki maath ki man raŋ tïïc mare na gïn mo beer. Manøgø thuwø ajooda ni beeye gïn mo cer Jwøk ena ree.

²⁵?Kiper aŋa ni løny jïre ki man cäme ni mïn yie ni näk paa Jwøk noo tïïc gø?

²⁶Kiper ŋat mo bëëtö mare beer ki nyïm Jwøk, eni mooe mooø ki leec wïc, ki kwänynyö, ki met ec; 'ba ŋat ma ŋat raay tïïe tïïö nee jïte ki jammi ni cooŋ geni piny nee dööŋge jï ŋata bëëtö mare beer ki nyïm Jwøk. Manøgø thuwø poot na gïn mo bäŋ tiere ni caala man many jamø nee mak.