Read anuak Obeec Dudi 5 Bible Online

Obeec Dudi 5 - anuak bible

Obeec Dudi 5

¹Wui! coka, ni bee ï dhaagø-thiinh mara, aana ö ya ajïniina mara, dwøk 'moa acooŋa, ki jenni 'moa mo wø ŋwääi ni met; aani, ogat kïc ki maar kïc mara acama, ni maadha køøŋ nyïïomøki ki caak 'moa. Wui! nyïïawäätwa, cämu ni mädhu. Wui! omëërri, mädhu ni rømmu.

²'Ba ni aano butö, cwïnya abëëdö ni nëënö. 'Ba dwøl aputa wïnynyö, no omëër mara dööŋö dhi øtø, ni kööe, «Wui coka, nyimëëc cwïnya, na bëëtö mare beer, na mwöl kaamar akuuru, jap dhi øtø jïra. Aani wïïa atïmö ni thec ki thööy, ni tïm jïëc wïïa ni thec ki thööc wäär.»

³'Ba aløøa, ni «Aani, abïï mara yaa nø gööny wøk; ?aŋø, cäŋa ka dwøk dëëra? Aani, tieta yaa nø lwøk; ?aŋø, ge cäŋa ka wëëk cullö?»

⁴'Ba omëër mara cere aput rwää baŋa ki dhi øtø kanya ŋaam, ni put cwïnya tägö ki pärö kipere.

⁵Køøre aana päny maal nee dhi øtø jaba jï omëër mara, ni ceŋŋa onijwöc ki maar riia, ni lweeta thec ki gø, ni put tøøn bäät dïdëët.

⁶'Ba kanya jaba dhi øtø kiper omëër mara, ree ee nø daak ni tøør këët; ni puta bëëtö ni cwïnya pärö ki køør mana cääne ki aani dïkwøŋ. Ni manynya gø døc, ni kära eni joodø, ni cwøla gø, 'ba eni kär duunnö jïra.

⁷'Ba jø koor mo wø kurö ni ge wïdö dï pääny, ni beege jø wø koor kiir, aana jootge ni putge aani pwöt, ni moocge dëëra ki ŋwiili, ni kälge aleeŋŋa mara ni aacge ki gø.

⁸Wui, nyïïakuk Jerucalem, a cäänna uuni, ni näk mo omëër mara jootu joodø, wär caannu jïre ni kööu, no «Omëër marï dëëre onøkiil ki mëër.»

⁹Wui, ï na dhaaŋŋa mïërö døc dï mään, ?aŋø, omëër marï okadhø ka ŋø ni kaala cwøw bëët? ?Aŋø, omëër marï okadhø ka ŋø døc, ni bëëdï ni wa iï cemø kipere en?

¹⁰Omëër mara kïte mïërö døc ni dëëre pulli, ni eni di ŋiiø ki yïthakic cwøw ma kume apaar.

¹¹Täärnyïme paŋŋi kaamar warkey mana tøŋ, ni jïëye na näynäy ni cøl kaamar okwöre mo agaak.

¹²Ni nyeŋŋe mïërö ni tar kaamar akuyi mo ena buut pïï mo kwödö, mo geno lwøk ki caak, ni ge mïërö kaamar nyeŋ kïte moa perge leth.

¹³Ni mïërö mar pïte bëëdö kaamar pwöth jer wø ŋwääi ni met, ni buny dhee caala apiitø mo oŋøøk mo tøøn ki maar riia.

¹⁴Bäädi moe nëëni kaamar athøc warkey mo otïïö ni mïërö ki nyeŋ kïte mo perge leth. Bäp yie mïërö kaamar lëëc liec mo otïïö ni pøøth, mo oŋwaŋŋø ni mïërö ki nyeŋ kïte mo perge leth.

¹⁵Tiete nëëni kaamar were mo otïïö ki kïdi mo mïërö, mo ocwöth bäät warkey mana tøŋ, ni dëëre mïërö kaamar Lur Libaanø, ni leth pere rööma jenni mo gø.

¹⁶Eni buny dhee ŋweeth kiree, ni ena ŋat mo cwïny pärö kipere døc. Wui, nyïïakuk Jerucalem! Ŋatøgø beeye omëër mara, ni ŋatøgø beeye nyawatwa.