Read anuak Aydheea 11 Bible Online

Aydheea 11 - anuak bible

Aydheea 11

¹'Ba lwiidhø ojoot ki ri Jeci; ni ö bati mano ööi ki ree ni nywøle ki nyey.

²Ni ö Jwïëc Wuuö Jwøki ni ö bääte, ni bee jwïëyo cïp leec wïc ki ŋäc tiet luup, jwïëyo bwøth dhaanhø ka acaara mo beer ni wø cïpi ki teek, jwïëyo cïp kwänynyö ki lwär ki Wuuö Jwøk.

³'Ba eni yie omïnni ki man bëëde ni lwäära Wuuö Jwøk; ni bëëde ni luup ba ŋøle ki køør jammi mo wø joode ki waŋe, wala mo wø wïnynye ki ïthe.

⁴'Ba eni luup jøøa can oŋøle ki køør adïëri; luup jøøa no othiel piny moa en bäät piny oŋøle na kare. Eni piny ojääle ki luup moo ööi ki dhee, ni 'näk jøøa reyø ki jam dhee.

⁵Bëënynyö mare otïmö kaamar kaw mo ee twöö ŋääe, ni ö adïëri mare thuwø ni tïme kaamar kaw piere.

⁶'Ba orudö obëëdö na aciel ki nyirøømmø, ni ö kwaci ki nya ateea ni butge na aciel, ni ö nyirøøa ki nyi ŋuu ni cämge na aciel, ni ge kwaaya nyilaalli mo thiinh.

⁷Dhieŋ ocämö na aciel ki cwieny; ni ö nyïïge ni buutge na aciel. Ni ö ŋuuwi ni cäme ki luum kaamar dhieŋ.

⁸Nyilaal mo poot dhøøth okwääk dhi buur olwierø, ni ö nyilaalli mo oŋøl ki caak ni rwaak cere baŋ thwöl mana näk uu kar bëëtö mar gø.

⁹'Ba bäät kïdi bäre na en kur keere mar Wuuö Jwøk, tïmö ni bäŋ ŋat mo tïïö ki gïn mo raac yie wala mo räänyö; kiper piny opäŋ ki kwänynyö man ŋäc Wuuö Jwøk kaawat mano ö pïïyï othaar naama dwøŋ.

¹⁰Dïcäŋeca lwinh Jeci ocuŋŋi na ŋïï kiper wïth juurre; ni ö wïth juurre ni kuutge ree, ni ö kar bëëtö mare ni pääŋe ka ajiem.

¹¹Dïcäŋeca Wuuö Jwøk cere cäŋe ka tïŋ maal ri rietge ki man duu jiye baŋe moa no odööŋ ni kwøw ya Aciria, ki Ijep, ki thääŋ ŋööm Ijep mana cwøl ni Patröc, ki moa no odööŋ Kuuc, ki Ilam, ki Babiløn, ka Amath, ki deŋ naama dwøŋ.

¹²Eni ŋïï mare tïŋe maal baŋ wïth juurre, ni cooŋ jø Icriel moa no omaa ki tøŋ; ni cooŋ jø Juuda moa no okeethø ki yïth tuk piny moa na aŋween.

¹³Kanyøgø bëët keec mar Ipariem[6] orwäänyi, ni ö nyïïmänni mo Juuda ni tïmge ni bäŋgø. Ipariem otïmö ni ba këëö kiper Juuda, ni ö Juuda ni ba cwaat yi Ipariem këët.

¹⁴'Ba geni bëët geno løøc piny baŋ jø Pilitin, ni läätge bäätge jï løø kur pänh-cäŋ. Dëëtge odwalge ni twierge jiy mo wø en jï løø kur tuul-cäŋ, ni tïm jø Ëdömmi ki jø Möap ni ena tietge, ni tïm jø Amönni ni bëënna geni.

¹⁵Wuuö Jwøk weel naama dwøŋ mar Ijep taale taalø; cere tïŋe maal bäät Naam Upareeti ki jamø mo lïëth, ni put gø ŋørø na nyeŋŋi abïriiø, ni put tïmö ni ŋøl jiyi ŋølø ki war jaak.

¹⁶Kanyøgø otïmö ni da jöö mo dwøŋ man ŋun jiyi moe ki yie moa no odööŋ ni kwøw ya Aciria, kaawat mana tïïe kiper jø Icriel kanya öge wøk ki Ijep.