Read anuak Aydheea 18 Bible Online

Aydheea 18 - anuak bible

Aydheea 18

¹Wui, otïmö ni leth jï paana näk jïre da baabuure mo rege da bwöm, na en løø näm mo paana cwøl ni Kuuc løøga,

²ni wø jääŋ jiy ki jïëthe mo cäädhi ki yïth näm, ni beege jïëthe mo ocwääö ko otöök. U na jiy mo wø jääŋŋi ni wø rwäänhnhi, cou baŋ jøøa bäyö na dëëtge pøøth, ni beeye wï jur mo jiy moa kwörge cärö ki moa kwörge bäyö lwäär ki gø, ni beeye wï jur mo teek mo dïmö, mo ŋøøm moge oŋør nämmi.

³'Ba uuni bëët, u ni en bäät piny, ni bee u ki dëëtu ni wø bëëdö yie, kanyo ö ŋïï noo tïŋi maal ki paana en bäät kïte, oneennu, kanyo ö tuuŋŋi noo koodhi, dwøre owïnynyu.

⁴Kiper man beeye gïna caan Wuuö Jwøki jïra, na kööe, ni «Aani a bëëdö naa lïŋö naa rääŋö ki kanya ena yie kar bëëtö mara, kaamar däär cäŋ man wø rieny ni lïëth, ni tïme kaamar pöölö mo ŋec kany wø näk ri kac beel ni cäŋ kwaar.»

⁵Kiper kanyo tïme ni kar kac poodi, ni wï jaath onø ŋøø, ni wïïe opäth piny, ni nyïïe manynya ciek, eni lweth jenni moa no oløth ŋøre ŋørø ki caakïïn mar goor jenni, ni ö bäädi moa no olaak ni ŋødi piny ni weti.

⁶Ni putge dööŋŋe jï weny mo wø cämö ni ge cwëëdhö ni wø bëëdö bäät kïte, ki jï lääc paap, ni tïmge na cam jï weny moøgø ki öörö bäre, ni tïmge thuwø na cam jï lääc paap ki cwiir bäre.

⁷'Ba noo tïme na kar kaaca, muuy di kälö jï Wuuö Jwøk, eni na wïth jammi bëët, ki baŋ jøøa bäyö na dëëtge pøøth, ni beeye wï jur mo jiy moa kwörge cärö ki moa kwörge bäyö lwäär ki gø, ni beege wï jur mo teek mo dïmö, mo ŋøøm moge oŋør nämmi. Muuy di kälö ni kïthi bäät Kïn Dhayan na näk kar bëët nyeŋ Wuuö Jwøk, eni na wïth jammi bëët.