Read anuak Obeec Dudi 6 Bible Online

Obeec Dudi 6 - anuak bible

Obeec Dudi 6

¹?Wui, ï na dhaaŋŋa mïërö døc dï mään, omëëyï ocøøa kaa? ?Aŋø, omëëyï ocøra jööraŋø, nee eni manynyø na aciel?

²Omëëya aci ya ajïniina mare, dï jenni moa näk ŋwääi ni met. Ena ci kuna kwaac pïïth dïëk moe yïth jenni, na apiite moa no oŋøøk cooŋe.

³Aani, aana mar omëëya, no omëëya beeye mara; bee eni ni wø kwaac pïïth dïëk moe dï apiite moa no oŋøøk.

⁴Wui, omëëya, ï mïërö kaamar pääny Tirja, niï mïërö døc kaamar pääny Jerucalem, ni ec thäŋŋö ki ïïni kaamar jø leny mo bëëre ege tïŋ maal.

⁵Wec aani ki raŋŋø ki nyeŋŋï nø, kiper wïïa akierge. Jïër moï caala pïïth atëëe mo löönynya piny ki bäät Kïn Gelät.

⁶Lagï nëëni ni tar kaamar pïïth rööm, mo ge käla baŋ lwøk; ni gena cïp-jwøk, ni bäŋgø rege mo bëëdö na eni keere.

⁷Pïtï nëënö tier abïï mana näk iï loop wïïï kaamar nya adikwala mo opääŋŋö na thäŋi ariiø.

⁸Løny man bëët nyeya ni jïre da gwaae ma pïërabïciel, ki mään ma akwanye ma pïërabära, ki nyïïakuue mo dëët cwøw poot kucge mo ba kwaan.

⁹'Ba aani, dhaagø mara bee eni keere, ni bëëtö mare beer, ni mwöl kaamar akuuru, ni bee eni na nyakøø mana pere leth jï menni, ni menni na nywøl gø mëër ki gø døc. Eni, ena joot nyïïakuue møga ni köge no ogwïëdhö; ni jooti ya gwaae thuwø, ki mään moa näk akwanye, ni pwøcge gø, ni köge,

¹⁰na «A dhaaŋaŋø ni nëëni kaamar tiet-øw en, ni nëëni ni mïërö kaamar dwääy mo ena tar en, ni tøŋ kaamar cäŋ, ni ec thäŋŋö ki gø kaamar jø leny mo bëëre ege tïŋ maal!»

¹¹Aana løøc piny dï pwöth jer athaloommi[5] kuna raŋa jenni moa no oløth yi gool, nee jooda ki man näk mo jer omøki othiew, wala jer adïkwäle oŋøøk.

¹²Kanyøgø gïn mør aput tägö ni cwöba raa: jwïëy 'moa aana tïïcge keda aano pï piny bäät jään okweeny yïthakic jïëth okwëënyi mo jø powa mo kwörge døøŋŋø.

¹³Wui, nyijø Cunem, duuï, duuï! Duuï, duuï, niï raŋwa! ?Aŋø, aperŋø ni raŋŋu nyijø Cunem en kaamar meeŋ jø Maanayim?