Read anuak Obeec Dudi 7 Bible Online

Obeec Dudi 7 - anuak bible

Obeec Dudi 7

¹Wui, ï na nyi ŋat mo kare dwøŋ! Tietï moø ni iï kïth yi war yøø mïërö marge ka akadhø døc, ni bathï pøøth ni caala jap mïërö mo wø tïïc jø wø nyeŋge reegø.

²Peellï legø ni nëëni keda wïlli mo yie päŋ ki køøŋ nyïïomøki, ni yiï bäre nëëni ko omeenø ka apiite mo oŋøøk, ni caala acooŋ nyeŋ beel mo ogëëŋö.

³Thunh moï moø na ariiø yøø mïërö ni caala nyïï purre ariiø ma cïp-jwøk.

⁴Ŋutï nëëni keda øt koor mo otïïö ki lëëc liec, ni nyeŋŋï nëëni keda pulli mo wø en pääny Ëcbön ni beege moa en buut dhi kiir man wø cwøl ni Bath-Rabim. Umï nëëni ni mïërö keda øt koor man wø en Libaanø ni raŋŋa Damacka.

⁵Wïïï nëëni ni mïërö kaamar Kïn Karmël, ni jïër moï rege døøllø ni mïërö, ni caala waare ma dïmuur, ni mïërö mar jïëyï, nyeya pute ka böötö.

⁶Ïïni, ï mïërö døc ni ec mïnnö ki ïïni. Wui omëëya! Bëëtö mar dëërï bäre mïërö døc møn!

⁷Yi cwääc marï tiir kaamar jaath twöö, ni thunh moï nëëni keda jwale mo nyïï twöö.

⁸Ni kööa, na «A etha maal bäät twöö, nee nyïï gø lema.» Beerra man tïm thurï kaamar jwale mo nyïïomøki, ni tïm jam dhiï ni ŋwääö ni luy,

⁹ni tïm nuum dhøk marï kaamar køøŋ nyïïomøki mo nyään. Beerra man ö køøŋ nyïïomøki manøgø ni put aay ni coonya baŋ omëëya, ni møle ki bäät buny dhee ki lage.

¹⁰Aani, aana mar omëër mara, ni eni cwïnye lääŋŋa aani.

¹¹Omëëya, ööï, nøø aa wøk ki dï pääny; ö waa cøø yïth atude moa en wøk, ni thöörø wäär kunece.

¹²Beerra man laarø møøl yi pwöth omøki nee neenø; kanymør geno nø ŋøø, wala geno nø nipäta, wala adïkwäle geno nø ŋøø. Køøre nø, mëër onyoodha jïrï kaace.

¹³Nyïï ocøøk ŋwäänyge ajääŋge wøk; ni dhi øtø marø päŋ ki nyïëdi mo nyärö ki mo oruu, mo yaa cooŋ piny kiperï, ï no omëër mara.