Read anuak Luup Dïpööy 4 Bible Online

Luup Dïpööy 4 - anuak bible

Luup Dïpööy 4

¹Køøre aana cäŋ nëënnö ni jooda tïïe moa näk mo ocaarø bëët moi ni tïïc tier cäŋ piny kany en. 'Ba ka adïëri møn, jiy moa no ocaarø, pï nyeŋge ajooda, ni ge bëëdö ni bäŋ ŋat mo cøma cwïnyge, ni teek ena ceŋ jøøa caar geni. 'Ba geni, ge na no ocaarø, bäŋ ŋat mo cøma cwïnyge.

²Ni puta jiy moa no othøw pwøc ni beerra marge ki jiy moi ni poot kwøw ii.

³'Ba ki røk gïïögø na ariiø yøø, beerra dhaanhø mo kär nywølø mo jammi moi ni reyø ni temmi tier cäŋ piny kany en käre kam joot.

⁴'Ba ajooda møn ni jammi bëët mo wø tïïc ki öölö ki mo wø tïïc bëët ki køør riek waŋ, ööi ka ri këëyö man wø tägi yïthakic dhaanhø ki wati. Manøgø thuwø poot na gïn mo bäŋ tiere ni caala man many jamø nee mak.

⁵Dhaanhø mo wïïe bäŋ acaara bëëdö jaak ni ceŋŋe ee dwödö, ni eni raanynya dëëre keere.

⁶Beerra joot gïn mo thiinh mo ree da jwöm, ni kaala gïn mo dwøŋ mo joot ka tïïc mo teek mo dëël oöölö ki gø ni wø caal man many jamø nee mak.

⁷Køøre gïn mør mo bäŋ tiere ma acäŋa jootø tier cäŋ piny kany beeye en.

⁸Da dhaanhø mo bëëdö eni keere ni bäŋ wääde ni bäŋ coki. 'Ba eni bëëdö ni dëëre ee öölö ki tïïc mo teek mo bäŋ cuŋŋe. Ni eni bëëdö ni waŋe poot ba jäŋ ki jap kwär, ni dëëre ba pëënynye ki man kööe, na «?Aŋa ni ööla dëëra kipere en, ni bëëda naa tïïya tïïc man ni teek en ni dëëra yaa mänö ki man tïïa yia ni met?» Manøgø thuwø poot na gïn mo bäŋ tiere ni beeye tïïc ma tïï rääm.

⁹Beerra jiy ariiø mo bëëdö na aciel ni kaala dhaanhø aciel mo bëëdö eni keere. Kiper gïno duu tïïci marge ki køør öölö beeye gïn mo beer.

¹⁰Kiper ni näk mo dhaanhø aciel pädhö, dhaanhø maya wati tïŋe maal. 'Ba otïmö ni leth jï ŋat opädhi na eni keere ni bäŋ ŋat mo tïŋ gø maal!

¹¹Maya thuwø, ni näk mo jiy ariiø obutö na aciel, dëëtge tïmö ni mør. ?'Ba dhaanhø aciel ma eni keere, dëëre otïme ni mør nidïï?

¹²Ni näk mo dhaanhø aciel teek ni løny jïre ki man bööt dhaanhø mo bëëdö eni keere, jiy ariiø ba løny ki böötö jïre. Thøøli mo orwöbö na nyeŋ adäk, ba jööt ki man laar cöödö.

¹³Beerra dhaanhø mo poot thiinh mo can mo wïïe leer, ni kaala nyeya ma jaal mo wïïe bäŋ acaara mo ba jïëy ki pwöc mo wø caan jïre.

¹⁴Kiper dhaanhø løny ki man tïme na nyeya, këël mo eni käla øt twöc, wala eni nywöli ni can na o paac.

¹⁵'Ba ajooda ni jiy moi bëët ni bëëdö ni kwøw tier cäŋ piny kany en, ge caatha køør nyilaal manøgø na thiinh enø kanyo läw kar nyeya.

¹⁶Ni jiy bëët mo wø en nyïme ba thum ki kwaan. 'Ba jiy moa lämmö cään yïthge kär met ki ŋata läw kar nyeya. Manøgø thuwø poot na gïn mo bäŋ tiere ni caala man many jamø nee mak.