Read anuak Luup Dïpööy 9 Bible Online

Luup Dïpööy 9 - anuak bible

Luup Dïpööy 9

¹'Ba aani, luup moøgø bëët akïtha cwïnya ni cäda kiper jiy moa bëëtge beyø ki jiy moa wïthge leer, ki man näk mo tïïe moge ena cer Jwøk. 'Ba kuc dhaanhe ki man näk mo beeye mëër wala män ni koor eni yi nyïm.

²Jiy bëët, ge cøøa kanya ciel. Ni beege jøøa bëëtge beyø ki jø wø tïïö ki gïï mo reyø, ki jøøa beyø, ki jøøa waany ki jøøa näk ba waany, ki jø wø cïpi ko olämme, ki jø wø ba cïpi. Kiper gïn wø tägi dëër dhaanhø mo beer poot tägö dëër ŋat raay; ni gïn wø tägi dëër ŋat wø kööŋ nyïm Jwøk poot tägö dëër ŋat wø lwäär ki man kööŋe.

³Gïn wø raac ni wø tägi tier cäŋ piny kany beeye man wø tïm jiyi bëët ni cøra jöörögø na aciel enø. Maya thuwø, cwïny jiy bëëdö ni päŋ ki gïï mo reyø, no okiera bëëdö ni ena cwïnyge ki ri bëëtö marge bäre. 'Ba ya aŋuudi ge poot thøw bëët.

⁴Kiper jø wø bëëdö ni kwøw da ŋäädhe kiperge. Ka adïëri møn, beerra gwök mo kwøw ki ŋuu mo othøw.

⁵Kiper jiy mo kwøw ŋäcge ni ge thøw; 'ba jiy mo othøw bäŋ gïn mo ŋäcge, ni bäŋ gïn mo beer mo jootge, ni wïc ba par ki geni këët.

⁶Mëër marge, ki män marge, ki keec marge, onø aay ki geni ciel; ni bäŋ karge këët na bäre dëët jammi bëët mo wø tägi tier cäŋ piny kany en.

⁷'Ba ennø, ciï ni camï cam marï ki met ec, ni maathï køøŋø marï ni cwïnyï met; kiper Jwøk yie onø mïnnö ki tïïe moï.

⁸Beerra man bëët abïïe moï ni tar cooth ni bëëdï ni wïïï iï wïïrö ki maaw cooth.

⁹Bëëdï ni iï met ki dhaagø marï na mëërï ki gø ki yïth nïr kwøw moï bëët, moi ni bäŋ tietge ii na cïp Jwøki jïrï tier cäŋ piny kany en. Kiper manøgø beeye kuna dööŋ na marï ki yïth nïr kwøw moï, ki køør tïïc marï mana öölï ki gø tier cäŋ piny kany en.

¹⁰Gïn wäro magï ki cerï ki man tïïyï gø put tïïc ki cwïnyï bäre; kiper bäŋ acaare, wala kwänynyö wala leec wïc ki tïïc mo di tïïö këët kar bëët jwïëc jøøa no othøw noo ciï yie.

¹¹Aani, da gïn mør ma acäŋa jootø tier cäŋ piny kany en. Ŋat mo ŋäc ŋwiec da kany ba käädhe ri ŋwïëy, no oteeø da kany ba bööde ri leny, ni ŋat wø wïïe leer da kany ba jïte ki cam, ni ŋat wø waŋe riek da kany ba jïte ki jap kwärö, ni ŋat wø ŋäc jammi da kany ba jïte ki pwøc. 'Ba da kany mo öö ki gum dëël mo tägö kiperge bëët.

¹²Maya thuwø, bäŋ dhaanhø mo gïno tägi dëëre ŋääe. Kaawat man bëëde en ni rëëö di maaø ka ajääp, ni wenyø di maaø ka abïëp, jiy thuwø pätha yïth gïï mo reyø ki kany mo kucge ni cwöba rege jaak.

¹³Aani thuwø da gïn ma ajooda tier cäŋ piny kany ni beeye nyuudhi mar leec wïc mo yia othäŋŋö ki gø døc.

¹⁴Da nyi pääny mo thiinh mo bëëdö jiy mo nøk yie. 'Ba nyeya mo teek døc aöö nee këëde ki jiy moa en yi nyi pääny manøgø, ni cielge gø dïër ni tïïge ki gïn ethge bäät kiir ki gø.

¹⁵'Ba yi nyi päänyögø da dhaanhø mo can mo wïïe leer, ni piem jiy moa en yi nyi päänyögø ki køør leec wïc mare. 'Ba ya aŋuudi, bäŋ dhaanhø mo opar wïïe ki ŋatøgø ni can enø.

¹⁶Køøre aana köö, ni «Beerra leec wïc ni kaala teek mar dhaanhø.» 'Ba leec wïc mar ŋata can ataak ni luup moe kär leŋø.

¹⁷Beerra luup ŋat mo wïïe leer ki man wïnynyi mëëth ni kaala dilweel mar cuumi mo ena dï bøøre.

¹⁸Leec wïc beerra eni ni kaala jap leny. 'Ba ŋat raay aciel keere gïï mo beyø døc di raanynyø.