Read anuak Aydheea 21 Bible Online

Aydheea 21 - anuak bible

Aydheea 21

¹'Ba luumma nyooth Wuuö Jwøki kiper paaba näk tëën na en buut naama dwøŋ bee en: Kaawat man wø ö atuunna wø jwiec paana en jï løø tier-piny, da gïn mo räänyö mo öö ki dï paaba näk tëën, ni beeye yi ŋöömma näk di lwäärö.

²Luubö mo teek anyooth jïra ki yi wïïa na ennø nø: Ni ŋat wø tïïc gïï mo reyø ki piny poot bëëdö ni tïïya ge, ni ö dïräänyi ni bëëde ni poot räänyö. Wui, u na jø Ilam ki jø Mëdön, ööu maal ni cou ni cielu Babiløn dïër; Wuuö Jwøk gïïa tïïc jø Babilønni na wëëk jø møøk cooyø otïïe nee cuŋge.

³Kanya jooda gïnögø, rääm mo leth aput tägö dëëra, kaamar dhaagø mo ogøøc mäc lwaarri; Aani wïïa ree akiere døc, ni tïme ni tiet luup ba kwanya, ni lwäya døc, ni tiet luup ba jooda.

⁴Wïïa atïmö ni wïïrö, ni tïm dëëra ni kwanynyi ki lwär, ni ö kar jwöm røk mana ŋäädha ni løk ree na lwär mo dwøŋ bääta.

⁵'Ba kwääri mo Babiløn, kar cam ajiiŋge, ni peethge gø, ni cämge, ni mäthge. Ni put dwølli öö, mo köö, «Wui, kwääri mo jø leny, ööu maal ni jiiŋŋu kööt leny!»

⁶Kiper man beeye gïna caan Kwäärö Wuuö Jwøki jïra, ena köö, ni «Ciï ni tïïyï ŋat koor nee cuŋŋe kare, nee gïïo joode nee caane.

⁷'Ba kanyo ö eni noo joot jiy mo cäädhi na ariiø ariiø ki bäät okwëënyi mo lääy, ki mo cäädhi ka bäät arëëni, ki mo cäädhi ka bäät athïrööle, beerra man neen gø ni cek ïthe døøc.»

⁸Køøre ŋat koor acwötö ni dwøre ee tïŋ maal, ni kööe, «Wui kwäärö mara, ki yi cäŋ cooth a bëëdö naa cuŋŋö kar koor mara, ki yïth wärre cooth thuwø, a bëëdö kar koor mara.

⁹'Ba ennø, raŋï, jiy mo cäädhi na ariiø ariiø ki bäät okwëënyi mo lääy gena öö; 'ba da dwøl ma akøp, ni ‹Babiløn apädhö! Wui, ena pädhö møn, ni ö kït gïï wø lam na juu moe ni tøyi ni petge yïth ŋøøm!› »

¹⁰Wui u na jiya ma jø Icriel, u na pïïc gïï mo lethi bäätu, kaamar man wø dïn beel yi laara, gïna wïnynya na caan Wuuö Jwøki, Jwø Icriel, eni na wïth jammi bëët, beeye na caana jïïu enø.

¹¹'Ba luumma nyooth Wuuö Jwøki kiper jø Duma bee en: Dhaanhø mør cwödö ki Cëër,[8] ni kööe, ni «?Ŋat koor, a kany mo nyïëdi noo dööŋ kiper wäär? ?A pëënynya ïïni, naa kany mo nyïëdi noo dööŋ kiper wäär?»

¹²Ni løgi ya ŋat koorri, ni kööe, ni «Øw ba kääŋi ki man ööe, 'ba poot da wäär mo öö thuwø. 'Ba ni näk miï poot manynya pïëc, wärï cäŋ duuö ni pëëï.»

¹³'Ba luumma nyooth Wuuö Jwøki kiper Areebia bee en: U na jø Didan, ni wø cäädhi ki bäät athïrööle, ni wø tïïc twïër marge ki wäär yïth abuŋŋe mo Areebia,

¹⁴kännu ki pïï jï jøøa no onäk riewi. U ni bëëdö Tëma, kännu ki cam jï jøøa no obwøk ki leny,

¹⁵ni beege jøøa ŋwiec thøw opëëllö ka atheerø yi lenya teek.

¹⁶Kwäärö Wuuö Jwøk aköö jïra, ni «Ki køør cwiir aciel, kaawat man wø ö ŋat tïïci wø kwaan nïr tïïc moe ma kar cwiir aciel, ajiem mar paana cwøl ni Këdar ränynyö na bäre bäre;

¹⁷ni ö kwään cwøw mo wø këëdi ka athëëre moo bøth ri leny dëët jø Këdar moa teek ni tïmge ni nøk.» Manøgø caana Wuuö Jwøki, eni na Jwø Icriel.