Read anuak Luup Dïpööy 5 Bible Online

Luup Dïpööy 5 - anuak bible

Luup Dïpööy 5

¹Gwøk riï ki bëëtö marï kany wø ciï yi Øt Jwøk. Wär tïme niï ciï kaper cek ïth døc ni patha man cïpï ko olämme jaak kaawat man wø tïïc jøøa näk wïthge bäŋ acaara; kiper kucge ni gïna tïïcge bee gïn mo raac.

²Kärï laar päth ri cäänö jaak, ni ba läädï ki cwïnyï ki man laarï kööŋ nyïm Jwøk. Kiper Jwøk ena maal niï ena piny. Kiper manøgø nø, beerra man bëëdï niï cara luup mo nøk.

³Kiper cäänö mar dhaanhø mo wïïe bäŋ acaara joot ka køør luupe na thööth, ni caala man wø lägö ki lääk ki køør acaare mo thööth.

⁴Kany wø kööŋï nyïm Jwøk, kärï ruu ki man tïïyï gïna kööŋï kipere. Kiper Jwøk yie ba mïnni ki ŋat mo wïïe bäŋ acaara. Tïïc gïna kööŋï kipere!

⁵Beerra eni ki man ba kööŋï, ki man kööŋï ni gïna kööŋï kipere ba tïïyï.

⁶Kär cäänö marï tïïyï na cäänö mo bwødha ïïni yïth raay, niï ba cäŋï köö nyïm dïlämi mar Wuuö Jwøk, ni «Luumma caana abøth.» ?Aŋø, Jwøk diï wëëga gootø ki luup moï nee gïna tïïyï cäŋ raanynyø?

⁷Kany wø tïm lääki ni thööth, kännö ki luup mo thööth mo bäŋ tietge; kiper manøgø, lwäärï ki Jwøk.

⁸Ni näk miï jïtö ki dhaanhø mo can mo di caarø yi paayø mo ŋøl ma adïëri ki bëëtö ma kare orwäänyö yie, kär cwïnyï thäŋŋö kanyo jootï gø; kiper kwäärö man nø da kwäärö mør bääte mo raŋŋa gø, ni kwääri moøgø thuwø poot da kwääri møøk bäätge mo raŋŋa ge.

⁹Gïï wø joot ki ri ŋøøm wø cøøa jï jiy bëët, 'ba beeye nyeya døc ni wø køny dëëre ki jap wø puur yi ŋöömö mare.

¹⁰Ŋat wø mëër ki gwel wø bëëdö ni ba jäŋ ki gwel, ni ŋat wø mëër ki jap kwärö wø bëëdö ni eni ba rømi ki jap kwärö moa joode. 'Ba manøgø thuwø poot na gïn mo bäŋ tiere.

¹¹Kany wø näk mo jap kwärö othöönhnhö, jø wø cam geni thuwø ge thöönhnhö. ?'Ba agïnaŋø noo kønye jï wëëk japøge ni näk mo patha man neetge ge ki nyeŋge jaak?

¹²Dhaanhø mo tïïö ki tïïc mo teek wø butö ki niine mo beer, këël eni cama gïn mo thiinh wala gïn mo dwøŋ. 'Ba ŋat mo okwär, mo jïre da jammi mo thööth, nyeŋŋe ba gämmi.

¹³'Ba gïn mo raac døc mo yaa joodø tier cäŋ piny kany bee en. Ŋat wø many kwärö ni wø cooŋ jammi mo thööth wø cäŋa ränynyö ki køørge.

¹⁴'Ba kanyo räny jap kwärö moøgø ki køør gïn mør mo tägö jaak, ŋata no okwär ni näk mo da wääde tïmö ni bäŋ gïn mo dööŋ jï wääde këët mo køny ree ki gø.

¹⁵Eni no okwär enø, kaa mana ö wøk ki yi menni ni bäŋ abïï dëëre, puta døø kaa mana ööe. Eni døøk ni bäŋ gïn mo kwöge këët ri japa tïïe ki öölö mare.

¹⁶'Ba manøgø beeye gïn mo raac døc thuwø. Kaawat mana ö eni na nywøli ni bäŋ gïrpiny jïre, eni poot thøw thuwø na ennø nø. ?Aŋø, agïnaŋø noo duue nø ki man ö dhaanhe ni ööl ree jaak ki tïïc en, ni caala man many jamø nee mak?

¹⁷Teeŋ ŋatøgø nø, ki yïth nïr kwøw moe bëët eni bëëdö ni ena yi muudhö ni kïmmö døc, ni täwö ni cooyø.

¹⁸'Ba ennø, mana jooda ni beerra eni bee en. Dhaanhø doo cämö, ni mädhe, ni mïn yie ki køør japa tïïe bëët ki öölö mare tier cäŋ piny kany ki yïth nïr kwøw moe moi ni nøk no ocïp Jwøki jïre en; kiper manøgø beeye mana cïp jïre na kure.

¹⁹Maya thuwø, kaawat man bëëde en ni Jwøk ŋati man nø ee mooø ki jap kwär ki jammi mo beyø, eni thuwø dhaanhø ee mooø ki teek bäät japøge ki man cäm dhaanhe rege na kure, ni jïte ki met ec ki køør öölö mare; ni manøgø beeye muuy mana cïp Jwøki.

²⁰Kiper mana ö Jwøki na koor dhaanhø ki man bëët dhaanhe ni cwïnye met, dhaanhø atïmö ni ba cädö kiper nïr kwøw moe.