Read anuak Aydheea 10 Bible Online

Aydheea 10 - anuak bible

Aydheea 10

¹Wui, otïmö ni leth jï jø wø kän wøk ki ciik mo reyø, ki jø wø ŋudö ki luup mo ba tiir,

²nee luup jøøa näk jïge bäŋ teek na can nee ba ŋølge na kare, ni teek bëëtö mar jiya moa can ba gwøkge; nee bëëtge ni ge møønna määr thuunhnhi, ni jap kïïe twierge twierø.

³?'Ba agïnaŋø noo tïïyu noo tïme na dïcäŋ ajäla, kanyo ö ränynyö no ööe ki kany mo bäär ni ööa bäätu? ?Aŋa noo reŋŋu baŋe kiper køny? ?Jap kwärö mou, owiiu ge kaa?

⁴'Ba mano dööŋ keere nø, beeye ki man boothu nyeŋŋu yïthakic jø omak ki tøŋ, ni 'näk uuni yïthakic jiy mo othøw. 'Ba këël køør japøgø bëët, wëër mar Wuuö Jwøk ree poot ba paanye, cere poot bëëdö ni ee rwieø.

⁵Wui, otïmö ni leth jï Aciria, na näk yaa tïïö na athøra mar wëër mara, na athøra mano en cer Aciria beeye mano nyoodha wëër mara ki gø.

⁶Aciria jääŋŋa jääŋŋö baŋ wï jur mana kwier Jwøk, ni köömma gø nee ci baŋ jiy moa tïïc aani naa wëëra ki ge, nee japge twier ni käli, ni thiel ge piny ni nyør geni kaamar odhöönh mar øtjöö.

⁷'Ba Aciria, acaara mare paa manøgø, ni manøgø paa mana en wïïe. 'Ba mana en cwïnye kiree beeye dïïr wïc, ni beeye ki man thöör wïth juurre mo thööth.

⁸Kiper ena köö, na «?Aŋø, kwääc lwaae mo leny 'moa, paa nyeye bëët?

⁹?Aŋø, pääny Kaalnö ba caal pääny Karkëmec, na Amath ba caal Arpat, ni Cameria ba caal Damacka?

¹⁰Kaawat mana nø pïïc cera baŋ mïëc nyeye mo wø wøør kït gïï wø lam, ni beege jøøa näk kït gïï wø lam moge moa no otieŋø pöödha geni ki moa en Jerucalem ki Cameria,

¹¹?aŋø, ba lønye nidïï ki man tïïa ki gïn mo raac dëët jø Jerucalem ki kït gïï wø lamge, ni caala mana nø tïïa dëët jø Cameria ki kït gïï wø lamge?»

¹²'Ba kanyo nø ö Wuuö Jwøki noo nø thöör tïïe moe bëët bäät Kïn Dhayan dëër pääny Jerucalem, eni köö, «Aani, nyeny Aciria jääla jäälö kiper ŋwøc mare na raac na en cwïnye, ka atöör mare na näk nëënö waŋe.»

¹³Kiper nyeny Aciria onø köö, ni «Ki køør teek bada ki riek waŋ mara gïnögø atïïa, kiper aani gïnögø tiere yaa nø kwany. Aani, nyeŋ kee mo wïth juurre yaa nø raanynyø, ni twiera jammi moa en jïge. Aani, mïëc nyeye moge adïïma ki teek mara.

¹⁴Aani cera apïï baŋ jap kwärö mo jiy kaawat man wø pïïc cenø baŋ øt wenyø; kaawat man wø ö dhaanhe wø cooŋ tøk wenyø mo odööŋ keerge, aani jø bäät piny bëët acooŋa kanya ciel, ni bäŋ aciel mo gööge ee tïŋ maal wala mo dhee ee ŋaamø, wala mo oköök.»

¹⁵?Aŋø, ley ŋwöö kiper dëëre bäät ŋat wø ŋudö ki gø? ?A gïr ŋøl ko opämi, dëëre wø jieme jiemø bäät ŋat wø ŋudö ki gø? Manøgø patha gïn mo tägö; tïmö ni caala man ö athøra ni kwany dhaanhø ni wø kwany gø, wala caala man ö athøra ni tïŋ dhaanhø maal na näk patha jaath.

¹⁶Kiper manøgønø, Kwäärö Wuuö Jwøk, eni na wïth jammi bëët, ojäägi ki täw mo leth dï jø leny moa no olør mo nyeny Aciria, ni ö ajiemmi mar nyeny Aciria ni nyebi ki maac mo liel døc.

¹⁷Eni na näk tar mar Icriel otïmö na maac, ni ö eni na en kur keere ni tïme na leep maac. Ni ö maaøgø ni put koodhi ko otwel mo Aciria thöör ki dïcäŋ aciel keere.

¹⁸Ajiem lul mar Aciria ka ajiem pwöth moe mo wø ciek ki caammi døc raany Wuuö Jwøki raanynyø, ni rwöbe ka jwïëy ki dëël bëët, kaawat man wø ö dëër dhaanhø wø dwade ki täw mo leth.

¹⁹'Ba kwään jenni moo dööŋ yi lure manøgø otïmö ni nøk, ni løny jï nyilaal jaak ki man kwaan geni.

²⁰'Ba noo tïme na dïcäŋeca, jø Icriel moo dööŋ ni kwøw, na bøth ri dhi øt Jeekap, otïmö ni ge ba göök ri jiy moa thöör geni këët, 'ba ge puta göök ri Wuuö Jwøk, Jwø Icriel na en kur keere na adïëri møn.

²¹Jiy moo dööŋ ni kwøw oduui møn, ni beege moo dööŋ ri dhi øt Jeekap, ni ge duua baŋ Jwøa teek.

²²Wui Icriel, këël na bëët jiyï ni kwäänge caala akwöny naama dwøŋ, mo nøk keerge moo dööŋ ni kwøw dëëtge beege noo duui. 'Ba ränynyö onø cïp piny, no onø ŋøl kiree na kare.

²³Kiper Kwäärö Wuuö Jwøk, eni na wïth jammi bëët, ränynyö bäre mana näk ee nø cïp piny kïthe bäät jiy moa en yi ŋöömö manøgø bäre.

²⁴Kiper manøgønø, Kwäärö Wuuö Jwøk, eni na wïth jammi bëët, aköö, «Wui, u na jiya ni wø bëëdö Dhayan, käru lwäyö ki jø Aciria kanyo öge noo pwötge uuni ka athøra, noo tïŋge athøra marge maal bäätu, kaawat mana tïïc jø Ijepi.

²⁵Kiper ki kany mo thiinh, wëër mara ki uuni thum, ni ö wëërri mara ni coony baŋge kuna raanynya geni.»

²⁶Wuuö Jwøk, eni na wïth jammi bëët, alaŋŋa tïŋe maal bäätge kaawat mana tïïe na dïïr wïth jø Midien buut Kïn Orëëp, ni ö athøra mare ni tïŋ gø maal bäät naama dwøŋ, kaawat mana tïïe Ijep.[5]

²⁷'Ba dïcäŋeca, tëër mana peek mar nyeny Aciria otïŋ maal göögu, ni ö jaath puurri mare man wø rïï ŋut, ni käli wøk ŋutu, ni ö jaath puurri manøgø ni toore kiper lørø maru.

²⁸Nyimän onø ci kuna tuk paac mana cwøl na Ayath, ni eni cøra dï Migarön, ni jammi moe ee cïp piny Mikmac.

²⁹'Ba eno nø pöödhö, ni kööe, «Gëba otïmö na kar jwöm røk man buta yie.» Jø Reema onø lwäyö døc, ni ö Giba, pääny Cøøl, ni nø bwøk jiye.

³⁰Wui, u na jø Gaalim, gööu ko oduuru døc ni döötu ena maal! Wui, u na jø Laaica, ceku ïthu. Wui, u na jø Anathöth, jøllu oduuru manøgø.

³¹Jø Matmëna anø bwøk, ni ö jøøa bëëdö Gëëbïm ni nø kaange rege.

³²'Ba dïcäŋi kiree nyimän apïï Nöp, ni tuuŋ cere ni mare ŋwøc kiper gïno tïïe dëët jø Kïn Dhayan ni beeye Kïn Jerucalem.

³³Ka adïëri møn, Kwäärö Wuuö Jwøk, eni na wïth jammi bëët, bäät jenni oŋøt piny ki teek mo dwøŋ døc mo di lwäärö, ni ö jenni moa døøŋŋø dïge ni bami piny, ni ö mo wø bëëdö ni bäyö ni dwøgi piny.

³⁴Wuuö Jwøk, lul mana no odhïŋ døc oŋøt piny ki ley, ni ö eni na teek ni gøø lur Libaanø piny, ni pädhe.