Read anuak Aydheea 17 Bible Online

Aydheea 17 - anuak bible

Aydheea 17

¹'Ba luumma nyooth Wuuö Jwøki kiper Damacka bee en: «Neennu, Damacka kare aløny ni cään ki man tïme ni paa pääny, eno pädhi ni neeruuth.

²Päänye mo Aröör wïc owïl ki geni, ni tïmge na kwöro bëët pïïth dïëki yïthge, ni ge butö jaak ni bäŋ ŋat mo tïïya geni nee lwäcge.

³Päänye moa no ogeerø ni teek tïmö ni bäŋgø yi ŋööm Ipariem, ni bäŋ teek nyec Damacka; ni ö jiyi moo dööŋ ni kwøw dëët jø Aram ni räny ajiemmi marge kaamar ajiem mar jø Icriel.» Manøgø beeye dwør Wuuö Jwøk, eni na wïth jammi bëët.

⁴'Ba noo tïme na dïcäŋeca, ajiem mar nyïïkwaac Jeekap ränynyö, ni ö lørø marge ni tïme na dwadø.

⁵Ni ö gïnögø ni tïme kaawat man wø ö ŋat kaci wø kac caammi mo poot cuŋŋö yi pwödhö, ni kuk abäy baaŋŋe baaŋŋø ki cere kiree; wala tïmö kaawat mar ŋat mo data wïth beel moa en yi goor Rapayim.

⁶'Ba møøk poot bøth yie, ni caala man wø diem nyïï jaath man wø nyïïe wel na maaw piny, ni tïme ni nyïëdi ariiø wala adäk obøth maal lwinh jaadhøgø, ni nyïëdi aŋween wala abïïc obøth ri bäät jaath manøgø mana no onywøl døc. Manøgø beeye dwør Wuuö Jwøk, Jwø Icriel.

⁷Noo tïme na dïcäŋeca, jiy døøa baŋ Jwøa cwääc geni, ni ö nyeŋge ni teege gø ree, eni na Jwø Icriel na en kur keere.

⁸Geni, ge ba døø baŋ gïï wø cïp olämme bäätge na tïïcge ki ceŋge jï juuga reyø, ni ba lwïthge këët baŋ gïïa tïïcge ki lweetge, ni beege jenni moa näk ege tieŋø na no ocaa ri jwøa cwøl na Acara, ki gïï wø waaŋ gïï wø jïcge ŋwääi ni met bäätge.

⁹Noo tïme na dïcäŋeca, päänye moge moa teek otïmö ni caala kwör mo owiiø mo otïmö na paap, ni beege kwöra wec jøøa dïkwøŋ kanya reŋge ni ge ŋwieya jø Icriel; ni ö ŋöömö manøgø ni put dööŋŋö ni bäŋ jiy yie.

¹⁰Kiper u na jø Icriel, wïthu awïl ki Jwøk na näk pïëmi maru, ni käru wïthu parø ki eni na kïn gwøk røk maru. Kiper manøgønø, këël u doo pïïdhö ki jenni mo mïërö, ni tøøgu jenni mo käla mïëri mo path,

¹¹ni ciellu gø ki kal dïcäŋo piithu gø yie, ni noo tïme na amöölla, gïïa piithu puta døøŋŋø ni ŋøøkge, kanyo kaay bäŋ gïn mo joot, ni ö dïcäŋeca ni tïme na cäŋ täwe ki rääm mo leth.

¹²Wui, wïnynyu ŋurö mar wïth juurre mo thööth, ni wïnyi en kaamar lwör mar athaŋ naama dwøŋ. Wïnynyu ŋurö mar wïth juurre na näk lwör kaamar pïï mo kwödö ni teek.

¹³Wïth juurre döötge märö kaamar lwör mar pïï mo thööth; 'ba kanyo ö Wuuö Jwøki noo jook geni, ge puta bwøk ni reŋge kany mo bäär. Ni put ge riemmø ni køøl ge kaamar luum mo ena bäät kïte kanyo køøli ya jamø, wala tør kanyo køøli ya apwøyaweerø.

¹⁴Ka adïëri møn, noo tïme na wïthïënhö, jiy tïïcge tïïö nee lwäcge døc; 'ba kanyo tïme na kur øw, ge tøør këët. Manøgø otïmö na kur jiy moa twier øøni, ni beeye gïno tägi dëëtge, ge na twier japø.