Read anuak Aydheea 14 Bible Online

Aydheea 14 - anuak bible

Aydheea 14

¹'Ba Wuuö Jwøk cwïnye pädhö ki gïr dhi øt Jeekap, ni cäŋ jø Icriel jierrø, ni tïïc ge nee pïge piny yi ŋöömö marge, ni ö jøøa pathi ni dwätge ki geni ni kuurge dëëtge dhi øt Jeekap.

²Kanyøgø nø wïth juurre öö ni jiethge jø Icriel, ni kïthge geni yi ŋöömö marge, ni ö jø Icrielli ni tïïcge wïth juurre moøgø na moge yi ŋööm Wuuö Jwøk; ni ö cwøwi ki mään mo jøøgø ni bëëtge ni gena jø tïïc jïge. Jø Icriel, jiy moa mak geni ki tøŋ makge maaø ki tøŋ, ni tïmge na kwääri bäät jøøa dïïm geni.

³'Ba dïcäŋeca, kanyo ö Wuuö Jwøki noo mooc uuni ki jwöm yi bëët rääm mana rämu ki gø, ki yi caarø mana caar uuni ki gø, ki yïth tïïe moa teek na wara tïïyu nou ena tier laŋ,

⁴uuni, duut mar aŋaada man wärru wärö kiper nyeny Babiløn, ni kööu, «Neennu, ŋata caar jiy apädhö, ni ö dïwïti mare ni ŋøle.

⁵Wuuö Jwøk athøra mar jø raay anø toore, ni beeye athøny kwär mar cuumme,

⁶na wara dïïmge wïth juurre ki gø kanya wara wëërge ni ge dïmö ka adïma mo ba cuŋ; ni beeye athønynya wara dwøkge wïth juurre piny ki gø kanya wara wëërge ni ge caara jiy ki caarø mo ba cuŋ.

⁷Bäät piny bäre ajïtö ki jwöm ni put nikïïl, ni ö jiyi ni kwöŋge ki met ec.

⁸Këël jenni moa bäyö ki moa perge leth mo lur Libaanø, yïthge mïnnö bäätï, ï na nyeny Babiløn, ni köge, ni ‹Ennø, kiper mana dwøk wïïï piny, bäŋ dïŋut jenni këët mo ööa baŋwa nee wa ŋøt piny.›

⁹«Kar bëët jwïëc jøøa no othøw na en piny kuya kanynyø ni pänh ïïni kanyo ööï; ni ö jwïëc jiy moa no othøw, ni beege cuumme mo bäät piny bëët, ni tïŋ ge maal kiperï niï määthge; ni wëëk nyeye bëët mo wïth juurre ööny maal ki bäät wäl moge.

¹⁰Kanyøgø ge bëët, ge cäänö ki ïïni ni köge, ‹?Aŋø, këël ï thuwø, ïïna tïïc niï jääk kaamar marwa? ?Ïïna tïmö niï caala waani ennø?

¹¹Atöör marï ki dööt thøme moï anø käl kany kar bëët jwïëc jøøa no othøw. Bïëy beeye pëëm marï mano butï bääte, ni twöŋi beege aleeŋŋa marï mano uumï ki gø.›

¹²«Wui, ï na cëëc øw, ni wø nëëni ki bäc øw, kee ïïna nø pänhnhö ki maal! Ï na tïïc wïth juurre ni jägö, kee ïïna nø leeŋ piny!

¹³'Ba ïïni, ïïna köö ki yi cwïnyï, ni ‹Aani, a etha maal, ni tïïa wälu mara ni ena ŋäth ceer mo Jwøk, ni pïïa piny bäät kïn wø cooŋ røk bääte, naa ena kanya en maal kuya wï-piny.

¹⁴Aani, a etha maal ŋäth pøøl kuya, ni tïïa raa na a caala Jwøa Dwøŋ ni en Maal.›

¹⁵'Ba ïïno nø kïth piny kar bëët jwïëc jøøa no othøw, yi buur mana bäär døc na en kuya.

¹⁶«Jiy moo joot ïïni nyeŋge teege riï, ni pëënyge dëëtge ni köge, na ‹?Aŋø, man beeye ŋata tïïc bäät piny ni ïïgö, na nëëk mïëc nyeye,

¹⁷na tïïc bäät piny ni caala dï paap, na raany päänye mo gø, na wara bëëdö ni ba jïëy ki man wec jiy moa näk ee maa ki tøŋ ki man døøge poge?›

¹⁸«Nyeye mo wïth juurre bëët butö no ojiemø, ni ŋati man nø ena yi bwörö mare.

¹⁹'Ba ïïni, ïïno nø lëëŋ wøk ki yi bwörö marï kaamar bat jaath mo owetø; niï rëëbö ka jiy moa no othøø, na 'näk ko opëëllö, jøøa no onø ci piny tier buur kuya yïth kïte, kaamar dëër dhaanhø mo othøw mo onyørø.

²⁰Ïïni, ï ba koony kaamar nyeye møga, kiper paac marï araanynyï, ni 'nägï jiy moï. Beerra man ö nyïïkwaac jiy mo wø tïïö ki gïï mo reyø ni rwääny nyeŋge na bäre bäre ni ba cwøl.

²¹Jiiŋŋu kany ŋar wäät jø Babiløn yie kiper gïïa reyø na tïïc kwäcge; ba beer ki man öge maal ki man ci pinynyi ceŋge, ni pääŋge piny bäre ki päänye.»

²²'Ba Wuuö Jwøk, eni na wïth jammi bëët, aköö, «Aani, a ööa maal bäät jø Babiløn, ni ŋula nyeŋ Babiløn wøk, ki jiye moa bøth, ki nyikwaaye, ki jø tuuŋge bëët.» Manøgø beeye dwør Wuuö Jwøk.

²³«Aani thuwø, paanøgø tïïa tïïö na kar bëëtö mar thëëwe, ni pïï omägö yie, ni puta gø jwiec ki jwïëc mar aranya.» Manøgø beeye dwør Wuuö Jwøk, eni na wïth jammi bëët.

²⁴Wuuö Jwøk, eni na wïth jammi bëët, anø kööŋ ni kööe, ni «Ka adïëri møn, kaawat mana nø cïba acaara mara piny, puta tägö; kaawat mana nø caara gø, puta bëëtö kare.

²⁵Aciria nyøra nyørø ni raanynya gø yi ŋöömö mara bäät kïte 'moa. Gïïa leth na tïïe na caal jaath puur man wø rïï ŋut dhieŋ di paanyø bäät jiya, ni ö tëërri mare na peek ni tïŋi maal göök jiya.

²⁶«Manøgø beeye acaara mana no ocïp piny kiper ränynyö mar bäät piny bäre, ni manøgø beeye cer ajäla mana no orwieø nee wïth juurre bëët raanynye.

²⁷Kiper Wuuö Jwøk, eni na wïth jammi bëët, acaara mare anø cïp piny. ?Aŋø, da ŋat mo raanynya acaara manøgø? Eni cere ee nø rwiec. ?Aŋø, da ŋat mo tïïc gø nee cere duue?»

²⁸'Ba yi cwiina thøw nyeya ma Eeyeth, luubö man anyooth Wuuö Jwøki na ennø nø,

²⁹«Wui, u na jø Pilitin u bëët, kär yïthu mïnnö kiper mana toor athøra mana pwöt uuni ki gø, kiper athøra manøgø otïmö na thwöl mo olwierø mo wïnni døc, ni ö nyi thwör olwierø manøgø ni tïme na thwöl mo määdö.

³⁰'Ba jiy moa näk dëëtge ba løny ki køny jïge, ge jïtö ki cam. Ni ö jiyi moa can ni bëëtge piny ni geno gwøø. 'Ba uuni, wïthu dïïra dïïrö ki käc, ni ö jiyu moa no obøth ki thøø ni thööri ya käci manøgø.

³¹«Wui, dhi kiir, gööï ko oduuru! Wui, pääny, jwöŋï! Wui, u na jø Pilitin bëët, dëëtu kwanynye ki lwär! Kiper jïrö aöö ki wï-piny, ni beege jø leny mo dëëtge ege nø jek.

³²?Aŋø, agïnaŋø noo løk jï jiy moa öö ni ge jääŋŋa wï jurri mør? Gïno løk beeye ni Wuuö Jwøk Dhayan anø tïïe ni teek, 'ba jiye moa no ocaarø, rege ogwøkge yie.»