Read anuak Luup Dïpööy 7 Bible Online

Luup Dïpööy 7 - anuak bible

Luup Dïpööy 7

¹Beerra wïny nyeŋ mo beer ni kaala maar riia mo ŋwäänynye met. Ni beerra dïcäŋ thøø mar dhaanhø ni kaala dïcäŋ man wø nywøl dhaanhø yie.

²Beerra eni ki man lïïmmö paac mo yie da thøø ni kaala man ci paac mo yie da ajwöma, kiper thøø beeye aŋuun dhaanhø; ni jiy moa kwøw gïnögø dege kïtha cwïnyge.

³Beerra pänh cwïny ni kaala ŋeethø, kiper kany wø bëët dhaanhø ni täärnyïme cøl ki køør kïmmö mare, løny ki man jïte ka acaara mo beer ki yi cwïnye.

⁴Dhaanhø mo wïïe leer, cwïnye ena paac mo yie da thøø, 'ba jiy mo wïthge bäŋ acaara, cwïnyge ena paac mo jiy bëëdö ni yïthge met jaak.

⁵Beerra man wïny juuk mar dhaanhø mo wïïe leer ni kaala man wïny dudi mo jiy mo wïthge bäŋ acaara.

⁶Kiper ŋeethø mar ŋat mo wïïe bäŋ acaara, caala dööt moonni mo liel tier dak, ni manøgø thuwø poot na gïn mo bäŋ tiere.

⁷'Ba tïïe mo caarø, ŋat mo wïïe leer tïïe tïïö ni wïïe bäŋ acaara, ni ö jammi mo wø cïp ki piny ni raany acaare moa beyø cwïny gø.

⁸Aŋuudi mar luubö beerra eni ni kaala tägö mar luubö. Cïp cwïny piny beerra eni ni kaala atöör.

⁹Kär cwïnyï läädö ki man laarï wëër, kiper wëër bëëdö tier jwöth ŋat mo wïïe bäŋ acaara.

¹⁰Kärï cäänö ni kööï, na «?Aperŋø ni tïme ni beyø nïne moa acääŋŋe ni kaala nïne mo dïcäŋi ii?» Kiper manøgø paa leec wïc ki man pëëny teeŋ pïëc ma enøgønø.

¹¹Leec wïc beer ni caala gïn wø dööŋ jï dhaanhø, ni kunynyö jï jiy moi ni kwøw ii ni wø neen cäŋ.

¹²Kiper leec wïc, dhaanhø di gwøø ni caala man wø ö gwelli wø gwøk dhaanhø. 'Ba gïn wø duu ŋäc jammi ki leec wïc beeye ki man gwøk jwïëc ŋat wø en jï gø.

¹³Caar wïïï ki tïïc mar Jwøk. ?Kiper aŋa ni løny jïre ki man twieny gïn mo ee nø meen?

¹⁴Ki yïth nïne mo wø bëët jammi ni beyø, bëëdï ni iï met. 'Ba ki yïth nïne mo wø bëët jammi ni reyø, cädï ki man näk mo beeye Jwøk na tïïc manøgø ki maya. Kiper manøgø nø, dhaanhø bäŋ gïn mo løny jïre ki man ŋäc gø kiper bëëtö mare mano en nyïm bäre.

¹⁵Ki yi bëëtö mana beeda bäre na näk bäŋ tiere, jammi bëët ajooda. Ajooda ni ŋat mo bëëtö mare beer laara thøø yi bëëtö mare na beer; ni ö ŋat wø tïïö ki raay ni bëëde ki cwiiri mo thööth yïth gïï wø reyø ni wø temme.

¹⁶Kär beer marï kaathï, ni ba kaathï leec wïc marï. ?Aŋø, ï raanynyï riï jaak kiper ŋø?

¹⁷Kär rääö marï kaathï, ni ba bëëdï ni wïïï bäŋ acaara. ?Aŋø, ni layï riï ki man laarï thøø ni paa kar thøø marï en?

¹⁸Beerra man magï luubö mana na aciel, ni ba weyï luubö maya thuwø; kiper ŋat wø lwäär ki Jwøk luup moøgø bëët kwanye kwanyø.

¹⁹Leec wïc cïpö ki teek jï ŋat mo wïïe leer ni kaala teek mar cuumme apaar mo ena yi pääny.

²⁰Ka adïëri møn, bäŋ dhaanhø mo mare adïëri bäät piny kany, mo bëëdö ni tïïya gïn mo beer cooth, ni ba bääyi.

²¹Kär luup mo wø car jiyi lwørï na luup mo perge leth bëët; kanymør ŋat tïïc marï wïnynyï wïnynyö ni janynya ïïni.

²²Kiper ïïni, ŋäyï ki yi cwïnyï ni ki kwöre mo thööth da jiy møøk mo iï janynyø thuwø.

²³'Ba aani, gïïögø bëët araŋa ki køør leec wïc ni kööa, ni «Aano tïmö ni wïïa leer,» 'ba atïmö ni kare bäär ki aani.

²⁴Leec wïc mana nut bëëdö ni kare bäär, ni tiere okan piny døc. ?Aŋø, da ŋat mo joota tier gø?

²⁵Aani, aana cäŋ cädö ki cwïnya ki man kwanya tier leec wïc, naa manynya man ŋääa gø naa caya tiere, nee rääö mar bäŋ acaara ki bøøl nee ŋääa.

²⁶'Ba gïn mør ma ajooda mo di jwørø ni leth døc ni kaala thøø, beeye dhaagø mo cwïnye da acaare mo reyø mo caala abëëbe ka ajääpi, mo ceŋŋe bëëdö ni caala tiimme. Ŋat mo bëëtö mare beer ki nyïm Jwøk bøth cer teeŋ dhaagø manøgø. 'Ba ŋat ma ŋat raay tuude tuudö.

²⁷'Ba Dïpööy aköö, ni «Ka adïëri møn, gïrpiny aciel ajooda kanya dwala jammi bëët na aciel ki man kwanya tier bëëtö marge,

²⁸naa poot bëëdö naa manynya gø këël kar kany ennø, 'ba kära joodø. 'Ba aana jïtö ki dïcwøø aciel keere mo wïïe leer yïthakic jiy ma kuma, 'ba bäŋ dhaagø mo wïïe leer mo yaa joodø dëët jøøgø bëët.

²⁹Ka adïëri møn, gïna jooda keere beeye en. Jwøk jiy acwääe ni cwïnyge waany, 'ba jiy atïmö ni ge manynya tïïe mo thööth mo riek waŋ.»